ಜಗದ್ಗುರುಗಳು ರೋಮನ್ ರೋಟಾಗೆ: ದೇವರ ರಹಸ್ಯದಲ್ಲಿ ನ್ಯಾಯ ಮತ್ತು ದಾನ ಪರಸ್ಪರ ಸಮ್ಮಿಲನಗೊಳ್ಳುತ್ತವೆ
ವ್ಯಾಟಿಕನ್ ವರದಿ
ಜಗದ್ಗುರು XIVನೇ ಲಿಯೋರವರು ವಾಟಿಕನ್ನಲ್ಲಿ ರೋಮನ್ ರೋಟಾ ನ್ಯಾಯಮಂಡಳಿಯ ನ್ಯಾಯಾಂಗ ವರ್ಷದ ಉದ್ಘಾಟನೆಯ ಸಂದರ್ಭದಲ್ಲಿ ಅದರ ಪ್ರಿಲೇಟ್ ನ್ಯಾಯಾಧೀಶರನ್ನು ಉದ್ದೇಶಿಸಿ ಮಾತನಾಡಿದರು. ಕಟ್ಟುನಿಟ್ಟಿನೊಂದಿಗೆ ಆದರೆ ಕಠೋರತೆಯಿಲ್ಲದೆ ಸತ್ಯವನ್ನು ಕಾಪಾಡಬೇಕು ಮತ್ತು ಯಾವುದೇ ಕೊರತೆಯಿಲ್ಲದೆ ದಾನವನ್ನು ಅನುಷ್ಠಾನಗೊಳಿಸಬೇಕು ಎಂಬುದಾಗಿ ಅವರು ಆಹ್ವಾನ ನೀಡಿದರು. ಧರ್ಮ ಸಭೆಯೊಳಗಿನ ಹಕ್ಕುಗಳನ್ನು ಸಂರಕ್ಷಿಸುವ ಉದ್ದೇಶದಿಂದ ಪ್ರೇಷಿತರ ಹುದ್ದೆಯಲ್ಲಿ ಉನ್ನತ ನ್ಯಾಯಾಲಯವಾಗಿ ಕಾರ್ಯನಿರ್ವಹಿಸುವ ರೋಮನ್ ರೋಟಾದ ಮಹತ್ವವನ್ನು ಅವರು ಸ್ಮರಿಸಿದರು.
ತಮ್ಮ ಮಾತುಗಳನ್ನು ಆರಂಭಿಸಿದ ಜಗದ್ಗುರುಗಳು ನ್ಯಾಯಮಂಡಳಿಯ ಅಧಿಕಾರಿಗಳು ನಿರ್ವಹಿಸುವ ಸೇವೆ ವಿಶ್ವವ್ಯಾಪಿ ಧರ್ಮ ಸಭೆಯ ನ್ಯಾಯಾಂಗ ಕಾರ್ಯದಲ್ಲಿ ಅತ್ಯಂತ ಅಮೂಲ್ಯವಾದುದೆಂದು ಕೃತಜ್ಞತೆ ಸಲ್ಲಿಸಿದರು. “ಪ್ರೇಮದಲ್ಲಿ ಸತ್ಯವನ್ನು ನಡೆಸುವುದು” (ಎಫೆಸಿಯ 4:15) ಎಂಬ ಸಂತ ಪೌಲರ ವಾಕ್ಯವು ನ್ಯಾಯ ನಿರ್ವಹಣೆಯಲ್ಲಿನ ಅವರ ದೈನಂದಿನ ಕರ್ತವ್ಯಕ್ಕೆ ಸೂಕ್ತವಾಗುತ್ತದೆ ಎಂದು ಅವರು ಹೇಳಿದರು. ನ್ಯಾಯಾಧೀಶರ ಸೇವೆಯ ಆಧ್ಯಾತ್ಮಿಕ ಮತ್ತು ಚರ್ಚಾತ್ಮಕ ಮಹತ್ವವನ್ನು ತಾವು ಆಳವಾಗಿ ಅರ್ಥಮಾಡಿಕೊಳ್ಳಬಲ್ಲೆನೆಂದು ಜಗದ್ಗುರುಗಳು ಅಭಿಪ್ರಾಯಪಟ್ಟರು.
ನ್ಯಾಯಕ್ಕೆ ಅಂತರ್ನಿಹಿತವಾಗಿರುವ ಸತ್ಯ ಮತ್ತು ದಾನ ಎಂಬ ಗುಣಗಳ ನಡುವಿನ ಆಳವಾದ ಸಂಬಂಧದ ಕುರಿತು ಜಗದ್ಗುರುಗಳು ವಿಶೇಷವಾಗಿ ಗಮನ ಸೆಳೆದರು. ಸತ್ಯ ಮತ್ತು ದಾನವು ಪರಸ್ಪರ ವಿರೋಧಿಗಳಲ್ಲ, ಅಥವಾ ಕೇವಲ ಪ್ರಾಯೋಗಿಕ ಸಮತೋಲನಕ್ಕೆ ಒಳಪಟ್ಟ ಮೌಲ್ಯಗಳಲ್ಲ ಅವು ದೇವರ ರಹಸ್ಯದಲ್ಲೇ ಆಳವಾಗಿ ಒಂದಾಗಿ ಬೆಸೆದುಕೊಂಡಿರುವ ಆಯಾಮಗಳಾಗಿವೆ ಎಂದು ಅವರು ಸ್ಪಷ್ಟಪಡಿಸಿದರು. ನ್ಯಾಯದ ಸತ್ಯ ಮತ್ತು ಪ್ರೀತಿಯ ದಾನ ಎರಡೂ ದೇವರಲ್ಲಿಯೇ ಪರಿಪೂರ್ಣ ಸಮ್ಮಿಲನವನ್ನು ಕಂಡುಕೊಳ್ಳುತ್ತವೆ ಎಂದು ಜಗದ್ಗುರುಗಳು ಹೇಳಿದರು.
ಆದರೆ ಕೆಲವೊಮ್ಮೆ ನಂಬಿಗಸ್ತರ ಸಂಕೀರ್ಣ ಪರಿಸ್ಥಿತಿಗಳೊಂದಿಗೆ ಅತಿಯಾದ ಸಹಾನುಭೂತಿ ತೋರಿದಾಗ ಸತ್ಯವನ್ನು ಸಂಬಂಧಿಕಗೊಳಿಸುವ ಅಪಾಯ ಉಂಟಾಗುತ್ತದೆ ಎಂದು ಜಗದ್ಗುರುಗಳು ಎಚ್ಚರಿಸಿದರು. ತಪ್ಪಾಗಿ ಅರ್ಥೈಸಿದ ಕರುಣೆ, ಧರ್ಮಾಧೀಕಾರಿಗಳ ಉತ್ಸಾಹದಿಂದ ಪ್ರೇರಿತವಾಗಿದ್ದರೂ ಸಹ, ನ್ಯಾಯಾಂಗ ಕರ್ತವ್ಯಕ್ಕೆ ಅಗತ್ಯವಾದ ಸತ್ಯದ ಪರಿಶೀಲನೆಯನ್ನು ಮಸುಕಾಗಿಸಬಹುದು ಎಂದು ಅವರು ಹೇಳಿದರು. ಅದೇ ವೇಳೆ, ಪ್ರೀತಿಯ ಅವಶ್ಯಕತೆಗಳನ್ನು ಪರಿಗಣಿಸದೆ ಕೇವಲ ಶೀತ ಮತ್ತು ನಿರ್ಲಿಪ್ತ ರೀತಿಯಲ್ಲಿ ಸತ್ಯವನ್ನು ಪ್ರತಿಪಾದಿಸುವುದೂ ನ್ಯಾಯಪ್ರಕ್ರಿಯೆಗೆ ಹಾನಿಕಾರಕವೆಂದು ಅವರು ಸೂಚಿಸಿದರು.
ನ್ಯಾಯಾಂಗ ಪ್ರಕ್ರಿಯೆಯು ಪರಸ್ಪರ ವಿರೋಧಿ ಹಿತಾಸಕ್ತಿಗಳ ನಡುವಿನ ಸಂಘರ್ಷವಲ್ಲ, ಬದಲಾಗಿ ನಿರ್ದಿಷ್ಟ ಪ್ರಕರಣದಲ್ಲಿ ಸತ್ಯ ಮತ್ತು ನ್ಯಾಯವನ್ನು ಗುರುತಿಸಲು ಅಗತ್ಯವಾದ ಉಪಕರಣವಾಗಿದೆ ಎಂದು ಜಗದ್ಗರು XIVನೇ ಲಿಯೋರವರು ವಿವರಿಸಿದರು. ನ್ಯಾಯಸಮ್ಮತತೆ, ಸಮಾನತೆ ಮತ್ತು ಕಟ್ಟುನಿಟ್ಟಿನ ನಿಯಮಗಳನ್ನು ಪಾಲಿಸದೆ ನಡೆಯುವ ಕ್ರಮಗಳು ಧರ್ಮ ಸಭೆಯ ಕಾನೂನುಸಮ್ಮತ ಏಕತೆಗೆ ಗಂಭೀರ ಹಾನಿಯನ್ನುಂಟುಮಾಡುತ್ತವೆ ಎಂದು ಅವರು ಎಚ್ಚರಿಸಿದರು.
ಮಾತಿನ ಅಂತ್ಯದಲ್ಲಿ, ಕಾನೂನುಬದ್ಧ ವಿವಾಹ ಕಾನೂನಿನ ಅಧ್ಯಯನ ಮತ್ತು ಅನುಷ್ಠಾನವು ವೈಜ್ಞಾನಿಕ ಗಂಭೀರತೆ ಹಾಗೂ ಧರ್ಮ ಸಭೆಯ ಉಪದೇಶದೊಂದಿಗೆ ನಿಷ್ಠೆಯೊಂದಿಗೆ ಮುಂದುವರಿಯಬೇಕು ಎಂದು ಜಗದ್ಗುರುಗಳು ಒತ್ತಿಹೇಳಿದರು. ಸತ್ಯ ಮತ್ತು ದಾನದಲ್ಲಿ ಪರಿಪೂರ್ಣ ಮಾದರಿಯಾಗಿರುವ ಕನ್ಯಾ ಮರಿಯಮ್ಮನ ಮಧ್ಯಸ್ಥಿಕೆಗೆ ತಮ್ಮ ಕಾರ್ಯವನ್ನು ಒಪ್ಪಿಸುತ್ತಾ, ಕ್ರೈಸ್ತ ನ್ಯಾಯದ ನಿಜವಾದ ಜ್ಞಾನವು ಲೋಕದಲ್ಲಿ ಪ್ರಕಾಶಿಸಲಿ ಎಂದು ಅವರು ಪ್ರಾರ್ಥಿಸಿದರು.
