ಪವಿತ್ರ ನಾಡಿನ ನೂತನ ಕಸ್ಟೋಡಿಯನ್ ಜೆರುಸಲೇಮ್ಗೆ ಆಗಮಿಸಲಿದ್ದಾರೆ
ಜೆರುಸಲೇಮ್ನಲ್ಲಿ ರಾಬರ್ಟೊ ಸೆಟೆರಾ
ಜುಲೈ 21 ರ ಸೋಮವಾರ ಮಧ್ಯಾಹ್ನ ಪವಿತ್ರ ನಾಡಿನ ನೂತನ ಪಾಲಕ ಧರ್ಮಗುರು ಫ್ರಾನ್ಸೆಸ್ಕೊ ಇಲ್ಪೊರವರು ಜೆರುಸಲೇಮ್ನಲ್ಲಿರುವ ಪವಿತ್ರ ಸಂರಕ್ಷಕನ ದೇವಾಲಯಕ್ಕೆ ಸಾಂಭ್ರಮಿಕ ರೀತಿಯಲ್ಲಿ ಪ್ರವೇಶವನ್ನು ಮಾಡಿದರು - ಈ ಘಟನೆಯು, ನಿರ್ಗಮನ ಪಾಲಕ ಧರ್ಮಗುರು ಫ್ರಾನ್ಸೆಸ್ಕೊ ಪ್ಯಾಟನ್ ರವರಿಂದ ಮುದ್ರೆ ಹಾಗೂ ಜವಾಬ್ದಾರಿಯನ್ನು ಹಸ್ತಾಂತರಿಸುವುದರೊಂದಿಗೆ, ಪವಿತ್ರ ನಾಡಿನಲ್ಲಿ ಅವರ ಧ್ಯೇಯವು ಅಧಿಕೃತ ಆರಂಭವನ್ನು ಸೂಚಿಸುತ್ತದೆ.
ಧರ್ಮಗುರು ಇಲ್ಪೊರವರು, ನೀವು ನಿಮ್ಮ ಕಸ್ಟಡಿಯವರ ಆದೇಶವನ್ನು ಬಹುಶಃ 1967ರ ಯುದ್ಧದ ನಂತರ, ಇಲ್ಲದಿದ್ದರೆ 1948 ರ ನಂತರ, ಈ ದೇಶ ಅನುಭವಿಸಿದ ಅತ್ಯಂತ ಕಠಿಣ ಸಮಯದಲ್ಲಿ ಪ್ರಾರಂಭಿಸುತ್ತಿದ್ದೀರಿ, ಗಾಜಾದಲ್ಲಿ ಕಳೆದ 22 ತಿಂಗಳುಗಳಲ್ಲಿ 57,000 ಜನರು ಸಾವನ್ನಪ್ಪಿದ್ದಾರೆ. ಕದನ ವಿರಾಮಗಳು ಹೆಚ್ಚು ಹೆಚ್ಚು ಘೋಷಿಸಲಾದರೂ ಕದನ ವಿರಾಮಗಳು ಇನ್ನೂ ಕಾರ್ಯರೂಪಕ್ಕೆ ಬಂದಿಲ್ಲ. ಪಶ್ಚಿಮ ದಂಡೆಯಲ್ಲಿ, ವಸಾಹತುಗಾರರ ದಾಳಿಗಳು ಆಗಾಗ್ಗೆ ಹಿಂಸಾತ್ಮಕವಾಗುತ್ತಿವೆ. ಕ್ರೈಸ್ತ ಧರ್ಮದ ಅಲ್ಪಸಂಖ್ಯಾತರು ಸಹ ಪುನರಾವರ್ತಿತ ಹಿಂಸಾಚಾರವನ್ನು ಅನುಭವಿಸುತ್ತಿದ್ದಾರೆ. ತೈಬೆಹ್ ಎಂಬ ಕ್ರೈಸ್ತ ಧರ್ಮದ ಹಳ್ಳಿಯ ಮೇಲೆ ವಸಾಹತುಗಾರರ ಆಕ್ರಮಣಗಳಲ್ಲಿ ಮತ್ತು ಮುಖ್ಯವಾಗಿ, ಕಳೆದ ಗುರುವಾರ ಗಾಜಾದಲ್ಲಿನ ಕಥೋಲಿಕ ಧರ್ಮಕೇಂದ್ರದ ಮೇಲೆ ಶೆಲ್ ದಾಳಿಯಲ್ಲಿ ಮೂವರು ಸಾವನ್ನಪ್ಪಿದರು ಮತ್ತು ಹತ್ತು ಮಂದಿ ಗಾಯಗೊಂಡರು.
ಧರ್ಮಗುರು ಇಲ್ಪೊರವರೇ, ನೀವು ಈಗಾಗಲೇ ಪವಿತ್ರ ನಾಡಿನ ಮತ್ತು ಕಸ್ಟಡಿಯೊಂದಿಗೆ ಚೆನ್ನಾಗಿ ಪರಿಚಿತರಾಗಿದ್ದೀರಿ. ಇತ್ತೀಚಿನ ವರ್ಷಗಳಲ್ಲಿ, ನೀವು ಕಸ್ಟೋಡಿಯನ್ ಪ್ರತಿನಿಧಿಯಾಗಿ ಇಟಲಿಯಲ್ಲಿ ಕಸ್ಟಡಿಯನ್ನು ಪ್ರತಿನಿಧಿಸಿದ್ದೀರಿ. ನಿಮ್ಮ ಮನಸ್ಸಿನಲ್ಲಿ ಕಾರ್ಯದ ಯೋಜನೆ ಇದೆಯೇ?
ನನ್ನ ಹಿಂದಿನವರು ಸ್ಪಷ್ಟವಾಗಿ ಗುರುತಿಸಿದ ಮಾರ್ಗವನ್ನು ಅನುಸರಿಸಲು ನಾನು ಉದ್ದೇಶಿಸಿದ್ದೇನೆ. ಕಸ್ಟಡಿ ಕಸ್ಟೋಡಿಯನ್ ಅಲ್ಲ. ಅದು 300ಕ್ಕೂ ಹೆಚ್ಚು ಸನ್ಯಾಸಿಗಳ ಸಮರ್ಪಣೆ, ಪ್ರಯತ್ನ ಮತ್ತು ಪ್ರತಿಭೆಯಾಗಿದ್ದು ಅದನ್ನು ರಚಿಸಿ ಬದುಕುತ್ತದೆ. ನಿರ್ದೇಶನಕ್ಕಿಂತ ಹೆಚ್ಚಾಗಿ, ಈ ವಿಶೇಷ ಫ್ರಾನ್ಸಿಸ್ಕನ್ ರವರ ಪ್ರಾಂತ್ಯದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾದ ಈ ಪ್ರತಿಭೆಗಳಲ್ಲಿ ಅತ್ಯುತ್ತಮವಾದದ್ದನ್ನು ಹೊರತರುವುದು ಕಸ್ಟೋಡಿಯನ್ನ ಪಾತ್ರವಾಗಿದೆ. ಕಳೆದ ಒಂಬತ್ತು ವರ್ಷಗಳಿಂದ ಧರ್ಮಗುರು ಪ್ಯಾಟನ್ ರವರು ಉತ್ತಮವಾಗಿ ತಮ್ಮ ಕಾರ್ಯನಿರ್ವಹಿಸಿದ್ದಾರೆ.
ಈ ಪ್ರತಿಭೆಗಳಲ್ಲಿ, ನಾನು ಮೊದಲು ಐವತ್ತಕ್ಕೂ ಹೆಚ್ಚು ವಿಭಿನ್ನ ರಾಷ್ಟ್ರೀಯತೆಗಳನ್ನು ಒಳಗೊಂಡಿರುವ ಕಸ್ಟಡಿಯ ಅಂತರರಾಷ್ಟ್ರೀಯ ಸ್ವರೂಪವನ್ನು ಎತ್ತಿ ತೋರಿಸುತ್ತೇನೆ. ದೈವಕರೆಗಳು ಮತ್ತು ಪ್ರತಿಭೆಗಳ ಈ ಸ್ವರಮೇಳವನ್ನು ಸಮನ್ವಯಗೊಳಿಸುವುದು ನನ್ನ ಕಾರ್ಯ. ನಂತರ, ಸುವಾರ್ತಾಬೋಧನೆಯ ಮೂಲಕ ಕ್ರಿಸ್ತರ ಅನುಸರಣೆಯಲ್ಲಿ ಸಂಪೂರ್ಣವಾಗಿ ಬೇರೂರಿರುವ ಫ್ರಾನ್ಸಿಸ್ಕನ್ನರ ವಿಶಿಷ್ಟ ಧರ್ಮಪ್ರಚಾರಕ ಮನೋಭಾವವನ್ನು ನಾನು ತೋರಿಸುತ್ತೇನೆ. ಇಲ್ಲಿ, ಅದು ಅಸಂಖ್ಯಾತ ಯಾತ್ರಿಕರನ್ನು ಸ್ವಾಗತಿಸುವಲ್ಲಿ ಮಾತ್ರವಲ್ಲದೆ ಜೆರುಸಲೇಮ್ನ ಲತೀನ್ ಪಿತೃಪ್ರಧಾನರವರು, ಜೆರುಸಲೇಮ್, ಬೆತ್ಲಹೇಮ್, ನಜರೇತ್ ಮತ್ತು ಜಾಫಾ ಸೇರಿದಂತೆ ನಮಗೆ ವಹಿಸಿಕೊಟ್ಟಿರುವ ಧರ್ಮಕೇಂದ್ರಗಳನ್ನು ನಡೆಸುವಲ್ಲಿ ಮತ್ತು ವಿಶೇಷವಾಗಿ ಪ್ರತಿ ವರ್ಷ ಸಾವಿರಾರು ವಿದ್ಯಾರ್ಥಿಗಳಿಗೆ ಶಾಂತಿಯಿಂದ ಶಿಕ್ಷಣ ನೀಡುವ ಇಸ್ರಯೇಲ್ ಮತ್ತು ಪ್ಯಾಲಸ್ತೀನಿನಲ್ಲಿನ 17 ಶಾಲೆಗಳ ಕಾರ್ಯಾಚರಣೆಯಲ್ಲಿ ಅಭಿವ್ಯಕ್ತಿಯನ್ನು ಕಂಡುಕೊಳ್ಳುತ್ತದೆ.
ನಮ್ಮ ಸಂಭಾಷಣೆಯ ಕೊನೆಯಲ್ಲಿ, ನಾವು ಬಲವಾದ ಮತ್ತು ಹೃತ್ಪೂರ್ವಕವಾದ ಅಪ್ಪುಗೆಯನ್ನು ವಿನಿಮಯ ಮಾಡಿಕೊಂಡೆವು. ನಾವೆಲ್ಲರೂ ಒಂದೇ ಶಿಲುಬೆಯ ಅಡಿಯಲ್ಲಿ ಹಂಚಿಕೊಂಡ ದುಃಖದಲ್ಲಿ ನಿಜವಾದ ಸರ್ವಕ್ರೈಸ್ತರ ಏಕತೆಗೆ ಸಂಕೇತವಾಗಿದೆ.
ನಂತರ, ನಮ್ಮ ಸನ್ಯಾಸಿಗಳು ನನ್ನ ಭೇಟಿಗಾಗಿ ವಿಶೇಷ ದೈವಾರಾಧನಾ ವಿಧಿಯನ್ನು ಆಯೋಜಿಸಿದಾಗ, ಭಯವು ಜನರನ್ನು ದೂರವಿರಿಸುತ್ತದೆ ಎಂದು ನಾನು ಭಾವಿಸಿದೆ. ಆದರೆ ಬದಲಿಗೆ, ಧರ್ಮಸಭೆಯು ತುಂಬಿತ್ತು. ಜನಾಂಗೀಯ ಅಥವಾ ರಾಜಕೀಯ ಗುರುತುಗಳಿಗಿಂತ ಕ್ರೈಸ್ತರ ಗುರುತು ಮೇಲೇರುತ್ತದೆ.
ಲೆಬನಾನ್ನಲ್ಲಿಯೂ ಸಹ, ಇಸ್ರಯೇಲ್ ಬಾಂಬ್ ದಾಳಿಯ ಸಮಯದಲ್ಲಿ ನಮ್ಮ ಸನ್ಯಾಸಿಗಳ ಮಹಾನ್ ದಾನ ಕಾರ್ಯವನ್ನು ನಾನು ಕಣ್ಣಾರೆ ಕಂಡೆ. ಅವರು ಬೈರುತ್ ಮತ್ತು ದಕ್ಷಿಣದಲ್ಲಿ ಅನೇಕ ಸ್ಥಳಾಂತರಗೊಂಡ ಕುಟುಂಬಗಳಿಗೆ ಆಶ್ರಯ ನೀಡಿದರು. ಪಶ್ಚಿಮದಲ್ಲಿ ಸನ್ಯಾಸಿಗಳ ಧೈರ್ಯ ಮತ್ತು ಧದರ್ಮಪ್ರಚಾರಕರ ಮನೋಭಾವದಿಂದ ನಾನು ತುಂಬಾ ಪ್ರಭಾವಿತನಾಗಿದ್ದೇನೆ.
ನಿಮ್ಮ ಸನ್ಯಾಸಿಗಳಿಂದ ನೀವು ಏನು ಕೇಳುತ್ತೀರಿ?
ಸರಳವಾಗಿ ಹೇಳುವುದಾದರೆ, ಅವರು ಒಳ್ಳೆಯ ಸನ್ಯಾಸಿಗಳಾಗಿರಬೇಕು. ಅವರ ಪೂರ್ವಜರಂತೆ - 800 ವರ್ಷಗಳಿಂದ ಪವಿತ್ರ ನಾಡಿನಲ್ಲಿ ಕ್ರೈಸ್ತರ ಉಪಸ್ಥಿತಿಯನ್ನು ಸಂರಕ್ಷಿಸಿ ಖಚಿತಪಡಿಸಿಕೊಂಡವರು. ತಮ್ಮ ನೆರೆಹೊರೆಯವರ ಬಗ್ಗೆ ಕಾಳಜಿಯಿಂದ, ಯಾವಾಗಲೂ ಕ್ರಿಸ್ತರ ಮೇಲೆ ದೃಷ್ಟಿ ನೆಟ್ಟಿರುತ್ತಾರೆ.
ಈ ದಿನಗಳಲ್ಲಿ ಮತ್ತು ಈ ಪ್ರಯಾಣದಲ್ಲಿ, ನನ್ನ ಮನಸ್ಸಿನಲ್ಲಿ ಉಳಿದಿರುವ ಸುವಾರ್ತೆಯ ಒಂದು ಭಾಗದಿಂದ ಪ್ರೇರಿತವಾದ ಈ ಹೊಸ ಮತ್ತು ಅನರ್ಹವಾದ ನಿಯೋಜನೆಯ ಬಗ್ಗೆ ನಾನು ಬಹಳಷ್ಟು ಯೋಚಿಸಿದ್ದೇನೆ. ಇಂದು, ಯೇಸುವಿನ ಕಾಲದಂತೆಯೇ, ಸಮುದ್ರದ ಅಲೆಗಳು ಎತ್ತರವಾಗಿರುತ್ತವೆ ಮತ್ತು ಬೆದರಿಕೆಯೊಡ್ಡುತ್ತವೆ ಹಾಗೂ ದೋಣಿಯಲ್ಲಿ ಭಯವು ಅದ್ಭುತವಾಗಿದೆ. ಆದರೆ ಶಿಷ್ಯರು ಯೇಸು ನೀರಿನ ಮೇಲೆ ನಡೆಯುವುದನ್ನು ನೋಡಿದಾಗ, ಅವರ ಭಯವು ಕಡಿಮೆಯಾಗುತ್ತದೆ. ಪೇತ್ರನು ಅವರನ್ನು ಹಿಂಬಾಲಿಸಲು ಪ್ರಯತ್ನಿಸುತ್ತಾರೆ ಆದರೆ ಮುಳುಗಲು ಪ್ರಾರಂಭಿಸುತ್ತಾನೆ. ಏಕೆ? ಏಕೆಂದರೆ ಆತನು ಯೇಸುವಿನ ಕಣ್ಣುಗಳನ್ನು ವಿಶ್ವಾಸದ ಕಣ್ಣಿಗಳಿಂದ ನೋಡುವುದನ್ನು ನಿಲ್ಲಿಸಿದುದ್ದರಿಂದ ಮುಳುಗಲು ಪ್ರಾರಂಭಿಸುತ್ತಾನೆ.
ನನಗೆ, ಅದೇ ಮುಖ್ಯ. ಮತ್ತು ಅದು ನನ್ನ ವೈಯಕ್ತಿಕ ಗುರಿ ಮತ್ತು ನಾನು ನಮ್ಮ ಸನ್ಯಾಸಿಗಳಿಗೆ ಮಾಡುವ ಪ್ರಸ್ತಾಪ ಎರಡೂ ಸಹ ಆಗಿದೆ: ಈ ಪ್ರಪಂಚದ ಚಂಚಲತೆಯ ಬಿರುಗಾಳಿಯಲ್ಲಿಯೂ ಸಹ ನಮ್ಮ ಕಣ್ಣುಗಳನ್ನು ಪ್ರಭುಯೇಸುವಿನ ಮೇಲೆ ಕೇಂದ್ರೀಕರಿಸುವ ಮೂಲಕ ಸ್ಥಿರವಾಗಿ ಮತ್ತು ನಿರ್ಭಯವಾಗಿ ಉಳಿಯುವಂತೆ ಮಾಡುವುದು.
