ಲೆಬನಾನ್ನಲ್ಲಿ ತೀವ್ರಗೊಂಡ ಇಸ್ರಾಯೇಲ್ ನಡೆಸಿದ ದಾಳಿಗಳಲ್ಲಿ ಅನೇಕ ನಾಗರಿಕರ ಸಾವು
ಲೇಖಕರು: ಲಿಂಡಾ ಬೋರ್ಡೊನಿ
ಏಪ್ರಿಲ್ 16ರಂದು ಘೋಷಿಸಲಾದ ಯುದ್ಧ ವಿರಾಮದ ಹೊರತಾಗಿಯೂ — ಇದು ಇಸ್ರಾಯೇಲ್ ಮತ್ತು ಲೆಬನಾನ್ ಬೆಂಬಲಿತ ಹೆಜ್ಬೊಲ್ಲಾ ಗುಂಪಿನ ನಡುವಿನ ಹೋರಾಟವನ್ನು ನಿಲ್ಲಿಸಲು ಉದ್ದೇಶಿತವಾಗಿತ್ತು — ಇಸ್ರಾಯೇಲ್ ಪ್ರಧಾನಮಂತ್ರಿ ಬೆಂಜಮಿನ್ ನೆತನ್ಯಾಹು ಈ ವಾರ ತಮ್ಮ ಸೇನೆ ಲೆಬನಾನ್ನಲ್ಲಿ ಕಾರ್ಯಾಚರಣೆಗಳನ್ನು ಇನ್ನಷ್ಟು ತೀವ್ರಗೊಳಿಸುತ್ತಿದೆ ಎಂದು ತಿಳಿಸಿದ್ದಾರೆ.
ಮಂಗಳವಾರ ಒಂದೇ ದಿನದಲ್ಲಿ 31 ಮಂದಿ ಸಾವನ್ನಪ್ಪಿದ್ದು, ಅವರಲ್ಲಿ ಮಹಿಳೆಯರು ಮತ್ತು ಮಕ್ಕಳು ಸೇರಿದ್ದಾರೆ. ಇನ್ನೂ 40 ಮಂದಿ ಗಾಯಗೊಂಡಿದ್ದಾರೆ. ಇಸ್ರಾಯೇಲ್ ತನ್ನ ದಾಳಿಗಳು ಹೆಜ್ಬೊಲ್ಲಾ ಮೂಲಸೌಕರ್ಯಗಳನ್ನು ಗುರಿಯಾಗಿಸಿಕೊಂಡಿವೆ ಎಂದು ಹೇಳಿಕೊಂಡಿದ್ದರೂ, ನೂರಾರು ಮನೆಗಳು ಮತ್ತು ಹಳ್ಳಿಗಳು ನಾಶಗೊಂಡಿವೆ. ಇದರಿಂದ ಸುಮಾರು ಹತ್ತು ಲಕ್ಷ ಜನರು ಸ್ಥಳಾಂತರಗೊಂಡಿದ್ದು, ದೇಶವು ತೀವ್ರ ಸಂಕಷ್ಟದ ಅಂಚಿಗೆ ತಲುಪಿದೆ.
ಸುಮಾರು 1,40,000 ಮಂದಿ ಸಾರ್ವಜನಿಕ ಶಾಲೆಗಳನ್ನು ಆಶ್ರಯ ಕೇಂದ್ರಗಳಾಗಿ ಪರಿವರ್ತಿಸಿ ಅಲ್ಲಿ ತಂಗಿದ್ದಾರೆ ಎಂದು ವರದಿಯಾಗಿದೆ. ಸಾವಿರಾರು ಮಂದಿ ತಮ್ಮ ವಾಹನಗಳಲ್ಲಿ ಅಥವಾ ಆತಿಥ್ಯ ನೀಡುತ್ತಿರುವ ಸಮುದಾಯಗಳೊಂದಿಗೆ ವಾಸಿಸುತ್ತಿದ್ದಾರೆ. ಲೆಬನಾನ್ ಆರೋಗ್ಯ ಸಚಿವಾಲಯದ ಪ್ರಕಾರ, ಹೊಸದಾಗಿ ಆರಂಭವಾದ ಇಸ್ರಾಯೇಲಿ ದಾಳಿಗಳಲ್ಲಿ ಸುಮಾರು 3,200 ಮಂದಿ ಸಾವನ್ನಪ್ಪಿದ್ದು, ಸುಮಾರು 10,000 ಮಂದಿ ಗಾಯಗೊಂಡಿದ್ದಾರೆ. ಈ ಕಾರ್ಯಾಚರಣೆಗಳು “ಭಾರೀ ಸೈನಿಕ ಪಡೆಗಳೊಂದಿಗೆ ನೆಲಮಟ್ಟದಲ್ಲಿ ನಡೆಯುತ್ತಿದ್ದು, ಪ್ರದೇಶಗಳನ್ನು ವಶಪಡಿಸಿಕೊಳ್ಳುವ ಮತ್ತು ನಿಯಂತ್ರಿಸುವ” ಉದ್ದೇಶ ಹೊಂದಿವೆ ಎಂದು ಹೇಳಲಾಗಿದೆ.
ಇಸ್ರಾಯೇಲಿ ಸೇನೆಯ ಪ್ರಕಾರ, ಏಪ್ರಿಲ್ 16ರ ಯುದ್ಧ ವಿರಾಮದ ನಂತರದಿಂದ ಅದರ 10 ಸೈನಿಕರು ಸಾವನ್ನಪ್ಪಿದ್ದಾರೆ. ಅವರಲ್ಲಿ ಆರು ಮಂದಿ ಹೆಜ್ಬೊಲ್ಲಾದ ಸ್ಫೋಟಕ ಡ್ರೋನ್ ದಾಳಿಗಳಲ್ಲಿ ಮೃತಪಟ್ಟಿದ್ದಾರೆ. ದುರ್ಬಲಗೊಳ್ಳುತ್ತಿರುವ ರಾಜತಾಂತ್ರಿಕ ಪ್ರಯತ್ನಗಳು, ಉಲ್ಲಂಘಿಸಲ್ಪಟ್ಟ ಯುದ್ಧ ವಿರಾಮಗಳು ಮತ್ತು ಮರುಕಳಿಸುತ್ತಿರುವ ಹಿಂಸಾಚಾರದ ಹಿನ್ನೆಲೆಯಲ್ಲಿಯಲ್ಲಿ, ಮಾನವೀಯ ಸಂಸ್ಥೆಗಳು ಆರೋಗ್ಯ ವ್ಯವಸ್ಥೆ, ಆಹಾರ ಭದ್ರತೆ, ಮತ್ತಷ್ಟು ಸ್ಥಳಾಂತರ ಮತ್ತು ಸಮುದಾಯಗಳ ಸ್ಥೈರ್ಯ ಮೇಲೆ ಉಂಟಾಗಬಹುದಾದ ದೀರ್ಘಕಾಲಿಕ ಪರಿಣಾಮಗಳ ಬಗ್ಗೆ ಎಚ್ಚರಿಕೆ ನೀಡುತ್ತಿವೆ.
(ಮೂಲ: Reuters ಮತ್ತು ಇತರೆ ಸುದ್ದಿ ಸಂಸ್ಥೆಗಳು)
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
