Выстава Пань Дайцзін адкрыецца ў Ватыкане
Аляксандр Амяльчэня - Vatican News
У чацвер, 2 ліпеня 2026 года, у 18.00 ў Зале святога Пія X на рымскай вуліцы дэль Оспэдале, 1, адбудзецца ўрачыстая прэзентацыя новай экспазіцыі.
Праект рэалізаваны ў выставачнай прасторы "Канчыліяцыёнэ 5" у межах штогадовага цыкла "Чытаць па-новаму". Куратарам праграмы з'яўляецца вядомы гісторык мастацтва і філолаг Данацьен Гро. На сустрэчы выступяць кардынал-прэфект Жазэ Таленціну дэ Мендонса, куратар праекта і сама мастачка Пань Дайцзін. Яны прадставяць творчую ініцыятыву і распавядуць пра яе галоўныя тэмы.
Новая экспазіцыя будзе прымаць гасцей у залі "Канчыліяцыёнэ 5" да 16 кастрычніка 2026 года. Гэтая пляцоўка, якая атрымала назву паводле свайго рымскага адраса, стала першай прасторай ватыканскага ведамства, адмыслова прысвечанай сучаснаму мастацтву.
Экспазіцыя адчынена для наведвальнікаў кругласутачна, што дазваляе кожнаму пазнаёміцца з творамі ў любы абраны час. Праз такія ініцыятывы Дыкастэрыя па культуры і адукацыі прагне развіваць супольны дыялог вакол актуальных праблем сучаснасці. Гэта адкрывае новыя магчымасці для глыбокага разумення мастацкага самавыяўлення.
Кітайская мастачка Пань Дайцзін нарадзілася ў горадзе Гуян у 1991 годзе. У сваёй творчасці яна адметна злучае выяўленчае мастацтва з музычнымі кампазіцыямі. Аўтар працуе пераважна з гукам, відэафільмамі, працяглымі перформансамі і харэаграфіяй. Яе творы вылучаюцца глыбокім псіхалагічным адчуваннем акружэння, перадаюць моцныя фізічныя і эмацыянальныя перажыванні. Сёлета яе адметны талент быў ушанаваны прэстыжнай міжнароднай узнагародай "Шанель Нэкст".
