ವೆನೆಜುವೆಲಾದ ಯಾಜಕ: ಭೂಕಂಪದ ಬಳಿಕ ಕೆಲವು ಪ್ರದೇಶಗಳನ್ನು ಗುರುತಿಸುವುದೇ ಅಸ
ಲೇಖಕರು: ಜೋಹಾನ್ ಪಚೆಕೊ
“ಈ ದುರಂತದ ಪ್ರಮಾಣ ಅತ್ಯಂತ ಭೀಕರವಾಗಿದೆ. ಇಡೀ ದೇಶದಲ್ಲೇ ಲಾ ಗ್ವೈರಾ ಪ್ರದೇಶವು ಅತ್ಯಂತ ಹೆಚ್ಚು ಹಾನಿಗೊಳಗಾಗಿದೆ. ಕೆಲವು ಪ್ರದೇಶಗಳು ಸಂಪೂರ್ಣ ನಾಶವಾಗಿರುವುದರಿಂದ ಅವುಗಳನ್ನು ಗುರುತಿಸುವುದೇ ಅಸಾಧ್ಯವಾಗಿದೆ. ಭವಿಷ್ಯದಲ್ಲಿ ಅವುಗಳನ್ನು ಸಂಪೂರ್ಣವಾಗಿ ಸ್ಥಳಾಂತರಿಸಿ ತ್ಯಜಿಸಬೇಕಾದ ಪರಿಸ್ಥಿತಿ ಎದುರಾಗಬಹುದು” ಎಂದು ವೆನೆಜುವೆಲಾದ ಲಾ ಗ್ವೈರಾ ಧರ್ಮಕ್ಷೇತ್ರದ ಪ್ರೇಷಿತ ಸಂತ ಪೇತ್ರ ಗುರುತರಬೇತಿಕೇಂದ್ರದ ರೆಕ್ಟರ್ ವಂ. ಗುರು ವಿಲ್ಲಿಯಂ ಜೋಸೆ ವಾಸ್ಕೆಸ್ ತೋರೊ ಹೇಳಿದರು. ಜೂನ್ 24ರಂದು ಸಂಭವಿಸಿದ ಭೀಕರ ಭೂಕಂಪವು ದೇಶದಾದ್ಯಂತ ಅಪಾರ ಹಾನಿಯನ್ನು ಉಂಟುಮಾಡಿದ್ದು, ಗುರುಮನೆಯ ಕಟ್ಟಡಕ್ಕೂ ತೀವ್ರ ಹಾನಿಯಾಗಿದೆ.
ಭೂಕಂಪ ಸಂಭವಿಸಿ ಒಂದು ವಾರ ಕಳೆದಿದ್ದರೂ, ಲಾ ಗ್ವೈರಾ ಪ್ರದೇಶದಲ್ಲಿ ಹೆಚ್ಚಿನ ಜೀವಂತ ವ್ಯಕ್ತಿಗಳನ್ನು ಪತ್ತೆಹಚ್ಚುವ ಉದ್ದೇಶದಿಂದ ರಕ್ಷಣಾ ಕಾರ್ಯಾಚರಣೆಗಳು ಹಗಲಿರುಳು ನಿರಂತರವಾಗಿ ನಡೆಯುತ್ತಿವೆ. ಈ ದುರಂತದಲ್ಲಿ ಮೃತರ ಸಂಖ್ಯೆ 1,900 ದಾಟಿದ್ದು, 10,000ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಸುಮಾರು 50,000 ಮಂದಿ ಇನ್ನೂ ನಾಪತ್ತೆಯಾಗಿದ್ದು, ಅವರು ಮೃತಪಟ್ಟಿರಬಹುದೆಂಬ ಆತಂಕ ವ್ಯಕ್ತವಾಗಿದೆ. ಅಧಿಕೃತ ಅಂಕಿಅಂಶಗಳ ಪ್ರಕಾರ ಸುಮಾರು 16,000 ಮಂದಿ ಸ್ಥಳಾಂತರಗೊಂಡಿದ್ದಾರೆ ಅಥವಾ ದುರಂತದಿಂದ ಬಾಧಿತರಾಗಿದ್ದಾರೆ. ಅಲ್ಲದೆ 855 ಕಟ್ಟಡಗಳು ಹಾನಿಗೊಳಗಾಗಿವೆ.
“ವಿಶೇಷವಾಗಿ ನಿವಾಸಿಗಳನ್ನು ಮತ್ತು ಬದುಕುಳಿದವರನ್ನು ಬೇರೆ ಪ್ರದೇಶಗಳಿಗೆ ಸ್ಥಳಾಂತರಿಸುವ ಕುರಿತು ಭವಿಷ್ಯದಲ್ಲಿ ಕೆಲವು ಪ್ರದೇಶಗಳ ಬಗ್ಗೆ ಮರುಪರಿಶೀಲನೆ ನಡೆಸಲೇಬೇಕಾಗುತ್ತದೆ” ಎಂದು ವಂ. ಗುರು ವಾಸ್ಕೆಸ್ ವ್ಯಾಟಿಕನ್ ವಾರ್ತಾ ಸಂಸ್ಥೆಗೆ ತಿಳಿಸಿದರು.
“ಅನೇಕ ಕಟ್ಟಡಗಳು ಸಂಪೂರ್ಣ ಕುಸಿದಿವೆ. ಇನ್ನೂ ಭೂಮಿ ನಡುಗುವಿಕೆಗಳು ಮುಂದುವರಿಯುತ್ತಿವೆ. ಈ ನಂತರದ ಭೂಕಂಪಗಳ ಹಿನ್ನೆಲೆಯಲ್ಲಿ ಜನರು ಶಾಂತವಾಗಿರಬೇಕು, ಆದರೆ ಅತ್ಯಂತ ಎಚ್ಚರಿಕೆಯಿಂದ ಇರಬೇಕು ಎಂದು ಅಧಿಕಾರಿಗಳು ಮನವಿ ಮಾಡಿದ್ದಾರೆ. ಏಕೆಂದರೆ ಇನ್ನೂ ಅನೇಕ ಕಟ್ಟಡಗಳು ಯಾವುದೇ ಕ್ಷಣದಲ್ಲಿ ಕುಸಿಯುವ ಸಾಧ್ಯತೆಯಿದೆ. ಈಗ ನಮ್ಮ ಮುಂದಿರುವ ಅತಿ ದೊಡ್ಡ ಕರ್ತವ್ಯವೆಂದರೆ ಈ ಪರಿಸ್ಥಿತಿಯನ್ನು ಎದುರಿಸುತ್ತಿರುವ ಜನರಿಗೆ ಬೆಂಬಲವಾಗಿ ನಿಲ್ಲುವುದಾಗಿದೆ” ಎಂದು ಅವರು ಹೇಳಿದರು.
ರಕ್ಷಣಾ ಕಾರ್ಯಗಳಲ್ಲಿ ಆಶಾಕಿರಣ
“ಇನ್ನೂ ಜನರನ್ನು ಅವಶೇಷಗಳಡಿಯಿಂದ ಜೀವಂತವಾಗಿ ರಕ್ಷಿಸಲಾಗುತ್ತಿದೆ. ಉದಾಹರಣೆಗೆ, ನಿನ್ನೆ ರಾತ್ರಿ ನಮ್ಮ ಗುರುತರಬೇತಿಕೇಂದ್ರದ ಸಮೀಪವೇ 12 ವರ್ಷದ ಬಾಲಕನನ್ನು ಅವಶೇಷಗಳಡಿಯಿಂದ ಜೀವಂತವಾಗಿ ರಕ್ಷಿಸಲಾಯಿತು. ಭೂಕಂಪ ಕಳೆದ ಬುಧವಾರ ರಾತ್ರಿ ಸಂಭವಿಸಿದ್ದರೂ ಇದು ಆಶಾದಾಯಕ ಸಂಗತಿಯಾಗಿದೆ” ಎಂದು ವಂ. ಗುರು ವಾಸ್ಕೆಸ್ ವಿವರಿಸಿದರು.
“ನಾವು ಜನರಿಗೆ ನೆರವಾಗಲು ಮತ್ತು ಅವರೊಂದಿಗೆ ಇರಲು ಇಲ್ಲಿದ್ದೇವೆ. ಎಲ್ಲೆಡೆಯಿಂದಲೂ ಅಪಾರ ಐಕಮತ್ಯ ವ್ಯಕ್ತವಾಗುತ್ತಿದೆ. ಬೇರೆ ಪ್ರದೇಶಗಳಿಂದ ಆಗಮಿಸಿರುವ ರಕ್ಷಣಾ ತಂಡಗಳ ಸೇವೆಯಲ್ಲಿಯೂ, ವೆನೆಜುವೆಲಾದ ಜನರ ಧೈರ್ಯ ಮತ್ತು ಸಹಿಷ್ಣುತೆಯಲ್ಲಿಯೂ ಅದನ್ನು ನಾವು ಕಾಣುತ್ತಿದ್ದೇವೆ” ಎಂದು ಅವರು ಹೇಳಿದರು. ಸ್ಥಳೀಯ ಧರ್ಮಕೇಂದ್ರದ ಕಾರಿತಾಸ್ ಸಂಸ್ಥೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದ ಅನೇಕ ಸದಸ್ಯರು ಮೃತಪಟ್ಟಿದ್ದಾರೆ ಅಥವಾ ಇನ್ನೂ ನಾಪತ್ತೆಯಾಗಿದ್ದಾರೆ ಎಂಬುದನ್ನು ಅವರು ದುಃಖದಿಂದ ಸ್ಮರಿಸಿದರು.
ಆದಾಗ್ಯೂ, “ಪ್ರಸ್ತುತ ಲಾ ಗ್ವೈರಾ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಧರ್ಮಸಭೆಯು ನೆರವು ಸಂಗ್ರಹ ಮತ್ತು ವಿತರಣಾ ಕೇಂದ್ರಗಳನ್ನು ಸ್ಥಾಪಿಸಿದೆ. ವಿಶೇಷವಾಗಿ ಹೆಚ್ಚು ಹಾನಿಗೊಳಗಾದ ಹಾಗೂ ತೀವ್ರ ಸಂಕಷ್ಟದಲ್ಲಿರುವ ಸಮುದಾಯಗಳಿಗೆ ಅಗತ್ಯ ವಸ್ತುಗಳನ್ನು ತಲುಪಿಸಲಾಗುತ್ತಿದೆ” ಎಂದು ಅವರು ತಿಳಿಸಿದರು.
ಗುರುತರಬೇತಿಕೇಂದ್ರವಿಲ್ಲದ ಲಾ ಗ್ವೈರಾ ಧರ್ಮಪ್ರಾಂತ್ಯ
ಪ್ರೇಷಿತ ಸಂತ ಪೇತ್ರ ಗುರುಮನೆಯ ಕಟ್ಟಡವೂ ಭಾರೀ ಹಾನಿಗೊಳಗಾಗಿದೆ ಎಂದು ಅದರ ರೆಕ್ಟರ್ ತಿಳಿಸಿದ್ದಾರೆ. “ನಾವು ಬಹುತೇಕ ಗುರುಮನೆಯನ್ನು ಕಳೆದುಕೊಂಡಂತಾಗಿದೆ. ತಜ್ಞರು ನಡೆಸಿದ ಪರಿಶೀಲನೆಯ ನಂತರ, ಆ ಕಟ್ಟಡಕ್ಕೆ ಮರಳುವುದು ಬಹಳ ಕಷ್ಟವೆಂದು ತೋರುತ್ತಿದೆ. ಅದರ ಸ್ಥಿತಿ ಅತ್ಯಂತ ಹದಗೆಟ್ಟಿದೆ. ಆದರೂ ಗುರುಮನೆ ಎಂದರೆ ಕಟ್ಟಡವಲ್ಲ, ನಾವೇ ಗುರುಮನೆ” ಎಂದು ಅವರು ಹೇಳಿದರು.
ದುರಂತಕ್ಕೊಳಗಾದ ಜನರ ನೆರವಿಗೆ ತಕ್ಷಣ ಧಾವಿಸಿದ ಗುರುತರಬೇತಿಕೇಂದ್ರದ ವಿದ್ಯಾರ್ಥಿಗಳ ಧೈರ್ಯ ಮತ್ತು ಸೇವಾಭಾವವನ್ನೂ ಅವರು ಶ್ಲಾಘಿಸಿದರು. “ನಾನು ಅವರಿಗೆ, ‘ಇದರಿಂದ ನೀವು ದೇವರ ಚಿತ್ತವಿದ್ದರೆ ಉತ್ತಮ ಯಾಜಕರಾಗುವಿರಿ ಎಂಬುದು ಸ್ಪಷ್ಟವಾಗುತ್ತದೆ’ ಎಂದು ಹೇಳಿದೆ. ಗುರುಮನೆ ಎಂದರೆ ನಿಮ್ಮಲ್ಲಿ ಪ್ರತಿಯೊಬ್ಬರೂ ಎಂಬುದನ್ನು ಅವರಿಗೆ ನೆನಪಿಸಿದೆ. ಇದು ಪ್ರಭು ಯೇಸು ಕ್ರಿಸ್ತರಿಗೆ ಹಾಗೂ ಧರ್ಮಸಭೆಗೆ ಸೇವೆ ಸಲ್ಲಿಸುವ ದೇವರ ಕರೆಯನ್ನು ಮತ್ತೊಮ್ಮೆ ದೃಢಪಡಿಸಿಕೊಳ್ಳುವ ಸಮಯವಾಗಿದೆ” ಎಂದು ಅವರು ಹೇಳಿದರು.
ಲಾ ಗ್ವೈರಾದಲ್ಲಿ ತಮ್ಮ ಶಿಕ್ಷಣವನ್ನು ಮುಂದುವರಿಸಲು ಸೌಲಭ್ಯಗಳಿಲ್ಲದ ಕಾರಣ, ಗುರುಮನೆಯ ವಿದ್ಯಾರ್ಥಿಗಳನ್ನು ವೆನೆಜುವೆಲಾದ ರಾಜಧಾನಿಯ ಸಂತ ರೋಸಾ ಆಫ್ ಲಿಮಾ ಗುರುಮನೆ ಆತ್ಮೀಯವಾಗಿ ಸ್ವಾಗತಿಸಿದೆ. ಇದನ್ನು “ಕರಾಕಾಸ್ ಧರ್ಮಪ್ರಾಂತ್ಯೀಯ ವಲಯವು ತೋರಿದ ಅಪೂರ್ವ ಐಕಮತ್ಯದ ಸಂಕೇತ” ಎಂದು ವಂ. ಗುರು ವಾಸ್ಕೆಸ್ ಬಣ್ಣಿಸಿದರು.
ಮಾನವೀಯ ಪರಿಸ್ಥಿತಿ ಮತ್ತಷ್ಟು ಹದಗೆಟ್ಟಿದೆ
ವೆನೆಜುವೆಲಾದಲ್ಲಿ ಭೂಕಂಪದಿಂದ ಸ್ಥಳಾಂತರಗೊಂಡ ಜನರಿಗೆ ಆಶ್ರಯ ಮತ್ತು ರಕ್ಷಣಾ ಕಾರ್ಯಗಳನ್ನು ಸಂಯೋಜಿಸುತ್ತಿರುವ ವಿಶ್ವಸಂಸ್ಥೆಯ ನಿರಾಶ್ರಿತರ ಉನ್ನತ ಆಯುಕ್ತರ ಕಚೇರಿ (UNHCR), ಮಂಗಳವಾರ ಪ್ರಕಟಿಸಿದ ಹೇಳಿಕೆಯಲ್ಲಿ, ಪೀಡಿತ ಪ್ರದೇಶಗಳಲ್ಲಿನ ಮಾನವೀಯ ಪರಿಸ್ಥಿತಿ ಅತ್ಯಂತ ವೇಗವಾಗಿ ಹದಗೆಟ್ಟಿದೆ ಎಂದು ತಿಳಿಸಿದೆ. ಸಂಸ್ಥೆಯ ಪ್ರಕಾರ, “ಆಹಾರದ ತೀವ್ರ ಕೊರತೆ, ಮೂಲಭೂತ ಸೇವೆಗಳ ಸಂಪೂರ್ಣ ಕುಸಿತ ಹಾಗೂ ಸ್ಥಳಾಂತರಗೊಂಡ ಜನರ ಸುರಕ್ಷತೆಗೆ ಹೆಚ್ಚುತ್ತಿರುವ ಅಪಾಯಗಳು” ಸದ್ಯದ ಅತ್ಯಂತ ಗಂಭೀರ ಸವಾಲುಗಳಾಗಿವೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
