Папата ќе служи света Литургија за грижа за создадениот свет во Кастел Гандолфо
Папата Лав XIV ќе ја предводи светата Литургија за грижа за создадениот свет во Борго Лаудато си на 1 септември. Светата Литургија ќе се служи во градината „Лаудато си“, во рамките на Папските градини во Кастел Гандолфо.
Ова беше соопштено во вторник 25 август 2026 година, во заедничка изјава на Дикастеријата за промоција на интегрален човечки развој и Центарот за високо образование „Лаудато си“.
Со светата Литургија ќе се одбележи годишниот Светски ден на молитва за грижа за создадениот свет и отворањето на Времето на создадениот свет, екуменско време на молитва и посветеност на заштитата на нашиот заеднички дом. Овој период завршува на 4 октомври, на празникот на свети фрањо Асишки, кога се одбележува и 800-годишнината од неговото упокојување.
Во текот на ова време, Црквата и другите христијански заедници се поканети да ја обноват својата посветеност кон создадениот свет преку молитва, преобраќање и конкретни дела на одговорна грижа.
На 1 септември Папата ќе служи посебна „Литургија за грижа за создадениот свет“, подготвена од Дикастеријата за промоција на интегрален човечки развој, Дикастеријата за божествено богослужение и дисциплина на Светите Тајни, Дикастеријата за наука на верата и Дикастеријата за промовирање на христијанското единство.
Кардинал Черни: Секој дар носи одговорност
„Славењето на Евхаристијата околу олтар поставен во градина“, рече кардиналот Мајкл Черни, префект на Дикастеријата за промоција на интегрален човечки развој, „ни помага да се сетиме дека целото создание е дар, а секој дар носи одговорност.“
Кардиналот истакна дека верата нè учи нашиот заеднички дом да не го гледаме првенствено како ресурс што треба да се искористи, туку како дар што треба да се прими со благодарност и да се чува со љубов. „На светата Литургија, нашата благодарност кон Бога станува и обврска: грижата за создадениот свет значи грижа за животот, за луѓето, особено за најранливите, и за идните генерации“, рече тој.
Кардинал Баџо: Љубовта кон ближниот значи и грижа за созданието
„За Црквата“, нагласи кардиналот Фабио Баџо, генерален директор на Центарот за високо образование „Лаудато си“, „заштитата на создадениот свет и унапредувањето на човечкото достоинство се две страни на една единствена мисија, длабоко вкоренета во христијанската вера.“
Тој додаде дека христијаните веруваат оти Бог од љубов го создал светот и човечкото семејство и дека, токму од љубов, ни ја доверил грижата за нашите браќа и сестри, како и чувањето на создадениот свет.
„Да го чуваме нашиот заеднички дом значи да ги љубиме нашите ближни, особено оние кои најмногу страдаат од последиците на деградацијата на животната средина, сиромаштијата, климатската криза и конфликтите“, рече кардиналот Баџо.
„Верата нè потсетува дека не можеме да Го љубиме Бога ако не се грижиме за она што Тој го создал и за оние што ни ги доверил“, додаде тој.
