Likita ya bansó: kotika Yézu atokisa motéma

Jean René Bompolonga  - Kinshasa

Ezali esika mókó ya Sántu-Petelo etondi meke, pe o nsé ya mói eyambaki Papá po ya likita ya bansó ya sika. Léon XIV akobaki na molongó ya matéya etáli "Yézu-Kristu elikya na bisó" pe etáli Pasika ya Yézu. Mokolo ya misáto eye ya 8 ya sánzá ya zómi, na bopikami na eténi ya baningá ya Emmaüs, atiaki maloba na ye na bomikitisi ya Mosékwi oyo "asáli eloko mókó te ya kokámwa po ya kondimisa na makási boyambi bayékoli na ye". "Makambo ya kokámwa te", "bilembo ya ngúyá te", elakisi Sántu-Papá. Te, Kristu apúsani pembeni ya baningá na ye "na bomibómbi, lokóla moleki nzelá mókó ya pamba, lokóla moto mókó azali na nzala akosénga kokabola ndambo ya lipa". Kútu, ezala Maria ya Magdala, bayékoli ya Emmaüs to Petelo, bansó bakozua ye lokóla "molóni mókó", to "mopaya mókó" to "moleki nzelá mókó ya pamba", elobi Papá.

Bomoto na bisó ebalusami na bolingo

Na ndéngé "Nsékwa ezali eloko mókó ya théâtre te" kasi "mbóngwana mókó ya kimia eye etondisi na ntina likambo mókó mókó ya moto", Yézu alingi "lokota ya pembeni, ya malonga, ya mesa ekabolami". Na bovandi pe na boléi, alakisi 'te "nzóto na bisó, lisoló na bisó, bayébani na bisó bazali ekangelo mókó ya kobwaka te. Babongama na bomoi ya mobimba. Kosékwa elingi koloba milimo mikolimwa te, kasi kokóta na bomoko ya mozindo na Nzambe pe na bandeko na bisó, na bomoto mókó ebóngwami na bolingo".

Bōngó, "na Pasika ya Kristu, nionso ekoki kokóma ngrásya", "atá biloko ya pamba", elimboli Papá wa Roma. Po na ye, "Nsékwa ekokitisa bomoi na ngonga pe na makási", kasi "ekobongola ndimbola pe "pimbó"". Bokébi kaka, ekébisi Léon XIV, na botútani te na "mokakatano" mókó: "liloba 'te esengo esengeli ezala na ba pótá te". Esengeli te kokweya na libúngá esálaka bayékoli ya Emmaüs, bazalaki na mawa pe koseka te. "Pási ezali bobóyi ya elaká te, kasi nzelá eye Nzámbe akolakisa emekeli ya bolingo na ye", elimboli ye. Soki tofúngoli miso malamu, lokóla bayékoli ya Emmaüs basúkisaki kosála, tokomona 'te motéma ezali "kozika" atá soki toyébaki te. "Na nsé ya putulú ya boyóki lisiswi pe ya bolembú, ezali kaka na likála mókó ya móto, eye ekozela kaka epepeme lisusu", elobi Pape.

Eloko te ezali na súka po ya oyo ayébi koyamba Kristu

Yangó wăná "ezali na lisoló te" "eye ekoki kotálama te na elikya". "Bokweyi mókó te ezali ya súka", “butú mókó te ezali ya seko, pótá mókó te ebongisama te etikala ya kofúngwama po ya libélá". Na bobakisi, "ntáká (distance) mókó te ekoki kozimisa ngúyá esilaka te ya bolingo ya Nzámbe", elobi na bokuse episkopo ya Roma. "Mosékwi akómi pembeni penza ya bisika ya molili koleka: na biseké na bisó, na bayébani baye bakende, na ba pási ya mokolo na mokolo miye mizali na bozito na mapeka na bisó". "Akosénga bisó ya kotika atokisa motéma", esemboli ye. Lokóla asálaki na bayékoli ya Emmaüs, Kristu "akozela eleko wápi miso na bisó mikofúngwama po ya komona elongi na ye ya bondeko, ekoki kobongola pási na bozeli mókó ya malonga, mawa na esengo, bondimi na mawa na motéma na elikya". Yézu, elimboli na súka Papá, alingi azala "moningá na bisó ya nzelá", pe "kopelisa na bisó bosŏlósŏló 'te bomoi na ye eleki na ngúyá liwa nionso".

 Matondi mingi ndéngé otángi lisoló eye.