ಶಾಂತಿ ಮತ್ತು ಅಭಿವೃದ್ಧಿಗಾಗಿ ಸಾಹೆಲ್ ಪ್ರದೇಶದಲ್ಲಿ ಹೊಸ ಬದ್ಧತೆಯನ್ನು ತೋರಲು ಜಗದ್ಗುರುಗಳು ಕರೆ ನೀಡಿದರು.
ವ್ಯಾಟಿಕನ್ ವರದಿ
ಶನಿವಾರ, ಜಗದ್ಗುರು XIVನೇ ಲಿಯೋರವರು ಸಾಹೆಲ್ ಪ್ರದೇಶಕ್ಕಾಗಿ ಸ್ಥಾಪಿತವಾದ ದ್ವಿತೀಯ ಜಾನ್ ಪಾಲ್ ರವರ ಪ್ರತಿಷ್ಠಾನದ ನಿರ್ದೇಶಕರ ಮಂಡಳಿಯ ಸದಸ್ಯರನ್ನು ಭೇಟಿ ಮಾಡಿ, ವಿಶ್ವದ ಅತ್ಯಂತ ಅಸ್ಥಿರ ಪ್ರದೇಶಗಳಲ್ಲಿ ಒಂದಾದ ಸಾಹೆಲ್ನಲ್ಲಿ ಶಾಂತಿ, ಐಕ್ಯತೆ ಮತ್ತು ಸಮಗ್ರ ಮಾನವ ಅಭಿವೃದ್ಧಿಯನ್ನು ಉತ್ತೇಜಿಸುವ ಅವರ ಧ್ಯೇಯವನ್ನು ಮುಂದುವರಿಸಲು ಪ್ರೋತ್ಸಾಹಿಸಿದರು.
ವ್ಯಾಟಿಕನ್ನಲ್ಲಿ ಪ್ರತಿನಿಧಿ ಮಂಡಳಿಯನ್ನು ಸ್ವಾಗತಿಸಿದ ಜಗದ್ಗುರಗಳು, ಶಾಂತಿಯನ್ನು ಕೇವಲ ಒಂದು ಆಶಯವೆಂದು ಅಲ್ಲ, ಆದರೆ ಶಾಶ್ವತತೆಯಲ್ಲೇ ಬೇರುಬಿಟ್ಟಿರುವ ದೈವಿಕ ವರವೆಂದು ವಿವರಿಸಿದರು.
“ಶಾಂತಿಯಲ್ಲಿ ಶಾಶ್ವತತೆಯ ಉಸಿರು ಇದೆ” ಎಂದು ಅವರು ಹೇಳಿದರು. ಈ ಸಂದರ್ಭದಲ್ಲಿ, ಕ್ರೈಸ್ತರು ಶಾಂತಿಯೊಂದಿಗೆ ಅವಿಭಾಜ್ಯ ಸ್ನೇಹವನ್ನು ಬೆಳೆಸಬೇಕು ಎಂಬ ಸಂತ ಅಗಸ್ಟಿನ್ ರವರ ಆಹ್ವಾನವನ್ನು ಅವರು ಸ್ಮರಿಸಿದರು, ಹೀಗೆ ಅದರ “ಪ್ರಕಾಶಮಾನವಾದ ಬೆಳಕು” ಜಗತ್ತಿನಾದ್ಯಂತ ಹರಡಲಿ ಎಂದು ಹೇಳಿದರು.
1980ರಲ್ಲಿ ಬುರ್ಕಿನಾ ಫಾಸೋ ದೇಶಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ವಾಗಾಡುಗೂ ನಗರದಲ್ಲಿ ಮಾಡಿದ ಮನವಿಯ ನಂತರ, ಜಗದ್ಗುರು ಸಂತ ದ್ವಿತೀಯ ಜಾನ್ ಪಾಲ್ ರವರು 1984ರಲ್ಲಿ ಈ ಪ್ರತಿಷ್ಠಾನವನ್ನು ಸ್ಥಾಪಿಸಿದರು. ಸಾಹೆಲ್ ಪ್ರದೇಶದ ಜನರು ಮರುಭೂಮೀಕರಣ, ಬಡತನ, ಬರಗಾಲ ಮತ್ತು ಹಿಂದುಳಿತದ ಸಮಸ್ಯೆಗಳನ್ನು ಎದುರಿಸುತ್ತಿದ್ದ ಹಿನ್ನೆಲೆಯಲ್ಲಿ ಅವರಿಗೆ ನೆರವಾಗುವುದೇ ಇದರ ಉದ್ದೇಶವಾಗಿತ್ತು. ಇಂದು, ಈ ಪ್ರತಿಷ್ಠಾನವು ಆಹಾರ ಭದ್ರತೆ, ನೀರಿನ ಲಭ್ಯತೆ, ಶಾಶ್ವತ ಕೃಷಿ ಮತ್ತು ಸಮಗ್ರ ಮಾನವ ಅಭಿವೃದ್ಧಿಗೆ ಸಂಬಂಧಿಸಿದ ಯೋಜನೆಗಳನ್ನು ಸಾಹೆಲ್ ಪ್ರದೇಶದ ಅನೇಕ ರಾಷ್ಟ್ರಗಳಲ್ಲಿ ಉತ್ತೇಜಿಸುತ್ತದೆ.
ಪ್ರತಿಷ್ಠಾನಕ್ಕೆ ಹೊಸ ಅಧ್ಯಾಯ
ಜಗದ್ಗುರು ಲಿಯೋರವರು ಜಗದ್ಗುರು ಫ್ರಾನ್ಸಿಸ್ ರವರ ಕಾಲದಲ್ಲಿ ಪ್ರಾಂತ್ಯದ ಪ್ರತಿನಿಧಿಯಾಗಿ ಸೇವೆ ಸಲ್ಲಿಸಿದ ಬಿಷಪ್ ಹಾಸ್ಸಾ ಫ್ಲೋರೆಂಟ್ ಕೋನೇ ರವರಿಗೆ ಕೃತಜ್ಞತೆ ಸಲ್ಲಿಸಿದರು. ಜೊತೆಗೆ, ರೋಮನ್ ಪ್ರಾಂತ್ಯದ ಮತ್ತು ಸಮಗ್ರ ಮಾನವ ಅಭಿವೃದ್ಧಿಯನ್ನು ಉತ್ತೇಜಿಸುವ ಡಿಕಾಸ್ಟ್ರಿಯೊಂದಿಗೆ ಸಹಯೋಗದಲ್ಲಿ ನಡೆದ ಕಾರ್ಯವನ್ನು ಶ್ಲಾಘಿಸಿ, ಪ್ರತಿಷ್ಠಾನವನ್ನು “ಹೊಸ ಆರಂಭದ” ದಾರಿಗೆ ಕೊಂಡೊಯ್ಯಲಾಗಿದೆ ಎಂದು ಹೇಳಿದರು.
ನಲವತ್ತು ವರ್ಷಗಳ ಸೇವೆಯ ನಂತರ, ಪ್ರತಿಷ್ಠಾನವು ಈಗ “ತಿರುವುಮುಖದ ಹಂತಕ್ಕೆ” ತಲುಪಿದೆ ಎಂದು ಜಗದ್ಗುರುಗಳು ಹೇಳಿದರು. ಜಾಗತಿಕ ಆರ್ಥಿಕ ಸಂಕಷ್ಟಗಳು ಮತ್ತು ಅಸ್ಥಿರತೆಯಿಂದ ಉಂಟಾದ ಬಾಹ್ಯ ಸವಾಲುಗಳನ್ನು ಇದು ಎದುರಿಸುತ್ತಿದೆ ಎಂದರು. ಈ ಹಿನ್ನೆಲೆಯಲ್ಲಿ ಪ್ರತಿಷ್ಠಾನದ ಧ್ಯೇಯ ಮತ್ತು ರಚನೆಯನ್ನು ನವೀಕರಿಸುವುದು ಅಗತ್ಯವಾಯಿತು ಎಂದು ಅವರು ವಿವರಿಸಿದರು.
ಫೆಬ್ರವರಿಯಲ್ಲಿ ಡಕಾರ್ನಲ್ಲಿ ನಡೆದ ಮಂಡಳಿ ಸಭೆ ಈ ನವೀಕರಣದ ಪ್ರಮುಖ ಹಂತವಾಗಿದ್ದು, ಹೊಸ ನಿಯಮಾವಳಿಗಳನ್ನು ಅಂಗೀಕರಿಸುವುದು, ಹೊಸ ಅಧ್ಯಕ್ಷರನ್ನು ಆಯ್ಕೆ ಮಾಡುವುದು ಮತ್ತು ಹೊಸ ಮಂಡಳಿ ಸದಸ್ಯರನ್ನು ನೇಮಿಸುವುದನ್ನು ಒಳಗೊಂಡಿತ್ತು.
ಈ ಹೊಸ ನಿಯಮಾವಳಿಗಳೊಂದಿಗೆ, ಎಂದು ಜಗದ್ಗುರು ಲಿಯೋರವರು ಹೇಳಿದರು, “ಪ್ರತಿಷ್ಠಾನವು ತನ್ನ ಮೂಲ ಧ್ಯೇಯದ ನಿರಂತರತೆಯನ್ನು ಉಳಿಸಿಕೊಂಡು ಹೊಸ ರೂಪವನ್ನು ಪಡೆದುಕೊಳ್ಳುತ್ತಿದೆ.”
ಸಾಹೆಲ್ ಪ್ರದೇಶ ಎದುರಿಸುತ್ತಿರುವ ಸವಾಲುಗಳು
ನಂತರ ಸಾಹೆಲ್ ಪ್ರದೇಶದ ಪರಿಸ್ಥಿತಿಯ ಬಗ್ಗೆ ಮಾತನಾಡಿದ ಜಗದ್ಗುರುಗಳು, ಆ ಪ್ರದೇಶ ಮತ್ತು ವಿಶ್ವವನ್ನು ಕಾಡುತ್ತಿರುವ ಅನೇಕ ಸಮಸ್ಯೆಗಳತ್ತ ಗಮನ ಸೆಳೆದರು. ಭೂರಾಜಕೀಯ ಉದ್ವಿಗ್ನತೆ, ಅಸಮಾನತೆ, ಯುದ್ಧ, ಭಯೋತ್ಪಾದನೆ, ಅಸುರಕ್ಷತೆ, ರಾಜಕೀಯ ಮತ್ತು ಆರ್ಥಿಕ ಅಸ್ಥಿರತೆ, ಹವಾಮಾನ ಸಂಕಷ್ಟಗಳು ಹಾಗೂ ಅದರ ಪರಿಣಾಮವಾಗಿ ಹೆಚ್ಚುತ್ತಿರುವ ವಲಸೆ ಸಮಸ್ಯೆಗಳು.
ಈ ಹಿನ್ನೆಲೆಯಲ್ಲಿ, ಜಗದ್ಗುರು ಫ್ರಾನ್ಸಿಸ್ ರವರು “ನಮ್ಮ ಸಾಮಾನ್ಯ ಮನೆ” ಎಂದು ಕರೆದ ಭೂಮಿಯನ್ನು ರಕ್ಷಿಸುವುದಲ್ಲದೆ, ಐಕ್ಯತೆ ಮತ್ತು ಅಭಿವೃದ್ಧಿಯ ಸ್ಪಷ್ಟ ಯೋಜನೆಗಳ ಮೂಲಕ ಮಾನವ ಗೌರವವನ್ನು ಕಾಪಾಡುವಲ್ಲಿ ಪ್ರತಿಷ್ಠಾನದ ಪಾತ್ರ ಮಹತ್ವದ್ದಾಗಿದೆ ಎಂದು ಅವರು ಒತ್ತಿಹೇಳಿದರು.
ಪ್ರಕೃತಿ ವಿಕೋಪಗಳಿಂದ ಬಳಲುತ್ತಿರುವವರಿಗೆ ನೆರವಾಗುವುದು ಮತ್ತು ದುರ್ಬಲರಿಗೆ ಬೆಂಬಲ ನೀಡುವುದು ದಾನಧರ್ಮಕ್ಕಿಂತಲೂ ಮೊದಲು ನ್ಯಾಯದ ಪ್ರಶ್ನೆಯಾಗಿದೆ ಎಂದು ಜಗದ್ಗುರುಗಳು ಹೇಳಿದರು.
ಆದ್ದರಿಂದಲೇ, ಪ್ರತಿಷ್ಠಾನವನ್ನು ಪ್ರಾಂತ್ಯದ ಪ್ರತಿಷ್ಠಾನವಾಗಿಯೇ ಉಳಿಸಬೇಕೆಂಬ ಮಂಡಳಿಯ ಏಕಮತೀಯ ನಿರ್ಧಾರವನ್ನು ಅವರು ಸ್ವಾಗತಿಸಿದರು. ಇದು ಅದರ ಸ್ಥಾಪಕರಾದ ಸಂತ ದ್ವಿತೀಯ ಜಾನ್ ಪಾಲ್ ರವರ ಆತ್ಮಕ್ಕೆ ನಿಷ್ಠವಾಗಿರುವುದಾಗಿ ಹೇಳಿದರು.
ಇದಲ್ಲದೆ, ಸಾಹೆಲ್ ಪ್ರದೇಶದ ಜನರ ಅಪಹರಿಸಲಾಗದ ಮಾನವ ಗೌರವವನ್ನು ಉತ್ತೇಜಿಸುವ ಸಲುವಾಗಿ, ಸಮಗ್ರ ಮಾನವ ಅಭಿವೃದ್ಧಿಯನ್ನು ಉತ್ತೇಜಿಸುವ ಡಿಕಾಸ್ಟ್ರಿ ಮತ್ತು ಪವಿತ್ರ ಸಭೆಯ ಇತರ ಸಂಸ್ಥೆಗಳೊಂದಿಗೆ ಸಹಕಾರವನ್ನು ಮುಂದುವರಿಸಲು ಜಗದ್ಗುರುಗಳು ಪ್ರೋತ್ಸಾಹಿಸಿದರು. ಈ ಸಹಕಾರವು ಸಹಭಾಗಿತ್ವ ಮತ್ತು ಸೈನೋಡಾಲಿಟಿ ಆಧಾರಿತವಾಗಿರಬೇಕು ಎಂದರು.
ಅನಿಶ್ಚಿತತೆಯ ನಡುವೆ ಆಶಾಭಾವನೆ
ತಮ್ಮ ಭಾಷಣದ ಕೊನೆಯಲ್ಲಿ, ಪ್ರತಿಷ್ಠಾನದ ಈ ಹೊಸ ಪಯಣವು ಹೊಸ ಸವಾಲುಗಳು ಮತ್ತು ಅನಿಶ್ಚಿತತೆಗಳನ್ನು ತಂದೊಡ್ಡಬಹುದು ಎಂದು ಜಗದ್ಗುರು ಲಿಯೋರವರು ಒಪ್ಪಿಕೊಂಡರು. ಆದಾಗ್ಯೂ, ಜಗದ್ಗುರು ಫ್ರಾನ್ಸಿಸ್ ರವರ ಮಾತುಗಳನ್ನು ಉಲ್ಲೇಖಿಸಿ, ಭರವಸೆಯನ್ನು ಕಳೆದುಕೊಳ್ಳದೆ ಎಲ್ಲ ಕಷ್ಟಗಳನ್ನು ಒಟ್ಟಾಗಿ ಎದುರಿಸಬೇಕು ಎಂದು ಅವರು ಕರೆ ನೀಡಿದರು.
