ಜಗದ್ಗುರುಗಳ ಪ್ರತಿಷ್ಠಾನ ಧರ್ಮಸಭೆ ಯೋಜನೆಗಳಿಗೆ ದಾಖಲೆಯ ಅನುದಾನ ಘೋಷಣೆ

ವ್ಯಾಟಿಕನ್ ವರದಿ

ಶನಿವಾರ ಬಿಡುಗಡೆ ಮಾಡಿದ ಪ್ರಕಟಣೆಯಲ್ಲಿ, ಈ ಅನುದಾನಗಳು 75 ದೇಶಗಳಲ್ಲಿ 144ಕ್ಕೂ ಹೆಚ್ಚು ಯೋಜನೆಗಳಿಗೆ ನೆರವಾಗಲಿದ್ದು, ಜಾಗತಿಕ ಮಟ್ಟದಲ್ಲಿ ದಾಖಲೆಯ ಪರಿಣಾಮವನ್ನು ಉಂಟುಮಾಡಲಿವೆ ಎಂದು ತಿಳಿಸಿದೆ. ವ್ಯಾಟಿಕನ್ ಗುರುತಿಸಿದ ಅಗತ್ಯಗಳಿಗೆ ಅನುಗುಣವಾಗಿ, ಈ ಅನುದಾನಗಳು ಮೂಲಸೌಕರ್ಯ, ಕಾರ್ಯಕ್ರಮಗಳು ಮತ್ತು ಮಾನವೀಯ ನೆರವು ಕಾರ್ಯಗಳಿಗೆ ಬಳಸಲಾಗುತ್ತವೆ—ವಿಶೇಷವಾಗಿ ವಿಶ್ವದ ಅತೀ ಅಗತ್ಯವಿರುವ ಸಮುದಾಯಗಳ ಮೇಲೆ ಗಮನ ಹರಿಸಲಾಗಿದೆ.

2026ರ ಅನುದಾನಗಳು ಬಡವರು ಮತ್ತು ಧರ್ಮಸಭೆಗೆ ಸೇವೆ ಸಲ್ಲಿಸುವ ವಿವಿಧ ಯೋಜನೆಗಳಿಗೆ ನೆರವಾಗಲಿವೆ. ಇದರಲ್ಲಿ ಅನೇಕ ದೇಶಗಳಲ್ಲಿ ಕಥೋಲಿಕ ಶಾಲೆಗಳು, ತರಗತಿ ಕೊಠಡಿಗಳು, ಮಠಗಳು, ಅನಾಥಾಶ್ರಮಗಳು ಮತ್ತು   ಕ್ಲಿನಿಕ್‌ಗಳ ನಿರ್ಮಾಣ ಮತ್ತು ನವೀಕರಣ ಕಾರ್ಯಗಳು ಸೇರಿವೆ.

ಇತರೆ ಯೋಜನೆಗಳಲ್ಲಿ ತಾಂಜನಿಯಾದಲ್ಲಿ ಬಾಲಕಿಯರನ್ನು ಬಾಲ ವಿವಾಹ, ಮಾನವ ಕಳ್ಳಸಾಗಣೆ ಮತ್ತು ಲೈಂಗಿಕ ದೌರ್ಜನ್ಯದಿಂದ ರಕ್ಷಿಸಲು ಹಾಗೂ ಬಾಲಕರನ್ನು ಶಾಲೆಯನ್ನು ಬಿಟ್ಟುಹೋಗುವುದನ್ನು ತಡೆಯಲು ವಸತಿ ಗೃಹ ನಿರ್ಮಾಣ; ಭಾರತದಲ್ಲಿ ಅಂಚಿನ ಜನಾಂಗದ ಮಕ್ಕಳಿಗಾಗಿ ಸುರಕ್ಷಿತ ಶಾಲೆ; ಮಧ್ಯ ಆಫ್ರಿಕಾ ಗಣರಾಜ್ಯದಲ್ಲಿ ಗ್ರಂಥಾಲಯ ಮತ್ತು ತಂತ್ರಜ್ಞಾನ ಕೇಂದ್ರ; ಫಿಲಿಪೈನ್ಸ್‌ನಲ್ಲಿ ದುರ್ಬಲ ಮಹಿಳೆಯರಿಗೆ ವೃತ್ತಿಪರ ಐಟಿ ತರಬೇತಿ; ಮತ್ತು ಗಿನಿಯಾ ಗಣರಾಜ್ಯದಲ್ಲಿ ಬಾವಿ ಹಾಗೂ ನೀರಿನ ಗೋಪುರ ನಿರ್ಮಾಣ ಸೇರಿವೆ. ವಾರ್ಡ್ ಫಿಟ್ಜ್‌ಗೆರಾಲ್ಡ್ ಅವರು, ಈ ಅನುದಾನಗಳು ಪ್ರತಿಷ್ಠಾನದ ಧ್ಯೇಯದ ಹೃದಯವಾಗಿವೆ ಎಂದು ತಿಳಿಸಿದ್ದಾರೆ.

ಈ ಯೋಜನೆಗಳು ತುರ್ತು ಅಗತ್ಯಗಳಿಗೆ ಪ್ರತಿಕ್ರಿಯಿಸುವುದರ ಜೊತೆಗೆ ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಕಥೋಲಿಕ ಸಮುದಾಯಗಳನ್ನು ಬಲಪಡಿಸುವ “ಭರವಸೆ”ಯ ಸಂಕೇತವಾಗಿವೆ ಎಂದು ಅವರು ವಿವರಿಸಿದರು. ಈ ಅನುದಾನಗಳನ್ನು ಪ್ರತಿಷ್ಠಾನದ ಮಂಜೂರು ಸಮಿತಿಯ ಪರಿಶೀಲನೆಯ ನಂತರ ಮಂಜೂರು ಮಾಡಲಾಗಿದ್ದು, ಈ ಸಮಿತಿಗೆ ಫಿಲೆಡೆಲ್ಫಿಯಾದ ಮಹಾಧರ್ಮಾಧ್ಯಕ್ಷರಾದ ಡಾ ಟಾಮಿ ತೇನಾಗ್ಲಿಯಾ ಅವರು ಅಧ್ಯಕ್ಷತೆ ವಹಿಸಿದ್ದರು. ಸಮಿತಿಯು 2025ರ ಶರತ್ಕಾಲದಲ್ಲಿ ವ್ಯಾಟಿಕನ್ ಸಲ್ಲಿಸಿದ ವಿನಂತಿಗಳನ್ನು ಪರಿಶೀಲಿಸಿ, ಪ್ರತಿಷ್ಠಾನದ ಸೇವಾ ನಿಧಿಯ ಸಮಿತಿಯ ಬೆಂಬಲದೊಂದಿಗೆ 144 ಅನುದಾನಗಳನ್ನು ಮಂಜೂರಿಗೆ ಶಿಫಾರಸು ಮಾಡಿತು.

ಟ್ರಸ್ಟಿಗಳ ಮಂಡಳಿಯು ಒಟ್ಟು 1.5 ಕೋಟಿ ಡಾಲರ್ ಗಿಂತ ಹೆಚ್ಚು ಅನುದಾನಗಳನ್ನು ಅನುಮೋದಿಸಿದ್ದು, ಇದರಲ್ಲಿ 1.25ಕೋಟಿ ಡಾಲರ್ ಪ್ರಸ್ತುತ ಅನುದಾನಗಳು ಹಾಗೂ 2026ರ ಅಂತ್ಯದೊಳಗೆ ಪ್ರತಿಷ್ಠಾನ ಮತ್ತು ಅದರ ಸಹಭಾಗಿಗಳ ಮೂಲಕ ವಿತರಿಸಲಿರುವ ಹೆಚ್ಚುವರಿ $3 ಮಿಲಿಯನ್ ಸೇರಿವೆ.

ಪ್ರತಿಷ್ಠಾನ ತನ್ನ “ಸಂತ ಪೇತ್ರರ ಉಸ್ತುವಾರಿ” ಗಳ ಸದಸ್ಯತ್ವದಲ್ಲಿಯೂ ನಿರಂತರ ಬೆಳವಣಿಗೆಯನ್ನು ದಾಖಲಿಸಿದ್ದು, ಪೂಜ್ಯ ಜಗದ್ಗುರುಗಳಾದ 14ನೆ ಲಿಯೋ ಅವರ ಆಯ್ಕೆಯ ನಂತರ 25 ಹೊಸ ಕುಟುಂಬಗಳು ಸೇರಿವೆ ಎಂದು ತಿಳಿಸಿದೆ. ವಾರ್ಷಿಕ ರೋಮ್ ಯಾತ್ರೆಯಲ್ಲಿ ಒಟ್ಟು 56 “ಉಸ್ತುವಾರಿ” ಕುಟುಂಬಗಳು ಭಾಗವಹಿಸಿವೆ.

ಈ ಯಾತ್ರೆ—ಪೂಜ್ಯ ಜಗದ್ಗುರುಗಳಾದ 14ನೆ ಲಿಯೋ  ಅವರ ಆಯ್ಕೆಯ ನಂತರದ ಮೊದಲ ಯಾತ್ರೆ—ಸಂತ ಪೇತ್ರರ ಬಸಿಲಿಕಾ, ಲ್ಯಾಟೆರನ್ ಅರಮನೆ, ಸಂತ ಥಾಮಸ್ ಅಕ್ವಿನಾಸ್‌ ಪಾಂಟಿಫಿಕಲ್ ವಿಶ್ವವಿದ್ಯಾಲಯ ಭೇಟಿಗಳನ್ನು, ಸಂತ ಮರಿಯ ಹಿರಿಯ ಬಸಿಲಿಕಾದಲ್ಲಿ ದೀಪ ಬೆಳಕಿನ ಜಪಸರ ಪ್ರಾರ್ಥನೆ ಹಾಗೂ ಪೂಜ್ಯ ಜಗದ್ಗುರುಗಳೊಂದಿಗೆ ಭೇಟಿಯನ್ನು ಒಳಗೊಂಡಿದೆ.

ಡೇವಿಡ್ ಸಾವಾಗಾ ಅವರು, ಪ್ರತಿಷ್ಠಾನದ ಬೆಳವಣಿಗೆ “ಸೇವೆ ಮಾಡಲು, ನೀಡಲು ಮತ್ತು ಧರ್ಮಸಭೆಯ ಧ್ಯೇಯವನ್ನು ವಿಶ್ವದಾದ್ಯಂತ ಅರ್ಥಪೂರ್ಣವಾಗಿ ಜೀವಂತಗೊಳಿಸಲು” ಇರುವ ಸಾಮೂಹಿಕ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಹೇಳಿದರು.

1988ರಲ್ಲಿ ಸ್ಥಾಪನೆಯಾದ ನಂತರದಿಂದ, ಜಗದ್ಗುರುಗಳ ಪ್ರತಿಷ್ಠಾನ ಪೂಜ್ಯ ಜಗದ್ಗುರುಗಳಾದ 14ನೆ ಲಿಯೋ, ಪೂಜ್ಯ ಜಗದ್ಗುರುಗಳಾದ ಫ್ರಾನ್ಸಿಸ್ , ಪೂಜ್ಯ ಜಗದ್ಗುರುಗಳಾದ 16ನೆ ಬೆನೆಡಿಕ್ಟ್ ಮತ್ತು ಪೂಜ್ಯ ಜಗದ್ಗುರುಗಳಾದ ದ್ವಿತೀಯ ಜಾನ್ ಪಾಲ್ ಆಯ್ಕೆ ಮಾಡಿದ 2,700ಕ್ಕೂ ಹೆಚ್ಚು ಯೋಜನೆಗಳಿಗೆ 27 ಕೋಟಿ ಡಾಲರ್ ಗಿಂತ ಹೆಚ್ಚು ಅನುದಾನ, ವಿದ್ಯಾರ್ಥಿವೇತನ ಮತ್ತು ಮಾನವೀಯ ನೆರವನ್ನು ವಿತರಿಸಿದೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).