ಬಾರ್ಸಿಲೋನಾ: ಪೂರ್ಣಗೊಂಡ ಸಗ್ರಾದಾ ಫಮಿಲಿಯಾ ಬಸಿಲಿಕಾದ ಮಧ್ಯ ಗೋಪುರ
ವ್ಯಾಟಿಕನ್ ವರದಿ
2026 ಫೆಬ್ರವರಿ 20ರಂದು ಬಾರ್ಸಿಲೋನಾದಲ್ಲಿ ಯೇಸು ಕ್ರಿಸ್ತರ ಗೋಪುರದ ಮೇಲೆ ಶಿಲುಬೆಯ ಮೇಲ್ಭಾಗದ ಭುಜವನ್ನು ಅಳವಡಿಸುವ ಕಾರ್ಯ ನೆರವೇರಿದ ಹಿನ್ನೆಲೆಯಲ್ಲಿ, ಬಸಿಲಿಕಾದ ಅತಿ ಎತ್ತರದ ಭಾಗವಾಗಿರುವ ಪವಿತ್ರ ಕುಟುಂಬ ಬಸಿಲಿಕಾದ (ಸಗ್ರಾದಾ ಫಮಿಲಿಯಾದ) ಮಧ್ಯ ಗೋಪುರದ ಹೊರಾಂಗಣ ಕಾಮಗಾರಿಗಳು ಪೂರ್ಣಗೊಂಡಿವೆ. ರಚನೆಯ ಒಳಾಂಗಣ ನಿರ್ಮಾಣ ಕಾರ್ಯಗಳು 2027 ಮತ್ತು 2028ರವರೆಗೆ ಮುಂದುವರಿಯಲಿವೆ. 4.5 × 4.5 × 4.9 ಮೀಟರ್ ಗಾತ್ರದ ಈ ಅಂಶವು ಈಗ ಕ್ಯಾಟಲನ್ ಬಸಿಲಿಕಾದ ಅತ್ಯುನ್ನತ ಬಿಂದುವಾಗಿ ಪರಿಣಮಿಸಿದೆ. ಇದರ ಸ್ಥಾಪನೆಯೊಂದಿಗೆ ಸಗ್ರಾದಾ ಫಮಿಲಿಯಾದ ಆರು ಕೇಂದ್ರ ಗೋಪುರಗಳ ಸಮೂಹವು ಹೊರಾಂಗಣವಾಗಿ ಸಂಪೂರ್ಣಗೊಂಡಿದೆ.
“ಪವಿತ್ರ ಕುಟುಂಬದ ಪ್ರಾಯಶ್ಚಿತ್ತ ದೇವಾಲಯ” (ಸಗ್ರಾದಾ ಫಮಿಲಿಯಾದ ಎಕ್ಸ್ಪಿಯೇಟರಿ ದೇವಾಲಯ)ದ ನಾಲ್ಕನೇ ಆಲ್ಬಮ್ (1927–1929) ನಿಂದ ನೀಡಲಾದ ಉಲ್ಲೇಖ ಯೋಜನೆಯ ಸಂಕೇತಾತ್ಮಕ ದೃಷ್ಟಿಕೋನವನ್ನು ಹೀಗೆ ವ್ಯಕ್ತಪಡಿಸುತ್ತದೆ:
“ತ್ರಾನ್ಸೆಪ್ಟ್ನ ನಾಲ್ಕು ಅತಿ ಉನ್ನತ ಸ್ತಂಭಗಳ ಮೇಲಿಂದ ಏರುವ ಮಹಾ ಲ್ಯಾಂಟರ್ನ್ ಗೋಪುರವು 176 ಮೀಟರ್ ಎತ್ತರದಲ್ಲಿ ನಾಲ್ಕು ಅಲಂಕರಿತ ಭುಜಗಳನ್ನು ಹೊಂದಿದ ಅದ್ಭುತ ಶಿಲುಬೆಯಿಂದ ಅಲಂಕರಿಸಲ್ಪಟ್ಟು, ಅಲ್ಲಿಂದ ವಿಶಾಲ ದೃಶ್ಯಾವಳಿಯನ್ನು ಕಾಣಬಹುದು. ಅದರ ಮಧ್ಯಭಾಗದಲ್ಲಿ ದೈವ ಕುರಿಮರಿಯ (Agnus Dei) ಶಿಲ್ಪವನ್ನು ಸ್ಥಾಪಿಸಲಾಗುವುದು.”
ಮಧ್ಯ ಗೋಪುರ: ರಚನೆ ಮತ್ತು ವೈಶಿಷ್ಟ್ಯಗಳು
ಯೇಸು ಕ್ರಿಸ್ತರ ಗೋಪುರವು ಬಸಿಲಿಕಾದ ಗೋಪುರ ಸಮೂಹದ ಮಧ್ಯಭಾಗದಲ್ಲಿ ನಿಂತಿದೆ. ಅದನ್ನು ನಾಲ್ಕು ಸುವಾರ್ತಕರ ಗೋಪುರಗಳು ಸುತ್ತುವರೆದಿದ್ದು, ಪ್ರತಿಯೊಂದೂ ಸೇತುವೆಯ ಮೂಲಕ ಮಧ್ಯ ಗೋಪುರಕ್ಕೆ ಸಂಪರ್ಕ ಹೊಂದಿದೆ. ಜೊತೆಗೆ ದೇವಮಾತೆಯ ಗೋಪುರವು ಒಳಾಂಗಣವಾಗಿ ಯೇಸು ಕ್ರಿಸ್ತರ ಗೋಪುರಕ್ಕೆ ಸಂಪರ್ಕಿತವಾಗಿದೆ. ಗೋಪುರವು ಹನ್ನೆರಡು ಬದಿಗಳ ನೆಲಯೋಜನೆಯನ್ನು ಹೊಂದಿದ್ದು, ಒಟ್ಟು 172.5 ಮೀಟರ್ ಎತ್ತರವನ್ನು ತಲುಪಿದೆ.
ಇದು 12 ಹಂತಗಳ ಪ್ಯಾನೆಲ್ಗಳಿಂದ ನಿರ್ಮಿತವಾಗಿದ್ದು, ಅವುಗಳ ನಿರ್ಮಾಣವು 2018 ಅಕ್ಟೋಬರ್ 16ರಂದು 85 ಮೀಟರ್ ಎತ್ತರದಲ್ಲಿ ಆರಂಭವಾಯಿತು. ಕಲ್ಲು ಮತ್ತು ಉಕ್ಕಿನ ಸಂಯೋಜನೆಯ ಪೂರ್ವಸಂಕ್ಷಿಪ್ತ ಕಲ್ಲು ವ್ಯವಸ್ಥೆಯನ್ನು ಬಳಸಿ ಪ್ಯಾನೆಲ್ಗಳನ್ನು ನಿರ್ಮಿಸಲಾಯಿತು. ಈ ವಿಧಾನವು ಘಟಕಗಳನ್ನು ಸ್ಥಳದ ಹೊರಗೆ ಪೂರ್ವತಯಾರಿ ಮಾಡಿ ನಂತರ ಹಂತ ಹಂತವಾಗಿ ಸಾಗಿಸಿ ಅಳವಡಿಸಲು ಅವಕಾಶ ಮಾಡಿಕೊಟ್ಟಿತು. ಅಂತಿಮ ಪ್ಯಾನೆಲ್ 2024 ಡಿಸೆಂಬರ್ 4ರಂದು 142.5 ಮೀಟರ್ ಎತ್ತರದಲ್ಲಿ ಪೂರ್ಣಗೊಂಡಿತು.
ಗೋಪುರದ ಶಿಖರ ಭಾಗದ ಆಧಾರದ ಬಳಿ ಯೇಸು ಕ್ರಿಸ್ತರನ್ನು ಸ್ತುತಿಸುವ “Tu solus Sanctus, tu solus Dominus, tu solus Altissimus” (“ನೀನೇ ಪವಿತ್ರನು, ನೀನೇ ಕರ್ತನು, ನೀನೇ ಪರಮೋನ್ನತನು”) ಎಂಬ ಶಾಸನಗಳನ್ನು ಬಿಳಿ ಗ್ಲೇಝ್ಡ್ ಸೆರಾಮಿಕ್ ಮತ್ತು ಇಟ್ಟಿಗೆಯಲ್ಲಿ ರೂಪಿಸಲಾಗಿದ್ದು, ತಾಳೆ ಎಲೆ ವಿನ್ಯಾಸಗಳಿಂದ ಅಲಂಕರಿಸಲಾಗಿದೆ. ಈ ಶಿಖರ ಭಾಗವು 29 ಮೀಟರ್ ಎತ್ತರವಾಗಿದ್ದು, 2025 ಮೇ ತಿಂಗಳಲ್ಲಿ ಅದರ ನಿರ್ಮಾಣ ಆರಂಭವಾಯಿತು.
ಗೋಪುರವನ್ನು ನಾಲ್ಕು ಭುಜಗಳ ಮೂರು ಆಯಾಮದ ಶಿಲುಬೆ ಅಲಂಕರಿಸಿದ್ದು, ಅದು ಗಾಜು ಮತ್ತು ಬಿಳಿ ಗ್ಲೇಝ್ಡ್ ಸೆರಾಮಿಕ್ನಿಂದ ಆವೃತವಾಗಿದೆ. ಶಿಲುಬೆಯ ಎತ್ತರ 17 ಮೀಟರ್ ಮತ್ತು ಅಗಲ 13.5 ಮೀಟರ್. ಅದರ ಮೊದಲ ಅಂಶವಾದ ಕೆಳಭಾಗದ ಭುಜವನ್ನು 2025 ಅಕ್ಟೋಬರ್ 27ರಂದು 162.91 ಮೀಟರ್ ಎತ್ತರದಲ್ಲಿ ಅಳವಡಿಸಲಾಯಿತು.
ಶಿಲುಬೆಯ ಸಂಯೋಜನೆ
ಶಿಲುಬೆಯನ್ನು 2025ರಲ್ಲಿ ಜರ್ಮನಿಯಲ್ಲಿ ತಯಾರಿಸಿ, ನಂತರ ಬಹುತೇಕ ಸಂಪೂರ್ಣವಾಗಿ ಸಗ್ರಾದಾ ಫಮಿಲಿಯಾ ತಾಣದಲ್ಲೇ ಸಂಯೋಜಿಸಲಾಯಿತು. ಬಿಳಿ ಗ್ಲೇಝ್ಡ್ ಸೆರಾಮಿಕ್, ಒಳಾಂಗಣ ಕಲ್ಲಿನ ರಚನೆ ಹಾಗೂ ಬಣ್ಣದ ಗಾಜುಗಳನ್ನು ಕ್ಯಾಟಲೋನಿಯಾದ ವಿವಿಧ ಕಾರ್ಖಾನೆಗಳು ಮತ್ತು ಕಾರ್ಯಾಗಾರಗಳಲ್ಲಿ ತಯಾರಿಸಲಾಯಿತು. ಜರ್ಮನಿಯಿಂದ ಘಟಕಗಳಾಗಿ ತರಲಾದ ಶಿಲುಬೆಯನ್ನು ಕೇಂದ್ರ ನೇವ್ನಿಂದ 54 ಮೀಟರ್ ಎತ್ತರದಲ್ಲಿರುವ ಕಾರ್ಯ ವೇದಿಕೆಯಲ್ಲಿ ಪೂರ್ವಸಂಯೋಜನೆ ಮಾಡಲಾಯಿತು.
ಅಂಶಗಳನ್ನು ಏಳು ಸಂಯೋಜಿತ ಹಂತಗಳಲ್ಲಿ ಮೇಲಕ್ಕೆತ್ತಿ ಅಳವಡಿಸಲಾಯಿತು: ಕೆಳಭಾಗದ ಭುಜ, ಕೇಂದ್ರಭಾಗ, ನಾಲ್ಕು ಪಾರ್ಶ್ವ ಭುಜಗಳು ಮತ್ತು ಕೊನೆಗೆ ಮೇಲ್ಭಾಗದ ಭುಜ, ಇದನ್ನು 2026 ಫೆಬ್ರವರಿ 20ರಂದು ಅಳವಡಿಸಲಾಯಿತು. ಮೇಲ್ಭಾಗದ ಭುಜದ ಒಳಭಾಗದ ಅತಿ ಉನ್ನತ ಬಿಂದುವಿನಲ್ಲಿ ಇಟಾಲಿಯನ್ ಕಲಾವಿದ ಆಂಡ್ರಿಯಾ ಮಾಸ್ಟ್ರೋವಿಟೋ ರಚಿಸಿದ ದೈವ ಕುರಿಮರಿಯ (Agnus Dei) ಶಿಲ್ಪವನ್ನು ಸ್ಥಾಪಿಸಲಾಗುತ್ತದೆ. ಶಿಲುಬೆಯ ಮಧ್ಯಭಾಗದಲ್ಲಿ ಇರಬೇಕೆಂದು ಆಂಟೋನಿ ಗೌಡಿ ಕನಸುಗಂಡ ಕುರಿಯ ಸಂಕೇತವು ಹೀಗೆ ಶಿಲುಬೆಯ ಒಳಭಾಗದಿಂದಲೇ ಸ್ಪಷ್ಟವಾಗಿ ಗೋಚರಿಸಲಿದೆ.
ಗೌದಿಯವರ ಶತಮಾನೋತ್ಸವ
ಯೇಸು ಕ್ರಿಸ್ತರ ಗೋಪುರದ ಪೂರ್ಣತೆ, ವಾಸ್ತುಶಿಲ್ಪಿ ಅಂಥೋನಿ ಗೌದಿಯವರ ನಿಧನ ಶತಮಾನೋತ್ಸವದೊಂದಿಗೆ ಹೊಂದಿಕೆಯಾಗಿದೆ.ಇದು ಸಗ್ರಾದಾ ಫಮಿಲಿಯಾದ ಇತಿಹಾಸದಲ್ಲಿ ಮಹತ್ವದ ಮೈಲುಗಲ್ಲಾಗಿದ್ದು, ಅದರ ವಾಸ್ತುಶಿಲ್ಪಿಗೆ ಸಲ್ಲಿಸಿದ ಗೌರವಾಂಜಲಿಯಾಗಿದೆ. ಈ ಸಂದರ್ಭದಲ್ಲಿ ಸ್ಮಾರಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿದ್ದು, ವಿವರಗಳು ಅಧಿಕೃತ ಶತಮಾನೋತ್ಸವ ವೆಬ್ಸೈಟ್ನಲ್ಲಿ ಲಭ್ಯವಿರುತ್ತವೆ.
ಮುಖ್ಯ ವಾಸ್ತುಶಿಲ್ಪಿ ಜೋರ್ಡಿ ಫೌಲಿ ಅವರು ಹೇಳುವಂತೆ: “ಯೇಸು ಕ್ರಿಸ್ತರ ಗೋಪುರದ ಶಿಲುಬೆಯ ಪೂರ್ಣತೆ ಕೇವಲ ನಿರ್ಮಾಣ ಹಂತದ ಅಂತ್ಯವಲ್ಲ; ಅದು ಅಂಥೋನಿ ಗೌದಿಯವರ ಪರಂಪರೆಯ ಅಧ್ಯಯನ ಮತ್ತು ವರ್ಷಗಳ ಪರಿಶ್ರಮದ ಫಲವಾಗಿದೆ. ಜೊತೆಗೆ ಸಗ್ರಾದಾ ಫಮಿಲಿಯಾದ ಪೂರ್ಣತೆಯನ್ನು ಸಾಧ್ಯಗೊಳಿಸುವ ಭವಿಷ್ಯದತ್ತದ ಸ್ಪಷ್ಟ ಬದ್ಧತೆಯಾಗಿದೆ.”
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
