ಜಗದ್ಗುರು XIVನೇ ಲಿಯೋರವರು: ಸೃಷ್ಟಿಯ ಸಂರಕ್ಷಣೆ ಸಾಮೂಹಿಕ ಹಿತಕ್ಕೆ ಸೇವೆಯಾಗುತ್ತದೆ.

ವ್ಯಾಟಿಕನ್ ವರದಿ

ಎಡಿತ್ ಹ್ಯಾಬರ್ಲ್ಯಾಂಡ್-ವ್ಯಾಗ್ನರ್ ಫೌಂಡೇಶನ್ ಹಾಗೂ ಮ್ಯೂನಿಕ್‌ನ ಐತಿಹಾಸಿಕ ಅಗಸ್ಟಿನರ್-ಬ್ರಾವ್ (ಆಗಸ್ಟಿನರ್ ಬ್ರೂವರಿ) ಸಂಸ್ಥೆಯ ಯಾತ್ರಿಕರನ್ನು ಸ್ವಾಗತಿಸಿದ ಜಗದ್ಗುರು XIVನೇ ಲಿಯೋರವರು, ಅಗಸ್ಟಿನಿಯನ್ ಪರಂಪರೆಯ ಆಧ್ಯಾತ್ಮಿಕ ಪರಂಪರೆಯನ್ನು ಕುರಿತು ಮನನ ಮಾಡುತ್ತಾ, ಸೃಷ್ಟಿಯ ಜವಾಬ್ದಾರಿಯುತ ಸಂರಕ್ಷಣೆಗೆ ಸಭೆಯ ಕರೆಯನ್ನು ಪುನರುಚ್ಚರಿಸಿದರು.

ಶನಿವಾರ ಬೆಳಿಗ್ಗೆ ವ್ಯಾಟಿಕನ್‌ನಲ್ಲಿ ಮಾತನಾಡಿದ ಜಗದ್ಗುರುಗಳು, ಸಂತ ಪೇತ್ರರ ಪೀಠಕ್ಕೆ ತಮ್ಮ ಆಯ್ಕೆಯ ವಾರ್ಷಿಕೋತ್ಸವವನ್ನು ರೋಮಿನ ಯಾತ್ರೆಯ ಮೂಲಕ ಆಚರಿಸಿರುವುದಕ್ಕಾಗಿ ಹಾಗೂ ತಮ್ಮ ಅಧಿಕಾರ ಸೇವೆಗೆ “ಪ್ರಾರ್ಥನಾಪೂರ್ಣ ಬೆಂಬಲ” ನೀಡಿರುವುದಕ್ಕಾಗಿ ಯಾತ್ರಿಕರಿಗೆ ಕೃತಜ್ಞತೆ ಸಲ್ಲಿಸಿದರು.

ಬವೇರಿಯಾದ ಬ್ರೂವರಿಯ ಪ್ರತಿನಿಧಿಗಳು ನೀಡಿದ ಉಡುಗೊರೆಗಳಿಗೂ ಜಗದ್ಗುರುಗಳು ಧನ್ಯವಾದ ಸಲ್ಲಿಸಿ, ಅವರ ಇತಿಹಾಸ ಮತ್ತು ಧ್ಯೇಯದಿಂದ ಪ್ರೇರಿತವಾದ ಎರಡು ಆಲೋಚನೆಗಳನ್ನು ಹಂಚಿಕೊಂಡರು.

ಮೊದಲನೆಯದಾಗಿ, ಅಗಸ್ಟಿನರ್ ಬ್ರೂವರಿಯು ಅಗಸ್ಟಿನಿಯನ್ ಧಾರ್ಮಿಕ ಸಂಘದೊಂದಿಗೆ ಹೊಂದಿರುವ ಐತಿಹಾಸಿಕ ಸಂಬಂಧವನ್ನು ಸ್ಮರಿಸಿದ ಜಗದ್ಗುರುಗಳು, ಸಂತ ಅಗಸ್ಟಿನ್ ರವರ ಆತ್ಮೀಯತೆಯು ತಮ್ಮ ಜೀವನದಲ್ಲಿಯೂ ಎಷ್ಟೊಂದು ಮಹತ್ವ ಹೊಂದಿದೆ ಎಂಬುದನ್ನು ಹೇಳಿದರು. 2025ರಲ್ಲಿ ವಿಲ್ಲನೋವಾ ಸಂತ ಥೋಮಸ್ ಅಗಸ್ಟಿನಿಯನ್ ಪ್ರಾಂತ್ಯಕ್ಕೆ ಕಳುಹಿಸಿದ್ದ ವಿಡಿಯೋ ಸಂದೇಶವನ್ನು ಉಲ್ಲೇಖಿಸಿದ ಅವರು, “ದೇವರು ಪ್ರತಿಯೊಬ್ಬರಿಗೂ ವಿಶೇಷವಾದ ವರಗಳು ಮತ್ತು ಪ್ರತಿಭೆಗಳನ್ನು ನೀಡಿದ್ದಾರೆ, ಅವುಗಳನ್ನು ದೇವರಿಗೂ ಮತ್ತು ನಮ್ಮ ನೆರೆಯವರಿಗೂ ಪ್ರೀತಿಪೂರ್ವಕ ಸೇವೆಯಾಗಿ ಅರ್ಪಿಸುವುದರಲ್ಲಿಯೇ ನಮ್ಮ ಉದ್ದೇಶ, ಸಂತೃಪ್ತಿ ಮತ್ತು ಸಂತೋಷ ಅಡಗಿದೆ” ಎಂದು ಸಂತ ಅಗಸ್ಟಿನ್ ರವರನ್ನು ನೆನಪಿಸುತ್ತಾರೆ ಎಂದು ಹೇಳಿದರು.

ನಂತರ ಜಗದ್ಗುರುಗಳು, ಜಗದ್ಗುರು ಫ್ರಾನ್ಸಿಸ್ ರವರ ಲಾದಾಟೊ ಸಿ' ಎನ್ಸೈಕ್ಲಿಕಲ್ ಪತ್ರಿಕೆಯ ಕುರಿತು ಮಾತನಾಡಿದರು. ಇತ್ತೀಚೆಗೆ ಜಗದ್ಗುರು ಫ್ರಾನ್ಸಿಸ್ ರವರ ನಿಧನದ ಮೊದಲ ವಾರ್ಷಿಕೋತ್ಸವವನ್ನು ಸಭೆ ಸ್ಮರಿಸಿಕೊಂಡಿರುವುದನ್ನು ಉಲ್ಲೇಖಿಸಿದ ಅವರು, ಮಾನವ ಜೀವನವನ್ನು ಪೋಷಿಸುವ ಆಹಾರ ಮತ್ತು ಪಾನೀಯ ಸೇರಿದಂತೆ “ದೇವರು ನೀಡಿದ ಸೃಷ್ಟಿಯ ಮಹಿಮೆ” ಕುರಿತು ಜಗದ್ಗುರು ಫ್ರಾನ್ಸಿಸ್ ನೀಡಿದ ಬೋಧನೆಯನ್ನು ನೆನಪಿಸಿದರು.

ಎನ್ಸೈಕ್ಲಿಕಲ್ ಪತ್ರಿಕೆಯನ್ನು ಉಲ್ಲೇಖಿಸಿದ ಜಗದ್ಗುರುಗಳು, ಪ್ರತಿಯೊಂದು ಸೃಷ್ಟಿಯಲ್ಲಿಯೂ ದೇವರ ಪ್ರೀತಿ ಪ್ರತಿಫಲಿಸುತ್ತದೆ ಮತ್ತು “ಎಲ್ಲವೂ ದೇವರ ಮಮತೆಯ ಸ್ಪರ್ಶದಂತಿದೆ” ಎಂದು ಹೇಳಿದರು. ಈ ಅರಿವು ಸೃಷ್ಟಿಯನ್ನು ಕಾಪಾಡುವ ಮತ್ತು ಅದರ ಸಂಪನ್ಮೂಲಗಳನ್ನು ಜಾಣ್ಮೆಯಿಂದ ಹಾಗೂ ನ್ಯಾಯಪೂರ್ವಕವಾಗಿ ಬಳಸುವ ಮಹತ್ತರ ಹೊಣೆಗಾರಿಕೆಯನ್ನು ಮಾನವಕುಲಕ್ಕೆ ನೀಡುತ್ತದೆ ಎಂದು ಅವರು ತಿಳಿಸಿದರು.

“ನ್ಯಾಯವೇ ಶಾಂತಿಯ ಪೂರ್ವಶರತ್ತು” ಎಂದು ಜಗದ್ಗುರುಗಳು ವಿವರಿಸಿದರು. ಯಾತ್ರಿಕರು ಜರ್ಮನಿಗೆ ಮರಳಲು ಸಿದ್ಧವಾಗುತ್ತಿದ್ದಾಗ, ತಮ್ಮ ವೃತ್ತಿಪರ ಚಟುವಟಿಕೆಗಳಲ್ಲಿಯೂ ಮತ್ತು ವೈಯಕ್ತಿಕ ಜೀವನದಲ್ಲಿಯೂ “ಸೃಷ್ಟಿಯ ಸಂರಕ್ಷಣೆಯ ನ್ಯಾಯಸಮ್ಮತ ಮತ್ತು ಪರಿಣಾಮಕಾರಿ ದೃಷ್ಟಿಕೋನವನ್ನು” ಮುಂದುವರಿಸಿ, ಸಾಮೂಹಿಕ ಹಿತಕ್ಕಾಗಿ ಕಾರ್ಯನಿರ್ವಹಿಸುವಂತೆ ಅವರು ಪ್ರೋತ್ಸಾಹಿಸಿದರು.

ಅಗಸ್ಟಿನರ್ ಬ್ರೂವರಿಯ ಇತಿಹಾಸವು ಮ್ಯೂನಿಕ್‌ನ ಅಗಸ್ಟಿನಿಯನ್ ಧಾರ್ಮಿಕರೊಂದಿಗೆ ಆಪ್ತವಾಗಿ ಸಂಪರ್ಕ ಹೊಂದಿದೆ. 1328ರಲ್ಲಿ ಅಗಸ್ಟಿನಿಯನ್ ಸನ್ಯಾಸಿಗಳು ಮ್ಯೂನಿಕ್ ಮಹಾಗಿರ್ಜೆಯ ಸಮೀಪದ ತಮ್ಮ ಮಠದಲ್ಲಿ ಬಿಯರ್ ತಯಾರಿಸಲು ಆರಂಭಿಸಿದರು. ಸುಮಾರು ಐದು ಶತಮಾನಗಳ ಕಾಲ ಅವರು ಮಠದ ಬ್ರೂವರಿಯಿಂದಲೇ ಬಿಯರ್ ಉತ್ಪಾದಿಸಿ ಮಾರಾಟ ಮಾಡುತ್ತಿದ್ದರು. 1803ರಲ್ಲಿ ಧರ್ಮನಿರಪೇಕ್ಷೀಕರಣದ ನಂತರ, ಬವೇರಿಯಾ ಸರ್ಕಾರ ಮಠ ಮತ್ತು ಬ್ರೂವರಿಯ ನಿಯಂತ್ರಣವನ್ನು ವಹಿಸಿಕೊಂಡು, ನಂತರ ಅದನ್ನು ಖಾಸಗೀಕರಣಗೊಳಿಸಲಾಯಿತು. 1829ರಲ್ಲಿ ಫ್ರೈಸಿಂಗ್‌ನ ಬ್ರೂವರ್ ಆಂಟನ್ ವಾಗ್ನರ್ ಈ ಸಂಸ್ಥೆಯನ್ನು ಸ್ವಾಧೀನಪಡಿಸಿಕೊಂಡರು, ಮತ್ತು ಆ ಸಮಯದಿಂದ ಇಂದಿನವರೆಗೂ ಅದು ಖಾಸಗಿ ಸ್ವಾಮ್ಯದಲ್ಲೇ ಮುಂದುವರಿದಿದೆ. ಬಳಿಕ, ಆಂಟನ್ ರವರ ಪುತ್ರ ಜೋಸೆಫ್ ವಾಗ್ನರ್ ಮ್ಯೂನಿಕ್‌ನ ಲಾಂಡ್ಸ್‌ಬರ್ಗರ್ ಸ್ಟ್ರಾಸೆಯಲ್ಲಿ ಆಧುನಿಕ ಬ್ರೂವರಿಯನ್ನು ನಿರ್ಮಿಸಿದರು.1884ರಿಂದ ಅಗಸ್ಟಿನರ್ ಬಿಯರ್‌ನ ಪ್ರತಿಯೊಂದು ಹನಿಯೂ ಅಲ್ಲಿ ಉತ್ಪಾದಿಸಲಾಗುತ್ತಿದೆ.

ಅಗಸ್ಟಿನರ್ ಬ್ರೂವರಿಯ ಮುಖ್ಯ ವಾರಸುದಾರರಿಂದ ಸ್ಥಾಪಿತವಾದ ಎಡಿತ್ ಹ್ಯಾಬರ್ಲ್ಯಾಂಡ್-ವ್ಯಾಗ್ನರ್ ಫೌಂಡೇಶನ್ ಸಂಸ್ಥೆ, ಸಾಮಾಜಿಕ ಹೊಣೆಗಾರಿಕೆಯನ್ನು ಉತ್ತೇಜಿಸುವ ಹಲವಾರು ಕಾರ್ಯಗಳನ್ನು ನಡೆಸುತ್ತಿದೆ. ಈ ಸಂಸ್ಥೆ ಅಗಸ್ಟಿನರ್ ಬ್ರೂವರಿಯ ಪರಂಪರೆಯನ್ನು ಸಂರಕ್ಷಿಸುವುದರ ಜೊತೆಗೆ, ಸ್ಮಾರಕಗಳ ರಕ್ಷಣೆ, ಶಿಕ್ಷಣ, ಯುವಜನರ ಅಭಿವೃದ್ಧಿ, ಕಲೆ ಮತ್ತು ಸಂಸ್ಕೃತಿ, ದಾನಧರ್ಮ, ಕ್ರೀಡೆ, ಪ್ರಾಣಿಗಳ ಕಲ್ಯಾಣ, ಪರಿಸರ ಸಂರಕ್ಷಣೆ ಮತ್ತು ವಿಜ್ಞಾನ ಕ್ಷೇತ್ರಗಳಲ್ಲಿ ವಿವಿಧ ಸೇವಾ ಯೋಜನೆಗಳಿಗೆ ಬೆಂಬಲ ನೀಡುತ್ತಿದೆ.