ಮೊಜಾಂಬಿಕ್ ಧರ್ಮಾಧ್ಯಕ್ಷರು: ಧರ್ಮಾಧ್ಯಕ್ಷ ಒಸೋರಿಯೊ ಅವರ ಮರಣವು ನವೀಕರಣದ ಮಾರ್ಗವಾಗುವುದು
ಲೇಖಕರು: ವಂ.ಗುರು ಬರ್ನಾರ್ಡೊ ಸುವಾಟೆ
ಮೊಜಾಂಬಿಕ್ನ ಧರ್ಮಾಧ್ಯಕ್ಷರು, ಪೂಜ್ಯ ಜಗದ್ಗುರುಗಳ ಸಮೀಪತೆ ಮತ್ತು ಐಕ್ಯತೆಯು ಅವರು ಸಾರ್ವಜನಿಕವಾಗಿ ಬರೆದಿರುವುದರಲ್ಲಿ ಮತ್ತು ಹೇಳಿರುವುದರಲ್ಲಿ ಮಾತ್ರವಲ್ಲ, ಅವರೊಂದಿಗೆ ಹಂಚಿಕೊಂಡ ಭೇಟಿಯಲ್ಲಿಯೂ ಸ್ಪಷ್ಟವಾಗಿ ವ್ಯಕ್ತವಾಗಿದೆ ಎಂದು ಹೇಳಿದರು. "ನಮ್ಮ ಭೇಟಿಯ ಸಂದರ್ಭದಲ್ಲಿ, ಮೊಜಾಂಬಿಕ್ನಲ್ಲಿ ನಾವು ಎದುರಿಸುತ್ತಿರುವ ವಾಸ್ತವ ಸ್ಥಿತಿಯ ಬಗ್ಗೆ ಅವರಿಗೆ ಎಷ್ಟೊಂದು ಸಮಗ್ರ ಮಾಹಿತಿ ಇದೆ ಎಂಬುದನ್ನು ನಾವು ಅರಿತುಕೊಂಡೆವು," ಎಂದು ಧರ್ಮಾಧ್ಯಕ್ಷರು ಹೇಳಿದರು.
ಜೂನ್ 6ರ ಬೆಳಿಗ್ಗೆ ಧರ್ಮಾಧ್ಯಕ್ಷ ಒಸೋರಿಯೊ ಅವರ ಹತ್ಯೆಯ ಸುದ್ದಿ ಹೊರಬಂದಾಗಿನಿಂದ, ಮೊಜಾಂಬಿಕ್ ಧರ್ಮಸಭೆ ಈ ದುರಂತವನ್ನು ತೀವ್ರ ದುಃಖ ಮತ್ತು ಕಳವಳದೊಂದಿಗೆ ಅನುಭವಿಸುತ್ತಿದೆ. ಈ ಪರಿಸ್ಥಿತಿಯನ್ನು ಅನುಸರಿಸಲು ಧರ್ಮಾಧ್ಯಕ್ಷರ ಸಮ್ಮೇಳನವು ಆಲ್ಟೊ ಮೊಲೊಕುವೆಯ ಧರ್ಮಾಧ್ಯಕ್ಷ ಎಸ್ತೇವಾಂ ಆಂಜೆಲೊ ಫೆರ್ನಾಂಡೊ ಅವರನ್ನು ಕ್ವೆಲಿಮಾನೆ ಧರ್ಮಪ್ರಾಂತ್ಯದ ಪ್ರತಿನಿಧಿಯಾಗಿ ನೇಮಿಸಿದೆ.
ಇನ್ನೂ ಉತ್ತರ ಸಿಗದ ಅನೇಕ ಪ್ರಶ್ನೆಗಳು
ಧರ್ಮಾಧ್ಯಕ್ಷರ ಸಮ್ಮೇಳನದ ಅಧ್ಯಕ್ಷರಾದ ಡೊಂ ಇನಾಸಿಯೊ ಸಾವ್ರೆ ಅವರ ಪ್ರಕಾರ, ಅಧಿಕೃತವಾಗಿ ಧರ್ಮಾಧ್ಯಕ್ಷರ ಮರಣದ ಸಂದರ್ಭಗಳ ಕುರಿತು ಇನ್ನೂ ಬಹಳ ಕಡಿಮೆ ಮಾಹಿತಿ ಮಾತ್ರ ಲಭ್ಯವಾಗಿದೆ. "ಸಾರ್ವಜನಿಕವಾಗಿ ಬಹಿರಂಗಗೊಂಡಿರುವ ಏಕೈಕ ಮಾಹಿತಿ ಎಂದರೆ, ಧರ್ಮಾಧ್ಯಕ್ಷರನ್ನು ಸಾಮಾನ್ಯ ಕೈಬಂದೂಕಿನಿಂದಲ್ಲ, ಯುದ್ಧದಲ್ಲಿ ಬಳಸುವ ಉನ್ನತ ಸಾಮರ್ಥ್ಯದ ಶಸ್ತ್ರಾಸ್ತ್ರದಿಂದ ಗುಂಡಿಕ್ಕಿ ಕೊಲ್ಲಲಾಗಿದೆ," ಎಂದು ಹೇಳಿದರು.
ಹತ್ಯೆಯ ನಂತರ, ಧರ್ಮಕ್ಷೇತ್ರದ ಕುಲಪತಿಯಾಗಿದ್ದ ಹಾಗೂ ಧರ್ಮಾಧ್ಯಕ್ಷ ಒಸೋರಿಯೊ ಅವರ ಆಪ್ತ ಸಹೋದ್ಯೋಗಿಗಳಲ್ಲೊಬ್ಬರಾಗಿದ್ದ ವ್ಯಕ್ತಿಯನ್ನು ಬಂಧಿಸಲಾಗಿದೆ ಎಂದು ಅವರು ವಿವರಿಸಿದರು. ಇತ್ತೀಚೆಗೆ ಮತ್ತೋರ್ವ ಯಾಜಕರಾದ ವಂ. ಗುರು ಸೆಲ್ಸೊ ಅವರನ್ನೂ ಬಂಧಿಸಲಾಗಿದ್ದು, ಧರ್ಮಾಧ್ಯಕ್ಷ ಒಸೋರಿಯೊ ಮತ್ತು ಕ್ವೆಲಿಮಾನದ ಅಪೋಸ್ತೋಲಿಕ ಆಡಳಿತಾಧಿಕಾರಿಯಾಗಿ ನೇಮಕಗೊಂಡಿರುವ ಧರ್ಮಾಧ್ಯಕ್ಷ ಎಸ್ತೇವಾಂ ಆಂಜೆಲೊ ಫೆರ್ನಾಂಡೊ ಅವರ ಮೊಬೈಲ್ ಫೋನ್ಗಳನ್ನೂ ವಶಪಡಿಸಿಕೊಳ್ಳಲಾಗಿದೆ.
ಧರ್ಮಾಧ್ಯಕ್ಷ ಸಾವ್ರೆ ಅವರ ಪ್ರಕಾರ, ಸಂಪೂರ್ಣ ತನಿಖೆಯು ಮೊಜಾಂಬಿಕ್ನ ರಾಷ್ಟ್ರೀಯ ಅಪರಾಧ ತನಿಖಾ ಸೇವೆ (SERNIC)ಯ ವಶದಲ್ಲಿದೆ. "ಧರ್ಮಸಭೆಯಾಗಿ ನಮಗೆ ಏನಾಗಿದೆ ಎಂಬುದರ ಕುರಿತು ಯಾವುದೇ ಅಧಿಕೃತ ಮಾಹಿತಿ ದೊರೆತಿಲ್ಲ," ಎಂದು ಅವರು ಹೇಳಿದರು. ಧರ್ಮಾಧ್ಯಕ್ಷರು, ಮೂಲಭೂತ ಪ್ರಶ್ನೆಗಳು ಇನ್ನೂ ಉತ್ತರಿಸದೆ ಉಳಿದಿವೆ ಎಂದು ಒತ್ತಿ ಹೇಳಿದರು: ಧರ್ಮಾಧ್ಯಕ್ಷ ಒಸೋರಿಯೊ ಅವರನ್ನು ಕೊಂದವರು ಯಾರು? ಈ ಅಪರಾಧಕ್ಕೆ ಆದೇಶ ನೀಡಿದವರು ಯಾರು? ಅದರ ಉದ್ದೇಶವೇನು?
ಊಹಾಪೋಹಗಳ ಬಗ್ಗೆ ಕಳವಳ
ಧರ್ಮಾಧ್ಯಕ್ಷರು, ಧರ್ಮಸಭೆಯೊಳಗಿನ ಆಂತರಿಕ ಉದ್ವಿಗ್ನತೆಯೇ ಈ ಹತ್ಯೆಗೆ ಏಕೈಕ ಕಾರಣ ಎಂಬ ರೀತಿಯ ವರದಿಗಳು ಪತ್ರಿಕೆಗಳು ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿರುವುದರ ಬಗ್ಗೆ ಕಳವಳ ವ್ಯಕ್ತಪಡಿಸಿದರು. ಮಾಪುಟೊ ಮಹಾಧರ್ಮಾಧ್ಯಕ್ಷ ಜುವಾಂ ಕಾರ್ಲೊಸ್ ಅವರು, ಈ ಹತ್ಯೆಯು ವಿಶ್ವಾಸಿಗಳನ್ನು ತೀವ್ರವಾಗಿ ಬೆಚ್ಚಿಬೀಳಿಸಿದ್ದು, ಒಬ್ಬ ಧರ್ಮಾಧ್ಯಕ್ಷರು ತಮ್ಮದೇ ಮನೆಯಲ್ಲಿ ಹೇಗೆ ಹತ್ಯೆಯಾಗಬಹುದು ಎಂದು ಅನೇಕರು ಇನ್ನೂ ಪ್ರಶ್ನಿಸುತ್ತಿದ್ದಾರೆ ಎಂದು ಹೇಳಿದರು.
ಮೊಜಾಂಬಿಕ್ನಲ್ಲಿ ತನಿಖೆಗಳು ಇನ್ನೂ ನಡೆಯುತ್ತಿರುವಾಗಲೇ ಊಹಾಪೋಹಗಳು ಹರಡುವುದು ಸಾಮಾನ್ಯವಾಗಿದೆ. ಕೆಲವೊಮ್ಮೆ ಮಾಧ್ಯಮಗಳು ಯಾವುದೇ ಆಧಾರವಿಲ್ಲದ ಸಿದ್ಧಾಂತಗಳನ್ನು ಮುಂದಿಟ್ಟು, ಸತ್ಯವನ್ನು ಶಾಂತವಾಗಿ ಮತ್ತು ವಸ್ತುನಿಷ್ಠವಾಗಿ ಹುಡುಕುವ ಪ್ರಯತ್ನಕ್ಕೆ ಧಕ್ಕೆಯುಂಟುಮಾಡುತ್ತವೆ ಎಂದು ಅವರು ಹೇಳಿದರು.
ಧರ್ಮಸಭೆಯು ತನ್ನನ್ನೇ ಪರಿಶೀಲಿಸಿಕೊಳ್ಳುವ ಕರೆ
ಧರ್ಮಾಧ್ಯಕ್ಷ ಒಸೋರಿಯೊ ಅವರ ಮರಣವು ಧರ್ಮಸಭೆಯು ತನ್ನ ಆಂತರಿಕ ಸವಾಲುಗಳ ಕುರಿತು ಪ್ರಾಮಾಣಿಕವಾಗಿ ಚಿಂತನೆ ನಡೆಸುವಂತೆ ಮಾಡಿದೆ ಎಂದು ಧರ್ಮಾಧ್ಯಕ್ಷರು ಒಪ್ಪಿಕೊಂಡರು. ಈ ಸವಾಲುಗಳಲ್ಲಿ, ಕೆಲವು ಯಾಜಕರು ಮತ್ತು ಸಮರ್ಪಿತ ಜೀವನ ನಡೆಸುವವರು ಬೋಧಿಸುವುದಕ್ಕೂ ಅವರು ಬದುಕುವ ರೀತಿಗೂ ಹೆಚ್ಚಿನ ಹೊಂದಾಣಿಕೆಯ ಅಗತ್ಯವಿದೆ ಎಂದು ಅವರು ಉಲ್ಲೇಖಿಸಿದರು.
ಶ್ರೀಮಂತ ದಾನಿಗಳು ಸೆಮಿನರಿ ವಿದ್ಯಾರ್ಥಿಗಳಿಗೆ "ಗಾಡ್ಫಾದರ್"ಗಳಾಗಿ ವರ್ತಿಸುವ ಪದ್ಧತಿಯ ಬಗ್ಗೆಯೂ ಅವರು ಎಚ್ಚರಿಕೆ ನೀಡಿದರು. ಇಂತಹ ಸಂಬಂಧಗಳು ಭವಿಷ್ಯದ ಯಾಜಕರ ಸ್ವಾತಂತ್ರ್ಯ ಮತ್ತು ಸೇವೆಯ ಮೇಲೆ ನಂತರ ಪ್ರಭಾವ ಬೀರುವ ಸಾಧ್ಯತೆ ಇದೆ ಎಂದು ಅವರು ಹೇಳಿದರು.
ಸತ್ಯದ ಹುಡುಕಾಟ
ಮೊಜಾಂಬಿಕ್ನ ಇತ್ತೀಚಿನ ಇತಿಹಾಸವನ್ನು ನೆನಪಿಸಿಕೊಂಡ ಧರ್ಮಾಧ್ಯಕ್ಷರು, ಪ್ರಮುಖ ರಾಜಕಾರಣಿಗಳು, ಹಿರಿಯ ಸರ್ಕಾರಿ ಅಧಿಕಾರಿಗಳು ಮತ್ತು ಪತ್ರಕರ್ತರ ಹತ್ಯೆಗಳ ತನಿಖೆಗಳು ಬಹುತೇಕ ಸಂದರ್ಭಗಳಲ್ಲಿ ಸಂಪೂರ್ಣ ಸತ್ಯವನ್ನು ಬಹಿರಂಗಪಡಿಸಿಲ್ಲ ಎಂದು ವಿಷಾದ ವ್ಯಕ್ತಪಡಿಸಿದರು.
ಅಪರಾಧಗಳನ್ನು ಎಸಗಿದವರು ಯಾರು, ಅವುಗಳಿಗೆ ಆದೇಶ ನೀಡಿದವರು ಯಾರು ಮತ್ತು ಕಾನೂನುಬದ್ಧ ಹೊಣೆ ಹೊತ್ತವರು ಯಾರು ಎಂಬುದು ತಿಳಿಯದಿದ್ದರೆ, ಸಮಾಜದಲ್ಲಿ ನಿಜವಾದ ಸಮನ್ವಯ ಸಾಧಿಸುವುದು ಕಷ್ಟಕರವಾಗುತ್ತದೆ ಎಂದು ಅವರು ಹೇಳಿದರು.
ಆದರೂ, ಧರ್ಮಾಧ್ಯಕ್ಷ ಸಾವ್ರೆ ಆಶಾಭಾವನೆಯನ್ನು ಕಳೆದುಕೊಳ್ಳಬಾರದು ಎಂದು ಒತ್ತಿ ಹೇಳಿದರು. "ರೋಮ್ಗೆ ನಮ್ಮ ಭೇಟಿ, ಇಡೀ ಧರ್ಮಸಭೆಯ ಬೆಂಬಲ ಮತ್ತು ಸಹಯಾತ್ರೆಯನ್ನು ನಾವು ನಿಜವಾಗಿ ಅನುಭವಿಸಬೇಕೆಂಬ ನಮ್ಮ ಬಯಕೆಯ ಪುನರುಚ್ಚಾರಣೆಯೂ ಆಗಿತ್ತು. ಸತ್ಯದ ಆಧಾರದ ಮೇಲೆ ವಿಶ್ವಾಸಾರ್ಹ ಉತ್ತರಗಳನ್ನು ನಾವು ಒಟ್ಟಾಗಿ ಹುಡುಕಲು ಬಯಸುತ್ತೇವೆ," ಎಂದು ಅವರು ಹೇಳಿದರು.
ದುರಂತದಿಂದ ಹುಟ್ಟಿದ ಆಶಾಭಾವನೆ
ಧರ್ಮಾಧ್ಯಕ್ಷ ಒಸೋರಿಯೊ ಅವರ ಮರಣದ ನೋವಿನ ನಡುವೆಯೂ, ರೋಮ್ ಭೇಟಿಯಿಂದ ಬಲಗೊಂಡ ಹೊಸ ಮಾರ್ಗ ಈಗಾಗಲೇ ರೂಪುಗೊಳ್ಳುತ್ತಿದೆ ಎಂದು ಧರ್ಮಾಧ್ಯಕ್ಷರು ನಂಬಿದ್ದಾರೆ. ಮಹಾಧರ್ಮಾಧ್ಯಕ್ಷ ಜುವಾಂ ಕಾರ್ಲೊಸ್ ಅವರು, ಜಗದ್ಗುರುಗಳ ಅಧಿಕಾರ ಪೀಠ, ಪೂಜ್ಯ ಜಗದ್ಗುರುಗಳಾದ 14ನೇ ಲಿಯೋ ಮತ್ತು ಅವರ ಸಹೋದ್ಯೋಗಿಗಳು, ಈ ನೋವಿನ ಅನುಭವದ ಮೂಲಕ ಮೊಜಾಂಬಿಕ್ ಬೆಳೆಯಬಹುದು ಎಂದು ನಂಬಿದ್ದಾರೆ ಎಂದು ಹೇಳಿದರು.
"ನಮ್ಮ ನಡುವೆ ದುಷ್ಟಶಕ್ತಿ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ನಾವು ಅರ್ಥಮಾಡಿಕೊಳ್ಳುವ ಹಂತಕ್ಕೆ ತಲುಪಬಹುದು," ಎಂದು ಅವರು ಹೇಳಿದರು. "ಆ ಮೂಲಕ ನಾವು ಹೆಚ್ಚು ಜಾಗರೂಕರಾಗಿ, ದುಷ್ಟತೆಯ ಎದುರು ಇನ್ನಷ್ಟು ಬಲಿಷ್ಠರಾಗಿ ಹೊರಹೊಮ್ಮಬಹುದು."
ಧರ್ಮಾಧ್ಯಕ್ಷ ಒಸೋರಿಯೊ ಅವರ ಪರಂಪರೆಯನ್ನು ಮುಂದುವರಿಸುವುದು
ತಮ್ಮ ರೋಮ್ ಭೇಟಿಯ ಫಲಗಳನ್ನು ಧರ್ಮಾಧ್ಯಕ್ಷರ ಸಮ್ಮೇಳನದೊಂದಿಗೆ ಹಂಚಿಕೊಳ್ಳುವುದು ಮತ್ತು ಈಗಾಗಲೇ ಆರಂಭವಾಗಿರುವ ಸತ್ಯ, ಆಶಾಭಾವನೆ, ಸಮನ್ವಯ ಮತ್ತು ಶುದ್ಧೀಕರಣದ ಪಯಣವನ್ನು ಮುಂದುವರಿಸುವುದೇ ಮುಂದಿನ ಹೆಜ್ಜೆಯಾಗಲಿದೆ ಎಂದು ಧರ್ಮಾಧ್ಯಕ್ಷರು ಹೇಳಿದರು. ಈ ಪಯಣವು ಧರ್ಮಾಧ್ಯಕ್ಷರ ಮರಣದಿಂದ ಉಂಟಾದ ಗಾಯವನ್ನು ಗುಣಪಡಿಸುವ ಉದ್ದೇಶವನ್ನು ಹೊಂದಿದೆ.
ಈ ಪಯಣವನ್ನು ಒಬ್ಬರೇ ನಡೆಸುವುದಲ್ಲ, ಬದಲಾಗಿ ಸಿನೋಡಲ್ ಮನೋಭಾವದಲ್ಲಿ, ವಿವಿಧ ಧರ್ಮಕ್ಷೇತ್ರಗಳ ಮೂಲಕ ಒಟ್ಟಾಗಿ ಸಾಗಬೇಕು ಎಂದು ಅವರು ಒತ್ತಿ ಹೇಳಿದರು. ಸುವಾರ್ತೆಯನ್ನು ಸಾರುತ್ತಲೇ ತಮ್ಮ ಪ್ರಾಣವನ್ನು ಅರ್ಪಿಸಿದ ನಿಜವಾದ ಕುರುಬನಾಗಿದ್ದ ಧರ್ಮಾಧ್ಯಕ್ಷ ಒಸೋರಿಯೊ ಅವರ ಪರಂಪರೆಯನ್ನು ಈ ಕಾರ್ಯಗಳು ಮುಂದುವರಿಸಲಿವೆ ಎಂದು ಅವರು ವಿವರಿಸಿದರು.
"ವಿಶ್ವಾಸದ ರಕ್ತಸಾಕ್ಷಿ"
ಧರ್ಮಾಧ್ಯಕ್ಷ ಇನಾಸಿಯೊ ಸಾವ್ರೆ ಅವರ ಪ್ರಕಾರ, ಧರ್ಮಾಧ್ಯಕ್ಷ ಒಸೋರಿಯೊ "ಜೀವನವನ್ನು ಪ್ರೀತಿಸಿದ್ದಕ್ಕಾಗಿ ಹತ್ಯೆಗೀಡಾದರು."
"ಡೊಂ ಒಸೋರಿಯೊ ವಿಶ್ವಾಸದ ರಕ್ತಸಾಕ್ಷಿ," ಎಂದು ಅವರು ಹೇಳಿದರು. "ರಕ್ತಸಾಕ್ಷಿಗಳ ಧರ್ಮಸಭೆ ಬಲಿಷ್ಠ ಧರ್ಮಸಭೆಯಾಗಿದೆ, ಅಚಲವಾದ ಧರ್ಮಸಭೆಯಾಗಿದೆ. ಮೊಜಾಂಬಿಕ್ ಧರ್ಮಸಭೆ ಈ ಕ್ಷಣವನ್ನು ಮಹಾನ್ ಆಶಾಭಾವನೆಯೊಂದಿಗೆ ಬದುಕುತ್ತಿದೆ. ಅಂತಿಮವಾಗಿ ರಕ್ತಸಾಕ್ಷಿ ಘಟನೆ ಅಪಾರ ನೋವನ್ನುಂಟುಮಾಡಿದರೂ ಧರ್ಮಸಭೆಯನ್ನು ಬಲಪಡಿಸುತ್ತದೆ. ಧರ್ಮಸಭೆಯನ್ನು ಇನ್ನಷ್ಟು ದೃಢಪಡಿಸುತ್ತದೆ.”
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
