ಫಿಲಿಪ್ಪೀನ್ಸ್: ಬ್ಲಾಕ್ ನಜರೀನ್ ಹಬ್ಬಕ್ಕೆ ದಾಖಲೆ ಮಟ್ಟದ ಜನಸಾಗರ

ಡಿಸೆಂಬರ್ 31ರಿಂದ ಜನವರಿ 10ರವರೆಗೆ ನಡೆದ ಬ್ಲಾಕ್ ನಜರೀನ್ ಹಬ್ಬದ ಆಚರಣೆಗಾಗಿ ಫಿಲಿಪ್ಪೀನ್ಸ್ ರಾಜಧಾನಿ ಮನಿಲಾಕ್ಕೆ ಸುಮಾರು ಒಂದು ಕೋಟಿ ಜನರು ಹರಿದುಬಂದಿದ್ದಾರೆ. ಈ ಹಬ್ಬವು ದೇಶದ ಧಾರ್ಮಿಕ ಜೀವನದಲ್ಲಿ ಅತ್ಯಂತ ಮಹತ್ವದ ಸ್ಥಾನವನ್ನು ಹೊಂದಿದ್ದು, ಭಕ್ತಿಭಾವ, ತ್ಯಾಗ ಮತ್ತು ನಂಬಿಕೆಯ ಸಾರ್ವಜನಿಕ ಅಭಿವ್ಯಕ್ತಿಯಾಗಿದೆ.

ಈ ಧಾರ್ಮಿಕ ಉತ್ಸವದಲ್ಲಿ ಎರಡು ಪ್ರಮುಖ ಅಂಶಗಳಿವೆ:ಒಂದು — ನಿರಂತರವಾಗಿ ನಡೆಯುವ ನವದಿನ ಪ್ರಾರ್ಥನೆ (ನೋವೆನಾ),ಮತ್ತು ಇನ್ನೊಂದು — ದೇಶದ ಅತಿದೊಡ್ಡ ವಾರ್ಷಿಕ ಮೆರವಣಿಗೆಯಾದ “ಟ್ರಾಸ್ಲಾಸಿಯಾನ್”.ಈ ಹಬ್ಬದ ಅಂಗವಾಗಿ, ಶಿಲುಬೆಯನ್ನು ಹೊತ್ತಿರುವ ಪ್ರಭು ಯೇಸು ಕ್ರಿಸ್ತರ ಮಾನವ ಗಾತ್ರದ ಮರದ ಮೂರ್ತಿಯನ್ನು ರಾಜಧಾನಿಯ ಪ್ರಮುಖ ಬೀದಿಗಳ ಮೂಲಕ ಸಾಗಿಸಲಾಗುತ್ತದೆ. ಈ ಬಾರಿ ಸರ್ಕಾರದ ದಾಖಲೆಗಳ ಪ್ರಕಾರ, ಮೆರವಣಿಗೆ ಇತಿಹಾಸದಲ್ಲೇ ಅತಿದೊಡ್ಡದಾಗಿ ಹಾಗೂ ಅತಿದೀರ್ಘ ಕಾಲ ನಡೆದಿದ್ದು — ಸುಮಾರು 31 ಗಂಟೆಗಳ ಕಾಲ ನಿರಂತರವಾಗಿ ಮುಂದುವರಿದಿದೆ.

"ಚಲಿಸುವ" "ಹೃದಯಸ್ಪರ್ಶಿ" ಸಮಾರಂಭ

17ನೇ ಶತಮಾನಕ್ಕೆ ಸೇರಿದ ಈ ಮರದ ಮೂರ್ತಿಯು ಬೆಂಕಿ ಅವಘಡದಿಂದ ಕಪ್ಪಾಗಿರುವುದು ಇದರ ವಿಶಿಷ್ಟ ಲಕ್ಷಣ. ಆಗಸ್ಟಿನಿಯನ್ ರಿಕಲೆಕ್ಟ್ ಮಿಷನರಿಗಳು ಈ ಪವಿತ್ರ ಪ್ರತಿಮೆಯನ್ನು 1606ರಲ್ಲಿ ಮೆಕ್ಸಿಕೋದಿಂದ ಮನಿಲಾಕ್ಕೆ ತಂದಿದ್ದರು. 2006ರಲ್ಲಿ ಫಿಲಿಪ್ಪೀನ್ಸ್‌ನ ಕಥೋಲಿಕ ಸಮುದಾಯವು ಬ್ಲಾಕ್ ನಜರೀನ್ ಮೂರ್ತಿಯ ಆಗಮನದ 400ನೇ ವಾರ್ಷಿಕೋತ್ಸವವನ್ನು ಭಕ್ತಿಯಿಂದ ಆಚರಿಸಿತು.

ಪ್ರಸ್ತುತ ಈ ಮೂರ್ತಿ ಕ್ವಿಯಾಪೊ ದೇವಾಲಯದಲ್ಲಿ, ಅಂದರೆ ಬ್ಲಾಕ್ ನಜರೀನ್ ಪುಣ್ಯಕ್ಷೇತ್ರದಲ್ಲಿದ್ದು, ಇದು ಕಿರಿಯ ಬಸಿಲಿಕಾ ಸ್ಥಾನಮಾನ ಹೊಂದಿದೆ.

ಏಷ್ಯಾದಲ್ಲಿಯೇ ಅಪಾರ ಜನಸಾಗರ ಸೆಳೆಯುವ ಹಬ್ಬ

ಬ್ಲಾಕ್ ನಜರೀನ್ ಹಬ್ಬವು ಏಷ್ಯಾದ ಅತ್ಯಂತ ಜನಪ್ರಿಯ ಧಾರ್ಮಿಕ ಆಚರಣೆಗಳಲ್ಲಿ ಒಂದಾಗಿದ್ದು, ಈ ಬಾರಿ ಸುಮಾರು 96,40,290 ಭಕ್ತರು ನೋವೆನಾ ಬಲಿಪೂಜೆಗಳಲ್ಲಿ ಮತ್ತು ತ್ರಾಸ್ಲಾಸಿಯೋನ್ ಮೆರವಣಿಗೆಯಲ್ಲಿ ಭಾಗವಹಿಸಿದ್ದಾರೆ ಎಂದು ವರದಿಯಾಗಿದೆ. "ಟ್ರಾಸ್ಲಾಸಿಯಾನ್" ಎಂದರೆ ಸ್ಪ್ಯಾನಿಷ್ ಭಾಷೆಯಲ್ಲಿ "ವರ್ಗಾವಣೆ" ಎಂದರ್ಥ.

ಮೆರವಣಿಗೆ ದೇಶದ ಪ್ರಮುಖ ಸಮಾವೇಶ ಸ್ಥಳಗಳಲ್ಲಿ ಒಂದಾದ ಕ್ವಿರಿನೊ ಗ್ರ್ಯಾಂಡ್‌ಸ್ಟ್ಯಾಂಡ್ನಿಂದ ಆರಂಭಗೊಂಡು, ಕ್ವಿಯಾಪೊ ಪ್ರದೇಶದ ಮೂಲಕ ಸಾಗುತ್ತದೆ. ಈ ಯಾತ್ರೆಯು 1787ರಲ್ಲಿ ಮೂರ್ತಿಯನ್ನು ಕ್ವಿಯಾಪೊ ದೇವಾಲಯಕ್ಕೆ ಸ್ಥಳಾಂತರಿಸಿದ ಐತಿಹಾಸಿಕ ಘಟನೆಯನ್ನು ಸ್ಮರಿಸುತ್ತದೆ. ಭಾಗವಹಿಸುವ ಭಕ್ತರ ಸಂಖ್ಯೆಯ ಆಧಾರದಲ್ಲಿ ಮೆರವಣಿಗೆಯ ಅವಧಿ ಮತ್ತು ಉದ್ದ ಬದಲಾಗುತ್ತದೆ.

ಭಕ್ತರು ಸುಮಾರು ಏಳು ಕಿಲೋಮೀಟರ್ ದೂರವನ್ನು ಬರಿಗಾಲಿನಲ್ಲಿ ಸಾಗುತ್ತಾರೆ ಹಾಗೂ ಮೂರ್ತಿಯ ವಸ್ತ್ರಗಳಿಗೆ ಹೊಂದುವಂತೆ ಕೆಂಪು ಮಣ್ಣಿನ ಛಾಯೆಯ ಬಟ್ಟೆಗಳನ್ನು ಧರಿಸುತ್ತಾರೆ. ಮೆರವಣಿಗೆಯ ವೇಳೆ ಅನೇಕ ಭಕ್ತರು ಮೂರ್ತಿಯನ್ನು ಸಾಗಿಸುವ ರಥದ ಮೇಲೇರಲು ಅಥವಾ ಅದಕ್ಕೆ ಕಟ್ಟಿದ ಹಗ್ಗಗಳನ್ನು ಸ್ಪರ್ಶಿಸಲು ಪ್ರಯತ್ನಿಸುತ್ತಾರೆ — ಇದು ಅವರ ನಂಬಿಕೆ, ವ್ರತ ಮತ್ತು ಭಕ್ತಿಭಾವದ ಸ್ಪಷ್ಟ ಅಭಿವ್ಯಕ್ತಿಯಾಗಿದೆ