ಸಂತ ರೀಟಾ ಅವರ ಹೆಜ್ಜೆ ಗುರುತುಗಳಲ್ಲಿ: ಇಟಲಿಯಲ್ಲಿ ಧರ್ಮಸೇವೆಯಲ್ಲಿ ತೊಡಗಿರುವ ಬ್ರೆಝಿಲ್ ಮಹಿಳೆ

ಲೇಖಕರು: ಅಂದ್ರೆಸ್ಸಾ ಕೊಲ್ಲೆಟ್

ಈ ಕಥೆಯ ಆರಂಭವನ್ನು ಜೋಡಿಸುವ ಬಂಧಗಳು ಎರಡು ರಾಷ್ಟ್ರಗಳನ್ನು, ಒಂದು ಕುಟುಂಬವನ್ನು ಮತ್ತು ಕಾಶಿಯಾದ ಸಂತ ರೀಟಾ ಅವರ ಭಕ್ತಿಯನ್ನು ದಾಟಿ ಸಾಗುತ್ತವೆ. ಈ ಲೇಖನವೂ ಸಹ ಅದೇ ಬಂಧದಿಂದ ಹುಟ್ಟಿಕೊಂಡಿದೆ. ಇದನ್ನು ಬರೆದಿರುವವರು, ಸಿಸ್ಟರ್ ಮರಿಯಾ ಅಟಿಲಿಯಾ ಕೊಲ್ಲೆಟ್ ಅವರ ಎರಡನೇ ಸಂಬಂಧಿಯಾಗಿದ್ದ ದಿವಂಗತ ರೀಟಾ ಕೊಲ್ಲೆಟ್ ಅವರ ಪುತ್ರಿ. ನಾವು ಎಲ್ಲರೂ ಬ್ರೆಝಿಲ್‌ನಲ್ಲಿ ಜನಿಸಿದ್ದರೂ, ಇಂದು ನಮ್ಮಲ್ಲಿ ಇಬ್ಬರು ಇಟಲಿಯಲ್ಲಿ ವಾಸಿಸುತ್ತಿದ್ದೇವೆ. ಅಲ್ಲಿ ನಮ್ಮ ಕುಟುಂಬದ ಇತಿಹಾಸವು ತನ್ನ ಆಧ್ಯಾತ್ಮಿಕ ಪೂರ್ಣತೆಯನ್ನು ಕಂಡುಕೊಳ್ಳುತ್ತದೆ.

ತಲೆಮಾರುಗಳು ಮತ್ತು ಪ್ರದೇಶಗಳನ್ನು ದಾಟಿ ಸಾಗುವ ಈ ಪಯಣವು ಮಧ್ಯ ಇಟಲಿಯ ಉಂಬ್ರಿಯಾ ಪ್ರದೇಶಕ್ಕೆ ಕರೆದೊಯ್ಯುತ್ತದೆ. ಅಲ್ಲಿ ಕಾಶಿಯಾ ಪಟ್ಟಣದಿಂದ ಸುಮಾರು ಆರು ಕಿಲೋಮೀಟರ್ ದೂರದಲ್ಲಿರುವ ಸಣ್ಣ ಪಟ್ಟಣ ರೊಕ್ಕಾಪೊರೆನಾ. ಈ ಪಟ್ಟಣವು ಸಂತ ರೀಟಾ ಅವರ ಜೀವನದೊಂದಿಗೆ ಆಳವಾದ ಸಂಬಂಧ ಹೊಂದಿದೆ. ಇಂದು, ಇದೇ ರೊಕ್ಕಾಪೊರೆನಾದಲ್ಲಿ ಸಿಸ್ಟರ್ ಮರಿಯಾ ಅಟಿಲಿಯಾ ವಾಸಿಸುತ್ತಿದ್ದಾರೆ.

ಅಂತರರಾಷ್ಟ್ರೀಯ ಕಾನ್ಸೊಲಾತಾ ಕುಟುಂಬದ ಸದಸ್ಯೆಯಾಗಿರುವ ಅವರು, ತಮ್ಮ ದಿನಗಳನ್ನು ಅಸಾಧ್ಯ ಕಾರಣಗಳ ಸಂತರೆಂದು ಕರೆಯಲ್ಪಡುವ ಸಂತ ರೀಟಾ ಅವರ ಮಧ್ಯಸ್ಥಿಕೆಯನ್ನು ಕೋರಿ ಬರುವ ಯಾತ್ರಿಕರನ್ನು ಸ್ವಾಗತಿಸುವುದರಲ್ಲಿ ಕಳೆಯುತ್ತಾರೆ. ಸುಮಾರು ಒಂದು ವರ್ಷದ ಹಿಂದೆ ಈ ಪ್ರದೇಶಕ್ಕೆ ಬಂದ ನಂತರ, ಸಿಸ್ಟರ್ ಮರಿಯಾ ಅಟಿಲಿಯಾ ತಮ್ಮ ದೈನಂದಿನ ಜೀವನದಲ್ಲಿ ಒಂದು ವಿಶೇಷ ವೈಯಕ್ತಿಕ ಭಕ್ತಿಯನ್ನು ಸೇರಿಸಿಕೊಂಡಿದ್ದಾರೆ. ಪ್ರತಿದಿನ ಅವರು ನನ್ನ ತಾಯಿಗಾಗಿ ಪ್ರಾರ್ಥಿಸುತ್ತಾರೆ.

“ಇಲ್ಲಿಯೇ ನಾನು ನಿಮ್ಮ ತಾಯಿಗಾಗಿ ಪ್ರಾರ್ಥಿಸುತ್ತೇನೆ,” ಎಂದು ಅವರು ಹೇಳಿದರು. “ನಾನು ಇಲ್ಲಿ ಬಂದ ದಿನದಿಂದಲೇ, ಬೆಳಿಗ್ಗೆ 5:30ಕ್ಕೆ ಬಾಗಿಲು ತೆರೆಯುವಾಗ ನಿಮ್ಮ ತಾಯಿಗಾಗಿ ಪ್ರಾರ್ಥಿಸುವುದು ಸಹಜವಾಗಿಬಿಟ್ಟಿದೆ.” ಸಿಸ್ಟರ್ ಉಲ್ಲೇಖಿಸುತ್ತಿದ್ದದ್ದು ರೊಕ್ಕಾಪೊರೆನಾದ ಸಂತ ಮೊಂಟಾನೊ ದೇವಾಲಯವನ್ನು. ಇಲ್ಲಿಯೇ ಕಾಶಿಯಾದ ಸಂತ ರೀಟಾ (1381-1457) ತಮ್ಮ ನಂಬಿಕೆಯಲ್ಲಿ ಬೆಳೆದು, ಮೊದಲ ಪವಿತ್ರ ಪ್ರಸಾದ, ದೃಢೀಕರಣ ಮತ್ತು ವಿವಾಹ ಸಂಸ್ಕಾರಗಳನ್ನು ಸ್ವೀಕರಿಸಿದ್ದರು. ಈ ದೇವಾಲಯದ ಆವರಣವು ಸಂತರ ಕುಟುಂಬದವರಿಗೂ ಮತ್ತು ಪಟ್ಟಣದ ಆರಂಭಿಕ ನಿವಾಸಿಗಳಿಗೂ ಅಂತಿಮ ವಿಶ್ರಾಂತಿ ಸ್ಥಳವಾಗಿದ್ದು, ಆ ಸಮುದಾಯದ ಐತಿಹಾಸಿಕ ನೆನಪುಗಳನ್ನು ಸಂರಕ್ಷಿಸುತ್ತಿದೆ.

ಇಂದು, ಈ ದೇವಾಲಯವು ಜಗತ್ತಿನ ನಾನಾ ಭಾಗಗಳಿಂದ ಬರುವ ಯಾತ್ರಿಕರನ್ನು ಸ್ವಾಗತಿಸುತ್ತದೆ. ಅವರು ತಮ್ಮ “ಅಸಾಧ್ಯ”ವೆಂದು ಭಾವಿಸುವ ಮನವಿಗಳನ್ನು ಸಂತರ ಮಧ್ಯಸ್ಥಿಕೆಗೆ ಒಪ್ಪಿಸಿ ಪ್ರಾರ್ಥಿಸಲು ಇಲ್ಲಿ ಬರುತ್ತಾರೆ. ಈ ವಾತಾವರಣದಲ್ಲಿ, ಸಿಸ್ಟರ್ ಮಾರಿಯಾ ಅಟಿಲಿಯಾ ಆಧುನಿಕ ಭಕ್ತರು ಮತ್ತು ಸಂತ ರೀಟಾ ಅವರ ಬಾಲ್ಯ ಜೀವನದ ನಡುವೆ ಜೀವಂತ ಸೇತುವೆಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಸಂತರ ಕ್ರೈಸ್ತ ಜೀವನದ ರೂಪುಗೊಳಿಸುವಿಕೆ ರೊಕ್ಕಾಪೊರೆನಾದಲ್ಲೇ ನಡೆದಿತ್ತು.

“ಪ್ರತಿ ಭಾನುವಾರವೂ, ಸಂತ ರೀಟಾ ಸಮೂಹ ಪ್ರಾರ್ಥನೆಯಲ್ಲಿ ಭಾಗವಹಿಸಲು ಇಲ್ಲಿಗೆ ಬರುತ್ತಿದ್ದರು,” ಎಂದು ಸಿಸ್ಟರ್ ಹೇಳಿದರು. “ಇಲ್ಲಿಯೇ ಅವರು ತಮ್ಮ ಕ್ರೈಸ್ತ ಜೀವನವನ್ನು ಸಂಪೂರ್ಣವಾಗಿ ಬದುಕಿದರು. ಇಲ್ಲಿಯೇ ಅವರು ಪ್ರಾರ್ಥಿಸಲು, ಕ್ಷಮಿಸಲು ಮತ್ತು ತಮ್ಮ ಪತಿಯ ಪರಿವರ್ತನೆ ಹಾಗೂ ಕ್ಷಮೆಯ ಕೃಪೆಯನ್ನು ದೇವರಲ್ಲಿ ಬೇಡಿಕೊಳ್ಳಲು ಕಲಿತರು. ಅವರು ಸ್ಥಳೀಯ ಶಾಂತಿಗಾಗಿ ಸಹ ಪ್ರಾರ್ಥಿಸುತ್ತಿದ್ದರು. ಆ ಸಮಯದಲ್ಲಿ, ಅಧಿಕಾರಕ್ಕಾಗಿ ಹೋರಾಡುತ್ತಿದ್ದ ಎರಡು ಪ್ರತಿಸ್ಪರ್ಧಿ ಗುಂಪುಗಳಿಂದ ಪಟ್ಟಣವು ಚೂರಾಗಿತ್ತು; ಆ ವೈಷಮ್ಯವು ರಕ್ತಪಾತದವರೆಗೂ ತಲುಪಿತ್ತು.”

ರೊಕ್ಕಾಪೊರೆನಾಕ್ಕೆ ಆಧ್ಯಾತ್ಮಿಕ ಮತ್ತು ಭೌಗೋಳಿಕ ಪಯಣ

ಇಂದು, ರೊಕ್ಕಾಪೊರೆನಾದ ಬೀದಿಗಳಲ್ಲಿ ನಡೆಯುತ್ತಾ, ಈ ಬ್ರೆಝಿಲಿಯನ್ ಧಾರ್ಮಿಕ ಸಹೋದರಿ ಸಂತ ರೀಟಾ ಅವರ ಪರಂಪರೆಯನ್ನು ಜೀವಂತವಾಗಿಡಲು ಪ್ರಯತ್ನಿಸುತ್ತಿದ್ದಾರೆ. ದುಃಖ ಮತ್ತು ಕ್ಷಮೆಯ ಕಥೆಯನ್ನು ಯಾತ್ರಿಕರಿಗೆ ಸ್ಪರ್ಶಿಸಬಹುದಾದ ಅನುಭವವನ್ನಾಗಿ ರೂಪಿಸುತ್ತಿದ್ದಾರೆ. ರೀಟಾ ಜನಿಸಿದ ಮನೆಯಲ್ಲಿ, ಯಾತ್ರಿಕರು ಅವರ ಬಾಲ್ಯ ಮತ್ತು ಸರಳ ಜೀವನದ ನೋಟವನ್ನು ಕಾಣಬಹುದು. ಉದಾಹರಣೆಗೆ, ಅವರು ಜನಿಸಿದ ಸಣ್ಣ ಕೊಠಡಿ ಮತ್ತು ಚಳಿಗಾಲದಲ್ಲಿ ಬಳಸುತ್ತಿದ್ದ ಹೊದಿಕೆಯನ್ನು ನೋಡಬಹುದು. ಸ್ಥಳೀಯ ತಾಪಮಾನವು ಶೂನ್ಯಕ್ಕಿಂತ 20 ಡಿಗ್ರಿ ಕಡಿಮೆಯಾಗುತ್ತಿದ್ದ ಕಾಲದಲ್ಲಿ ಆ ಹೊದಿಕೆಯನ್ನು ಅವರು ಉಪಯೋಗಿಸುತ್ತಿದ್ದರು. ಮೂಲ ಹೊದಿಕೆ ಕಾಲಕ್ರಮೇಣ ಹಾಳಾದರೂ, ಅದರ ಚರ್ಮದ ತುಂಡುಗಳನ್ನು ಆಧರಿಸಿ ಅದನ್ನು ನಿಷ್ಠೆಯಿಂದ ಮರುನಿರ್ಮಿಸಲಾಗಿದೆ.

ಸಿಸ್ಟರ್ ಮರಿಯಾ ಅಟಿಲಿಯಾ, ರೀಟಾ ಅವರು ಪತ್ನಿಯಾಗಿ, ತಾಯಿಯಾಗಿ ಮತ್ತು ವಿಧವೆಯಾಗಿ ಬದುಕಿದ ನಂತರ ಆಶ್ರಮ ಪ್ರವೇಶಿಸುವ ಮೊದಲು ವಾಸಿಸಿದ್ದ ಮನೆಯನ್ನು ಸಹ ಯಾತ್ರಿಕರಿಗೆ ತೋರಿಸುತ್ತಾರೆ. ಅಲ್ಲಿ ಅವರು ಕುಟುಂಬದ ಜೀವನಶೈಲಿ ಮತ್ತು ಅವರು ಅನುಭವಿಸಿದ ಆಳವಾದ ದುಃಖವನ್ನು ವಿವರಿಸುತ್ತಾರೆ. ಅಲ್ಲಿಂದ ಸಂತರು “ಪ್ರಾರ್ಥನೆಯ ಬಂಡೆ”ಯ ಬಳಿ ಪ್ರಾರ್ಥಿಸಲು ಪರ್ವತ ಏರುತ್ತಿದ್ದರು. ಇಂದಿಗೂ ಯಾತ್ರಿಕರು 314 ಮೆಟ್ಟಿಲುಗಳನ್ನು ಏರಿ, ಸಮುದ್ರಮಟ್ಟದಿಂದ 827 ಮೀಟರ್ ಎತ್ತರದಲ್ಲಿರುವ ಆ ಸ್ಥಳಕ್ಕೆ ಭೇಟಿ ನೀಡುತ್ತಾರೆ. “ತಮ್ಮ ಪತಿಯ ಪರಿವರ್ತನೆಗಾಗಿ ಅವರು ಆಳವಾಗಿ ಪ್ರಾರ್ಥಿಸುತ್ತಿದ್ದರು. ಅವರ ಪತಿ ಕುಖ್ಯಾತ ಅಪರಾಧಿಯಾಗಿದ್ದರು,” ಎಂದು ಸಿಸ್ಟರ್ ವಿವರಿಸಿದರು.“ರೀಟಾ ತಮ್ಮ ಮನೆಯಿಂದ ಹೊರಟು ಪರ್ವತ ಏರಿ, ದೊಡ್ಡ ಬಿಳಿ ಕಲ್ಲಿನ ಬಳಿಗೆ ಹೋಗುತ್ತಿದ್ದರು. ಅದು ಕೇವಲ ಅವರಿಗಷ್ಟೇ ಅಲ್ಲ, ಅನೇಕ ಯಾತ್ರಿಕರಿಗೂ ಪ್ರಾರ್ಥನೆಯ ಸ್ಥಳವಾಗಿತ್ತು. ಆಗಲೂ ಅದು ವಿಶ್ರಾಂತಿ ಮತ್ತು ಧ್ಯಾನದ ತಾಣವಾಗಿತ್ತು.”

ಇಂದು, ಆ ಕುಟುಂಬದ ಮನೆ “ಪ್ರಾರ್ಥನೆಯ ಮನೆ”ಯಾಗಿ ಮಾರ್ಪಟ್ಟಿದೆ. ಸಾರ್ವಜನಿಕರಿಗೆ ತೆರೆದಿರುವ ಆ ಪ್ರಾರ್ಥನಾ ಮಂದಿರದಲ್ಲಿ ಮದುವೆಗೆ ಸಿದ್ಧರಾಗಿರುವ ಯುವ ದಂಪತಿಗಳು ಆಗಾಗ್ಗೆ ಸೇರಿಕೊಳ್ಳುತ್ತಾರೆ ಎಂದು ಸಿಸ್ಟರ್ ವಿವರಿಸಿದರು.

“ಆಸಕ್ತಿದಾಯಕ ವಿಷಯವೆಂದರೆ, ಇಂದಿಗೂ ಈ ಮನೆ ಮದುವೆಯ ಮುನ್ನದ ರಾತ್ರಿ ಪ್ರಾರ್ಥನೆಯಲ್ಲಿ ಕಳೆಯಲು ಬರುವ ಯುವಜನರನ್ನು ಸ್ವಾಗತಿಸುತ್ತದೆ,” ಎಂದು ಅವರು ಹೇಳಿದರು. “ನನಗೆ ಇದು ಅತ್ಯಂತ ಆಳವಾದ ಅನುಭವ. ನಾನು ಯಾವಾಗಲೂ ರೀಟಾ ಅವರನ್ನು ಇಲ್ಲಿ ತಮ್ಮ ಮಕ್ಕಳೊಂದಿಗೆ ಕಲ್ಪಿಸಿಕೊಳ್ಳುತ್ತೇನೆ; ಅದೇ ಸಮಯದಲ್ಲಿ ಅವರ ಪತಿ ಅಪರಾಧದ ಯೋಜನೆ ರೂಪಿಸುತ್ತಿದ್ದರು. ಆದರೆ ಅವರು ದೇವರು ಅವರ ಹೃದಯವನ್ನು ಸ್ಪರ್ಶಿಸಲಿ ಎಂದು ಪ್ರಾರ್ಥಿಸುತ್ತಿದ್ದರು. ಅಥವಾ, ತಮ್ಮ ಮಕ್ಕಳಿಗೆ ಅತ್ಯುತ್ತಮವಾದುದನ್ನೇ ಬಯಸಿದ ತಾಯಿಯ ಪ್ರೀತಿಯಿಂದ ಅವರನ್ನು ಬೆಳೆಸುತ್ತಿದ್ದರು ಎಂದು ನಾನು ಯೋಚಿಸುತ್ತೇನೆ. ತಮ್ಮ ಪತಿಯಲ್ಲಿ ಕಾಣದ ಮೌಲ್ಯಗಳನ್ನು ಅವರು ಮಕ್ಕಳಿಗೆ ಬೋಧಿಸುತ್ತಿದ್ದರು. ಅವರು ಚಳಿಗಾಲದಲ್ಲಿ ಪರ್ವತ ಏರಿದರೋ ಇಲ್ಲವೋ ನಮಗೆ ತಿಳಿದಿಲ್ಲ, ಆದರೆ ಅವರು ಹಗಲಿನಲ್ಲಿ ಖಂಡಿತವಾಗಿಯೂ ಹೋಗುತ್ತಿದ್ದರು, ಏಕೆಂದರೆ ರಾತ್ರಿ ಹೋಗುವುದು ಅಸಾಧ್ಯವಾಗುತ್ತಿತ್ತು. ಅಲ್ಲಿ ಮೇಲ್ಭಾಗದಲ್ಲಿ ಅವರು ದೇವರಿಗೆ ಇನ್ನಷ್ಟು ಹತ್ತಿರವಾಗಿರುವ ಅನುಭವ ಪಡೆಯುತ್ತಿದ್ದರು. ಅವರು ನಿಜವಾಗಿಯೂ ಮಹಾನ್ ಮಹಿಳೆ, ಅತ್ಯಂತ ವಿಶಿಷ್ಟ ಸಂತೆ.”

ಈ ಸಣ್ಣ ಉಂಬ್ರಿಯನ್ ಪಟ್ಟಣಕ್ಕೆ ಭೇಟಿ ನೀಡುವುದರಲ್ಲಿ, ಅದರ ಪರಂಪರೆಯ ಕಲ್ಲಿನ ಮನೆಗಳು ಮತ್ತು ಆಲ್ಪೈನ್ ದೃಶ್ಯಾವಳಿಗಳ ಜೊತೆಗೆ, “ಲಾಜರೆಟ್ಟೊ” ಸಹ ಸೇರಿದೆ. ಅದು ರೋಗಿಗಳತ್ತ ರೀಟಾ ತೋರಿದ ಕರುಣೆಯನ್ನು ನೆನಪಿಸುತ್ತದೆ. ಮಧ್ಯ ಚಳಿಗಾಲದಲ್ಲಿ ಅರಳಿದ ಗುಲಾಬಿ ಮತ್ತು ಅಂಜೂರದ ಹಣ್ಣಿನ ಅದ್ಭುತಕ್ಕಾಗಿ ಪ್ರಸಿದ್ಧವಾದ “ಮಿರಾಕಲ್ ಆರ್ಚರ್ಡ್” ಮತ್ತು ರೊಕ್ಕಾಪೊರೆನಾದ ಆಧ್ಯಾತ್ಮಿಕ ಕೇಂದ್ರವಾಗಿರುವ ಸಂತ ರೀಟಾ ಅವರ ಆಗಸ್ಟಿನಿಯನ್ ಧಾಮವೂ ಇಲ್ಲಿ ಸೇರಿವೆ.

ಪ್ರಾರ್ಥನೆ ಮತ್ತು ಕ್ಷಮೆಯ ಪರಂಪರೆ

ಸಿಸ್ಟರ್ ಮರಿಯಾ ಅಟಿಲಿಯಾ ಅವರೊಂದಿಗೆ, ಯಾತ್ರಿಕರು ಕೇವಲ ರೊಕ್ಕಾಪೊರೆನಾಕ್ಕೆ ಭೇಟಿ ನೀಡುವುದಲ್ಲ; ಅವರು ಸಂತ ರೀಟಾ ಅವರ ಜೀವನವನ್ನು ಮತ್ತು ಅವರನ್ನು ಮಾರ್ಗದರ್ಶಿಸಿದ ಮೌಲ್ಯಗಳನ್ನು ಅನುಭವಿಸುತ್ತಾರೆ-ದೇವರ ಮಹಿಮೆಯನ್ನು ಅರಿಯುವ ಮಾರ್ಗವಾಗಿ ಪ್ರಾರ್ಥನೆ ಮತ್ತು ಕ್ಷಮೆ. “ಸಂತ ರೀಟಾ ಅವರ ಜೀವನ ಅತ್ಯಂತ ಮನಮುಟ್ಟುವಂತದ್ದು. ಅವರು ಶಿಲುಬೆಗೆ ಹತ್ತಿರವಾದ ಪ್ರಾರ್ಥನಾ ಜೀವನವನ್ನು ನಡೆಸಿದರು,” ಎಂದು ಸಿಸ್ಟರ್ ವಿವರಿಸಿದರು. ಇದರಿಂದ ಸಂತರ ಕಾರ್ಯಗಳ ಆಳವಾದ ಮೂಲವನ್ನು ಅವರು ಬಿಚ್ಚಿಟ್ಟರು.

ಪ್ರಾರ್ಥನೆಯ ಈ ಮಹಿಳೆಯಲ್ಲಿ, ಬ್ರೆಝಿಲಿಯನ್ ಧರ್ಮಪ್ರಚಾರಕ ಸಹೋದರಿ ತಮ್ಮದೇ ಜೀವನದ ಪ್ರತಿಬಿಂಬವನ್ನು ಕಂಡರು. ರೊಕ್ಕಾಪೊರೆನಾದಲ್ಲಿ ಯಾತ್ರಿಕರಿಗೆ ಮಾರ್ಗದರ್ಶನ ನೀಡುವುದಕ್ಕೂ ಬಹಳ ಮುಂಚೆ, ಅವರು ಬೇರೆ ಬೇರೆ ಧರ್ಮಪ್ರಚಾರದ ದಾರಿಗಳಲ್ಲಿ ನಡೆದು, ಭೌಗೋಳಿಕ ಮತ್ತು ಸಾಂಸ್ಕೃತಿಕ ಗಡಿಗಳನ್ನು ದಾಟಿದ್ದರು.

ಅವರು ಬ್ರೆಝಿಲ್, ಇಟಲಿ, ಪೋರ್ಟುಗಲ್, ಸ್ಪೇನ್ ಮತ್ತು ಮೊಜಾಂಬಿಕ್ ದೇಶಗಳಲ್ಲಿ ಸೇವೆ ಸಲ್ಲಿಸಿದರು. ಆಫ್ರಿಕಾ ಖಂಡದ ಮೊಜಾಂಬಿಕ್ ರಾಷ್ಟ್ರದಲ್ಲಿ — ಕಾಬೊ ಡೆಲ್ಗಾಡೊ ಪ್ರಾಂತ್ಯದ ಪೆಂಬಾ ಮತ್ತು ಮಾಪುಟೊ ನಗರಗಳಲ್ಲಿ — ಅವರು 15 ವರ್ಷಕ್ಕಿಂತ ಹೆಚ್ಚು ಕಾಲ ಕಳೆದರು. ಇಂದು, 81ನೇ ವಯಸ್ಸಿನಲ್ಲಿ, ಯಾತ್ರಿಕರನ್ನು ಸ್ವಾಗತಿಸುವ ತಮ್ಮ ಸೇವೆಗೆ ಮತ್ತು ಅವರ ಪ್ರಾರ್ಥನೆಗಳು ಹಾಗೂ ಕೃತಜ್ಞತೆಗಳನ್ನು ಆಲಿಸುವ ಕಾರ್ಯಕ್ಕೆ ಅವರು ಆ ಶ್ರೀಮಂತ ಅನುಭವವನ್ನು ತರುತ್ತಿದ್ದಾರೆ.

“ನಾನು ಇಲ್ಲಿಗೆ ಬರಲು ಸಿದ್ಧಳಿದ್ದೇನಾ ಎಂದು ಅವರು ನನ್ನನ್ನು ಕೇಳಿದರು. ನಾನು ಎಂದಿಗೂ ನನ್ನ ಸೇವಾ ಸ್ಥಳಗಳನ್ನು ಸ್ವತಃ ಆಯ್ಕೆ ಮಾಡಿಲ್ಲ,” ಎಂದು ಅವರು ಹೇಳಿದರು. “ಮತ್ತು ಇಂದು, ನಾನು ನಿಜವಾಗಿಯೂ ಸಂತೋಷವಾಗಿದ್ದೇನೆ. ನನ್ನನ್ನು ಭೇಟಿಯಾಗುವ ಜನರು, ನಾನು ಸಂತೋಷವನ್ನು ಹರಡುತ್ತೇನೆ ಎಂದು ಹೇಳುತ್ತಾರೆ. ಆದ್ದರಿಂದ ನಾನು ದೇವರಿಗೆ ಕೃತಜ್ಞತೆ ಸಲ್ಲಿಸಬೇಕು. ಇದು ನನಗೆ ಒಂದು ಆಶೀರ್ವಾದ, ಆದರೆ ಇಲ್ಲಿಗೆ ಬರುವ ಪ್ರತಿಯೊಬ್ಬ ಯಾತ್ರಿಕನಿಗೂ ಸಹ ಆಶೀರ್ವಾದವಾಗಿದೆ, ಏಕೆಂದರೆ ಅವರು ಒಳಗಿನ ಶಾಂತಿ ಮತ್ತು ಜೀವನದ ಬಗ್ಗೆ ಹೊಸ ದೃಷ್ಟಿಕೋನದೊಂದಿಗೆ ಇಲ್ಲಿಂದ ಹೊರಡುತ್ತಾರೆ.”

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).