ಬೊರ್ಗೊ ಲೌದಾತೋ ಸಿ'ನಲ್ಲಿ ಒಂದಾಗಲಿರುವ ವಿಶ್ವ ನಾಯಕರು, ನೊಬೆಲ್ ಪ್ರಶಸ್ತಿ ವಿಜೇತರು ಹಾಗೂ ಕೃತಕ ಬುದ್ಧಿಮತ್ತೆ (AI) ತಜ್ಞರು
ವ್ಯಾಟಿಕನ್ ವರದಿ
ಜುಲೈ 14ರಿಂದ 16ರವರೆಗೆ ಕ್ಯಾಸೆಲ್ ಗಾಂಡೋಲ್ಫೊದ ಜಗದ್ಗುರುಗಳ ಉದ್ಯಾನವನದಲ್ಲಿರುವ ಬೊರ್ಗೊ ಲೌದಾತೋ ಸಿ'ನಲ್ಲಿ ವ್ಯಾಟಿಕನ್ "ಕೃತಕ ಬುದ್ಧಿಮತ್ತೆ ಮತ್ತು ಅಣುಯುದ್ಧ ಕುರಿತ ಜಾಗತಿಕ ನೊಬೆಲ್ ಪ್ರಶಸ್ತಿ ವಿಜೇತರ ಸಭೆ"ಯನ್ನು ಆಯೋಜಿಸುತ್ತಿದ್ದು, ಶಾಂತಿ ಮತ್ತು ಕೃತಕ ಬುದ್ಧಿಮತ್ತೆ ಕ್ಷೇತ್ರಗಳ ವಿಶ್ವದ 200ಕ್ಕೂ ಹೆಚ್ಚು ಪ್ರಮುಖ ವ್ಯಕ್ತಿಗಳು ಹಾಗೂ ಅಂತರರಾಷ್ಟ್ರೀಯ ಸಂಶೋಧನಾ ಸಂಸ್ಥೆಗಳ ಪ್ರತಿನಿಧಿಗಳು ಇದರಲ್ಲಿ ಭಾಗವಹಿಸಲಿದ್ದಾರೆ.
ಕೃತಕ ಬುದ್ಧಿಮತ್ತೆಯ ಯುಗದಲ್ಲಿ ಮಾನವ ರಕ್ಷಣೆಗೆ ಸಮರ್ಪಿತವಾಗಿರುವ ಜಗದ್ಗುರು 14ನೇ ಲಿಯೋರವರ ಹೊಸ ವಿಶ್ವಪತ್ರಿಕೆ "ಮ್ಯಾಗ್ನಿಫಿಕಾ ಹುಮಾನಿತಾಸ್"ನಿಂದ ಪ್ರೇರಿತವಾಗಿರುವ ಈ ಸಭೆಯು, ಅಂತರರಾಷ್ಟ್ರೀಯ ಸಂಘರ್ಷಗಳು, ಹೆಚ್ಚುತ್ತಿರುವ ಅಸ್ಥಿರತೆ ಹಾಗೂ ಹೆಚ್ಚು ಸಂಕೀರ್ಣವಾಗುತ್ತಿರುವ ಅಣ್ವಸ್ತ್ರ ಪರಿಸ್ಥಿತಿಯ ಹಿನ್ನೆಲೆಯಲ್ಲಿದೆ. ಇದು "ನಿಶ್ಶಸ್ತ್ರೀಕರಣಕ್ಕಾಗಿ ಮತ್ತು ನಿಶ್ಶಸ್ತ್ರೀಕರಣಗೊಳಿಸುವ ಶಾಂತಿ" ಎಂಬ ಜಗದ್ಗುರು ಲಿಯೋ ಅವರ ದೃಷ್ಟಿಕೋನದ ಭಾಗವಾಗಿದೆ.
ಸಭೆಯ ಅಂತ್ಯದಲ್ಲಿ "ಕೃತಕ ಬುದ್ಧಿಮತ್ತೆ, ಅಣ್ವಸ್ತ್ರಗಳು ಮತ್ತು ಸ್ವಾಯತ್ತ ಶಸ್ತ್ರಾಸ್ತ್ರಗಳು, ಹೊಸ ಡಿಜಿಟಲ್ ನಿಯಮಾವಳಿಗಳು ಹಾಗೂ ಉದಯೋನ್ಮುಖ ಡಿಜಿಟಲ್ ಅಭಿವೃದ್ಧಿ ಮಾದರಿಗಳ ಯುಗದಲ್ಲಿ ನಿಶ್ಶಸ್ತ್ರೀಕರಣಕ್ಕಾಗಿ ಮತ್ತು ನಿಶ್ಶಸ್ತ್ರೀಕರಣಗೊಳಿಸುವ ಶಾಂತಿಗಾಗಿ ರೋಮ್ ಘೋಷಣೆ"ಯನ್ನು ರಚಿಸಲಾಗುವುದು.
ಈ ಕಾರ್ಯಕ್ರಮವು ಜುಲೈ 16ರಂದು ರೋಮ್ ನಗರದ ಕ್ಯಾಪಿಟೋಲಿನ್ ಬೆಟ್ಟದಲ್ಲಿರುವ ನಗರ ಸಭಾಂಗಣದಲ್ಲಿ ನಡೆಯುವ ಗಂಭೀರ ಸಮಾರೋಪ ಅಧಿವೇಶನದೊಂದಿಗೆ ಮುಕ್ತಾಯಗೊಳ್ಳಲಿದೆ.
ಮೂರು ದಿನಗಳ ಕಾಲ 30 ನೊಬೆಲ್ ಪ್ರಶಸ್ತಿ ವಿಜೇತರು, ಮಾಜಿ ರಾಷ್ಟ್ರ ಹಾಗೂ ಸರ್ಕಾರದ ಮುಖ್ಯಸ್ಥರು, ಓಪನ್ಎಐ, ಗೂಗಲ್ ಡೀಪ್ಮೈಂಡ್, AARU ಮತ್ತು ಆಂಥ್ರೋಪಿಕ್ ಸಂಸ್ಥೆಗಳ ಪ್ರತಿನಿಧಿಗಳನ್ನು ಒಳಗೊಂಡ ವಿಶ್ವದ 20 ಪ್ರಮುಖ ಕೃತಕ ಬುದ್ಧಿಮತ್ತೆ ತಜ್ಞರು ಮತ್ತು ನವೋದ್ಯಮಿಗಳು ಹಾಗೂ ವಿಶ್ವದ 30 ಪ್ರತಿಷ್ಠಿತ ವಿಶ್ವವಿದ್ಯಾಲಯಗಳು ಮತ್ತು ಸಂಶೋಧನಾ ಸಂಸ್ಥೆಗಳ ಪ್ರತಿನಿಧಿಗಳು ಇಂದಿನ ಮಾನವಕುಲ ಎದುರಿಸುತ್ತಿರುವ ಪ್ರಮುಖ ಸವಾಲುಗಳ ಕುರಿತು "ಕಾಂಕ್ಲೇವ್" ಮಾದರಿಯ ಸಂವಾದದಲ್ಲಿ ಭಾಗವಹಿಸಲಿದ್ದಾರೆ. ವಿಶೇಷವಾಗಿ, ಅಂತರರಾಷ್ಟ್ರೀಯ ಭದ್ರತೆ, ಉದಯೋನ್ಮುಖ ತಂತ್ರಜ್ಞಾನಗಳ ಆಡಳಿತ, ನಿಶ್ಶಸ್ತ್ರೀಕರಣ ಹಾಗೂ ಶಾಂತಿ ಆಧಾರಿತ ಆರ್ಥಿಕತೆಯ ಅಭಿವೃದ್ಧಿ ಕುರಿತಂತೆ ಅವರು ಚರ್ಚಿಸಲಿದ್ದಾರೆ. ಈ ಚರ್ಚೆಗಳ ಕೇಂದ್ರಬಿಂದುವಿನಲ್ಲಿ ನವೋದ್ಯಮ, ಜವಾಬ್ದಾರಿ ಮತ್ತು ನೈತಿಕತೆಯನ್ನು ಒಗ್ಗೂಡಿಸುವ ಹೊಸ ಜಾಗತಿಕ ಮಾದರಿಯ ಹುಡುಕಾಟ ಇರಲಿದೆ.
ಈ ಉಪಕ್ರಮವನ್ನು ಅಣುಯುದ್ಧ ತಡೆಗಟ್ಟುವ ನೊಬೆಲ್ ಪ್ರಶಸ್ತಿ ವಿಜೇತರ ಸಭೆ, ನೊಬೆಲ್ ಮಹಿಳಾ ಉಪಕ್ರಮ, ಅಂತರರಾಷ್ಟ್ರೀಯ ಅಣುಯುದ್ಧ ತಡೆ ವೈದ್ಯರ ಸಂಘ (IPPNW), ಪಗ್ವಾಶ್ ವಿಜ್ಞಾನ ಮತ್ತು ಜಾಗತಿಕ ವ್ಯವಹಾರಗಳ ಸಮ್ಮೇಳನ, ಯೂನಸ್ ಕೇಂದ್ರ, ಅಮೆರಿಕದ ಕಥೋಲಿಕ ವಿಶ್ವವಿದ್ಯಾಲಯ, ಚಿಕಾಗೋ ವಿಶ್ವವಿದ್ಯಾಲಯದ ಅಸ್ತಿತ್ವದ ಅಪಾಯಗಳ ಪ್ರಯೋಗಾಲಯ, ಹಾರ್ವರ್ಡ್ ವೈದ್ಯಕೀಯ ಶಾಲೆ, ಬ್ರಿಘಮ್ ಅಂಡ್ ವುಮೆನ್ಸ್ ಆಸ್ಪತ್ರೆ, ನೋಟ್ರ್ ಡೇಮ್ ವಿಶ್ವವಿದ್ಯಾಲಯ, ಬುಲೆಟಿನ್ ಆಫ್ ದ ಅಟಾಮಿಕ್ ಸೈಂಟಿಸ್ಟ್ಸ್, ಮತ್ತು ಸೋಕಾ ಗಕ್ಕೈ ಇಂಟರ್ನ್ಯಾಷನಲ್ ಪ್ರೋತ್ಸಾಹಿಸುತ್ತಿದ್ದು, ಡೊಮಸ್ ಕಮ್ಯುನಿಸ್ ಫೌಂಡೇಶನ್ ಪ್ರಧಾನ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸುತ್ತಿದೆ.
ಹಾರ್ವರ್ಡ್ ವಿಶ್ವವಿದ್ಯಾಲಯ, ಸ್ಟ್ಯಾನ್ಫೋರ್ಡ್ ವಿಶ್ವವಿದ್ಯಾಲಯ, ಕೊಲಂಬಿಯಾ ವಿಶ್ವವಿದ್ಯಾಲಯ, ಪ್ರಿನ್ಸ್ಟನ್ ವಿಶ್ವವಿದ್ಯಾಲಯ, ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯ, ಬರ್ಕ್ಲಿ, ಮಿಡಲ್ಬರಿ ಇನ್ಸ್ಟಿಟ್ಯೂಟ್ ಆಫ್ ಇಂಟರ್ನ್ಯಾಷನಲ್ ಸ್ಟಡೀಸ್ ಅಟ್ ಮಾಂಟೆರೆ, ಆಕ್ಸ್ಫರ್ಡ್ ವಿಶ್ವವಿದ್ಯಾಲಯ, ಮ್ಯಾಂಚೆಸ್ಟರ್ ವಿಶ್ವವಿದ್ಯಾಲಯ, ಕಾಲೆಜ್ ದ ಫ್ರಾನ್ಸ್, ಪಾಂಥಿಯೊನ್-ಸೊರ್ಬೋನ್ ವಿಶ್ವವಿದ್ಯಾಲಯ, ತ್ಸಿಂಗ್ಹುವಾ ವಿಶ್ವವಿದ್ಯಾಲಯ, ಕ್ವೀನ್ಸ್ ವಿಶ್ವವಿದ್ಯಾಲಯ, ಸೈಮನ್ ಫ್ರೇಸರ್ ವಿಶ್ವವಿದ್ಯಾಲಯ, ಆಸ್ಟ್ರೇಲಿಯನ್ ನ್ಯಾಷನಲ್ ಯೂನಿವರ್ಸಿಟಿ, ಆಂಟ್ವರ್ಪ್ ವಿಶ್ವವಿದ್ಯಾಲಯ, ಸಂತ ಪ್ಯಾಟ್ರಿಕ್ ಪಾಂಟಿಫಿಕಲ್ ವಿಶ್ವವಿದ್ಯಾಲಯ, ರೋಮ್ "ಟೋರ್ ವರ್ಗಾಟಾ" ವಿಶ್ವವಿದ್ಯಾಲಯ, ಬಾಲ್ಸೈರೊ ಸಂಸ್ಥೆ, ದಕ್ಷಿಣ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯ, ಹಾಗೂ ಯೂನಿವರ್ಸಿಟಾ ಟೆಲೆಮಾಟಿಕಾ ಇಂಟರ್ನ್ಯಾಷನಾಲೆ ಯುನಿನೆಟ್ಟುನೊ ಸೇರಿದಂತೆ ವಿಶ್ವದ ಪ್ರಮುಖ ವಿಶ್ವವಿದ್ಯಾಲಯಗಳು ಮತ್ತು ಸಂಶೋಧನಾ ಸಂಸ್ಥೆಗಳ ಪ್ರತಿನಿಧಿಗಳು ಈ ಸಭೆಯಲ್ಲಿ ಭಾಗವಹಿಸಲಿದ್ದಾರೆ.
ಸಭೆಯ ಸಮಾರೋಪದಲ್ಲಿ "ಕೃತಕ ಬುದ್ಧಿಮತ್ತೆ, ಅಣ್ವಸ್ತ್ರಗಳು ಮತ್ತು ಸ್ವಾಯತ್ತ ಶಸ್ತ್ರಾಸ್ತ್ರಗಳು, ಹೊಸ ಡಿಜಿಟಲ್ ನಿಯಮಾವಳಿಗಳು ಹಾಗೂ ಉದಯೋನ್ಮುಖ ಡಿಜಿಟಲ್ ಅಭಿವೃದ್ಧಿ ಮಾದರಿಗಳ ಯುಗದಲ್ಲಿ ನಿಶ್ಶಸ್ತ್ರೀಕರಣಕ್ಕಾಗಿ ಮತ್ತು ನಿಶ್ಶಸ್ತ್ರೀಕರಣಗೊಳಿಸುವ ಶಾಂತಿಗಾಗಿ ರೋಮ್ ಘೋಷಣೆ"ಯನ್ನು ಅಧಿಕೃತವಾಗಿ ಮಂಡಿಸಲಾಗುವುದು.
ಈ ಘೋಷಣೆಯು ಕೃತಕ ಬುದ್ಧಿಮತ್ತೆಯ ಆಡಳಿತಕ್ಕಾಗಿ ಮೂಲತತ್ವಗಳು ಮತ್ತು ಮಾರ್ಗಸೂಚಿಗಳನ್ನು ರೂಪಿಸುವ ಗುರಿಯನ್ನು ಹೊಂದಿದ್ದು, ಸಹಕಾರ, ಮಾನವ ಘನತೆ, ಸಮಗ್ರ ಮಾನವ ಅಭಿವೃದ್ಧಿ ಮತ್ತು ಜನಾಂಗಗಳ ನಡುವಿನ ಶಾಂತಿಯ ಮೇಲೆ ಆಧಾರಿತ ಅಂತರರಾಷ್ಟ್ರೀಯ ಭದ್ರತೆಯ ದೃಷ್ಟಿಕೋನವನ್ನು ಉತ್ತೇಜಿಸಲು ಉದ್ದೇಶಿಸಿದೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
