ಜಗದ್ಗುರು ಲಿಯೋ ಟಾಂಜಾನಿಯಾದ ವಿದೇಶಾಂಗ ಸಚಿವರನ್ನು ಭೇಟಿ ಮಾಡಿದರು
ವ್ಯಾಟಿಕನ್ ವರದಿ
ಬುಧವಾರ ನಡೆದ ಸಾಮಾನ್ಯ ಸಭೆಗೆ ಮುನ್ನ, ಜಗದ್ಗುರು XIVನೇ ಲಿಯೋರವರು ಟಾಂಜಾನಿಯಾದ ವಿದೇಶಾಂಗ ಸಚಿವರಾದ ಮಹ್ಮೂದ್ ಥಾಬಿತ್ ಕೊಂಬೊರವರನ್ನು ಭೇಟಿಯಾದರು. ಸಚಿವರು ಅಂತರರಾಷ್ಟ್ರೀಯ ಪ್ರವಾಸದಲ್ಲಿದ್ದು, ಕಳೆದ ಅಕ್ಟೋಬರ್ನಲ್ಲಿ ನಡೆದ ಚುನಾವಣೆಯಲ್ಲಿ ದೇಶದ ನಾಯಕಿಯಾಗಿ ದೃಢೀಕರಿಸಲ್ಪಟ್ಟ ಅಧ್ಯಕ್ಷೆ ಸಾಮಿಯಾ ಸುಲುಹು ಹಸ್ಸಾನ್ ರವರ ಸಂದೇಶವನ್ನು ಜಗದ್ಗುರುಗಳಿಗೆ ತಂದಿದ್ದರು.
2025ರ ಅಕ್ಟೋಬರ್ ಅಂತ್ಯದಲ್ಲಿ ನಡೆದ ಮತದಾನದ ಅವಧಿಯಲ್ಲಿ ಘರ್ಷಣೆಗಳು ಮತ್ತು ಹಿಂಸಾಚಾರ ಸಂಭವಿಸಿತು. ಅಂತರರಾಷ್ಟ್ರೀಯ ಮಾಧ್ಯಮಗಳ ವರದಿಗಳ ಪ್ರಕಾರ, ಈ ಹಿಂಸಾಚಾರದಲ್ಲಿ ನೂರಾರು ಮಂದಿ ಮೃತಪಟ್ಟರು.
ನಡೆದ ಘಟನೆಗಳನ್ನು ಪುನರ್ನಿರ್ಮಿಸಿ ಏನಾಯಿತು ಎಂಬುದನ್ನು ಸ್ಪಷ್ಟಪಡಿಸುವ ಉದ್ದೇಶದಿಂದ, ಟಾಂಜಾನಿಯಾದ ಅಧ್ಯಕ್ಷರು ಒಂದು ತನಿಖಾ ಆಯೋಗವನ್ನು ರಚಿಸಿದ್ದು, ಅದು ಈಗಾಗಲೇ ಕಾರ್ಯನಿರ್ವಹಿಸುತ್ತಿದೆ. ಇದುವರೆಗೆ ಶಾಂತಿಯುತವಾಗಿದ್ದ ಹಾಗೂ ಯಾವುದೇ ವಿಶೇಷ ಸಾಮಾಜಿಕ ಉದ್ವಿಗ್ನತೆಗಳಿಲ್ಲದಿದ್ದ ದೇಶದಲ್ಲಿ ಈ ಘಟನೆಗಳು ದೊಡ್ಡ ಆಘಾತವನ್ನುಂಟುಮಾಡಿವೆ.
ಈ ಹಿಂಸಾಚಾರವನ್ನು ಟಾಂಜಾನಿಯಾದ ಎಲ್ಲಾ ಧಾರ್ಮಿಕ ನಾಯಕರು ಬಿಷಪ್ಗಳಿಂದ ಹಿಡಿದು ಇಮಾಮ್ಗಳವರೆಗೆ ತೀವ್ರವಾಗಿ ಖಂಡಿಸಿದ್ದಾರೆ. ಸತ್ಯಾಂಶಗಳನ್ನು ಪತ್ತೆಹಚ್ಚಿ ಹೊಣೆಗಾರರನ್ನು ನಿರ್ಧರಿಸಲು ಸ್ವತಂತ್ರ ತನಿಖೆ ನಡೆಸಬೇಕೆಂದು ಅವರು ಆಗ್ರಹಿಸಿದ್ದಾರೆ.
ಈ ವಿಷಯದ ಕುರಿತು ಜಗದ್ಗುರು XIVನೇ ಲಿಯೋರವರು 2025ರ ನವೆಂಬರ್ 2ರಂದು ನಡೆದ ತ್ರಿಕಾಲ ಪ್ರಾರ್ಥನೆಯ ಸಂದರ್ಭದಲ್ಲಿ ಸಾರ್ವಜನಿಕವಾಗಿ ಮಾತನಾಡಿದರು. ಇತ್ತೀಚಿನ ಚುನಾವಣೆಯ ನಂತರ ಹಿಂಸಾತ್ಮಕ ಘರ್ಷಣೆಗಳು ಉಂಟಾಗಿ ಅನೇಕ ಬಲಿಗಳನ್ನುಂಟುಮಾಡಿರುವ ಟಾಂಜಾನಿಯಾಗಾಗಿ ನಾವು ಪ್ರಾರ್ಥಿಸೋಣ. ಎಲ್ಲರೂ ಎಲ್ಲಾ ರೀತಿಯ ಹಿಂಸೆಯಿಂದ ದೂರವಿದ್ದು, ಸಂವಾದದ ಮಾರ್ಗವನ್ನು ಅನುಸರಿಸಬೇಕೆಂದು ನಾನು ಮನವಿ ಮಾಡುತ್ತೇನೆ” ಎಂದು ಜಗದ್ಗುರುಗಳು ಹೇಳಿದರು.
