ദൈവത്തിന്റെ കരങ്ങളിൽ ഒരു കുട്ടിയെപ്പോലെ നമ്മെ സ്വയം ഉപേക്ഷിക്കണം

ഫാ. ജിനു തെക്കേത്തലക്കൽ, വത്തിക്കാൻ സിറ്റി

യുദ്ധങ്ങളും അക്രമങ്ങളും നിറഞ്ഞ ഈ ലോകത്തിൽ, യേശുവിന്റെ തിരുഹൃദയം, സ്നേഹത്തിന്റെ ഒരു ഉദാത്ത മാതൃകയായി നിലകൊള്ളുന്നു. "ദൈവം സ്നേഹമാകുന്നു" (1 യോഹന്നാൻ 4:8) എന്ന വചനത്തെ ഓർമ്മിപ്പിച്ചുകൊണ്ട്, നിരുപാധികമായ സ്നേഹത്തിന്റെ പ്രാധാന്യം യേശു തന്റെ വാക്കുകളിലൂടെയും, ജീവിതത്തിലൂടെയും നമ്മെ പഠിപ്പിച്ചു. വിശുദ്ധ ജോൺ പോൾ രണ്ടാമൻ പാപ്പാ  പറഞ്ഞതുപോലെ, "യേശുവിന്റെ തിരുഹൃദയം, ലോകത്തിൽ ദൈവസ്നേഹത്തിന്റെ രഹസ്യം  പൂർണ്ണമായി വെളിപ്പെടുത്തുന്നു." ഈ സ്നേഹം, വിദ്വേഷവും ഭിന്നതയും ഇല്ലാതാക്കി, മനുഷ്യരെ പരസ്പരം അടുപ്പിക്കാൻ സഹായിക്കുന്ന ഒരു വലിയ ശക്തിയാണ്.

പരസ്പര വിദ്വേഷം വർദ്ധിക്കുന്ന ഈ കാലഘട്ടത്തിൽ, ക്ഷമയുടെ വലിയ പാഠം യേശുവിന്റെ തിരുഹൃദയത്തിൽ നിന്ന് നാം ഉൾക്കൊള്ളണം. "നിങ്ങൾ നിങ്ങളുടെ സഹോദരനോട് ക്ഷമിച്ചാൽ, നിങ്ങളുടെ സ്വർഗ്ഗസ്ഥനായ പിതാവും നിങ്ങളോട് ക്ഷമിക്കും" (മത്തായി 6:14) എന്ന വചനം, ക്ഷമയുടെ പ്രാധാന്യം വ്യക്തമാക്കുന്നു. വിശുദ്ധ അഗസ്റ്റിൻ പറഞ്ഞതുപോലെ, "ക്ഷമ എന്നത്, നമ്മോട് തെറ്റ് ചെയ്തവരോടു നാം പ്രകടിപ്പിക്കുന്ന സ്നേഹമാണ്." യേശു കുരിശിൽ കിടന്നുകൊണ്ട് തന്നെ  പീഡിപ്പിച്ചവരോട് ക്ഷമിച്ചത്, മനുഷ്യരാശിക്ക് മാതൃകയാക്കാവുന്ന, എന്നാൽ പ്രവൃത്തി പഥത്തിൽ കൊണ്ടുവരുവാൻ ഏറ്റവും ബുദ്ധിമുട്ടേറിയ  ക്ഷമയുടെ ഉത്തുംഗ  പ്രതീകമാണ്.

കരുണയുടെ പാഠവും യേശുവിന്റെ തിരുഹൃദയത്തിൽ നിന്ന് ഒഴിച്ചുകൂടാനാവാത്തതാണ്. "കരുണയുള്ളവർ ഭാഗ്യവാന്മാർ, അവർക്ക് കരുണ ലഭിക്കും" (മത്തായി 5:7) എന്ന് യേശു പഠിപ്പിച്ചു. വിശുദ്ധ ഫൗസ്റ്റിന കോവാൾസ്കയുടെ വെളിപ്പെടുത്തലുകളിലൂടെ, യേശു തന്റെ തിരുഹൃദയത്തിൽ നിന്ന് ഒഴുകി വരുന്ന കരുണയുടെ അഗാധത ലോകത്തിന് വെളിപ്പെടുത്തി. കത്തോലിക്കാ സഭയുടെ പഠനങ്ങൾ  അനുസരിച്ച്, കരുണ എന്നത് ദൈവത്തിന്റെ സ്നേഹത്തിന്റെ ഒരു പ്രധാന ഭാഗമാണ്, അത് മറ്റുള്ളവരുടെ വേദനയിൽ പങ്കുചേരാനും അവരെ സഹായിക്കാനും നമ്മെ പ്രേരിപ്പിക്കുന്നു.

അതുപോലെ, സൗഖ്യത്തിന്റെ പാഠം യേശുവിന്റെ തിരുഹൃദയത്തിന്റെ ഒരു പ്രധാന സവിശേഷതയാണ്. ശാരീരികവും മാനസികവും ആത്മീയവുമായ സൗഖ്യം നൽകാൻ യേശുവിന് കഴിയും. രോഗികളെ സുഖപ്പെടുത്തുകയും ദുർബലരെ ആശ്വസിപ്പിക്കുകയും ചെയ്തുകൊണ്ട്, യേശു തന്റെ സ്നേഹവും കരുണയും പ്രകടിപ്പിച്ചു. വിശുദ്ധ പത്രോസ് പറഞ്ഞതുപോലെ, "അവൻ നമ്മുടെ പാപങ്ങളെ അവന്റെ ശരീരത്തിൽ വഹിച്ചു, അവന്റെ മുറിവുകളാൽ നാം സൗഖ്യമാക്കപ്പെട്ടു" (1 പത്രോസ് 2:24). യേശുവിന്റെ തിരുഹൃദയം, എല്ലാ മുറിവുകൾക്കും വേദനകൾക്കും ആശ്വാസം നൽകുന്ന സൗഖ്യത്തിന്റെ ഉറവിടമാണ്.

വിനയത്തിന്റെ പാഠം യേശുവിന്റെ ജീവിതത്തിൽ ഉടനീളം ദൃശ്യമാണ്. "ഞാൻ സൗമ്യനും വിനീതഹൃദയനുമാണ്; അതുകൊണ്ട് എന്റെ നുകം വഹിച്ച് എന്നിൽ നിന്ന് പഠിക്കുവിൻ" (മത്തായി 11:29) എന്ന് യേശു നമ്മെ പഠിപ്പിച്ചു. വിശുദ്ധ ഫ്രാൻസിസ് അസ്സീസി പറഞ്ഞതുപോലെ, "ദൈവത്തെ അറിയാനും സ്നേഹിക്കാനുമുള്ള ആദ്യത്തെ പടിയാണ് വിനയം." യേശു, രാജാധിരാജനായിരുന്നിട്ടും, എളിമയുടെയും സേവനത്തിന്റെയും മാതൃകയായി സ്വയം താഴ്ത്തി. അന്ത്യ അത്താഴ വേളയിൽ ശിഷ്യന്മാരുടെ പാദങ്ങൾ കഴുകിയത് ഈ വിനയത്തിന്റെ ഏറ്റവും വലിയ ഉദാഹരണമാണ്.

സേവനത്തിന്റെ പാഠവും യേശുവിന്റെ തിരുഹൃദയത്തിൽ നിന്ന് നാം പഠിക്കേണ്ട ഒന്നാണ്. "മനുഷ്യപുത്രൻ വന്നിരിക്കുന്നത് ശുശ്രൂഷിക്കപ്പെടാനല്ല, ശുശ്രൂഷിക്കാനും അനേകർക്ക് വേണ്ടി തന്റെ ജീവൻ മോചനവിലയായി നൽകാനും വേണ്ടിയാണ്" (മത്തായി 20:28) എന്ന് യേശു പഠിപ്പിച്ചു. കത്തോലിക്കാ സഭയുടെ സാമൂഹിക പ്രബോധനങ്ങൾ, മറ്റുള്ളവരെ സഹായിക്കുന്നതിലൂടെയും സമൂഹത്തിൽ സേവനം നടത്തുന്നതിലൂടെയും  നാം ക്രിസ്തുവിനെയാണ് സേവിക്കുന്നത് എന്ന് ഊന്നിപ്പറയുന്നു. വിശുദ്ധ മദർ തെരേസയുടെ ജീവിതം, ദരിദ്രരെയും അവശരെയും സേവിച്ചുകൊണ്ട് ക്രിസ്തുവിന്റെ സ്നേഹം ലോകത്തിന് വെളിപ്പെടുത്തിയതിന്റെ ഉത്തമ ഉദാഹരണമാണ്.

പ്രത്യാശയുടെ പാഠം, കഷ്ടപ്പാടുകളിലും ദുരിതങ്ങളിലും യേശുവിന്റെ തിരുഹൃദയം നമുക്ക് നൽകുന്ന ഒരു വലിയ ആശ്വാസമാണ്. "ലോകത്തിൽ നിങ്ങൾക്ക് കഷ്ടപ്പാടുകൾ ഉണ്ടാകും, എങ്കിലും ധൈര്യമായിരിക്കുവിൻ; ഞാൻ ലോകത്തെ കീഴടക്കിയിരിക്കുന്നു" (യോഹന്നാൻ 16:33) എന്ന് യേശു പറഞ്ഞു. വിശുദ്ധ തോമസ് അക്വിനാസ് പറഞ്ഞതുപോലെ, "പ്രത്യാശ എന്നത്, ദൈവത്തിൽ നിന്നുള്ള സഹായത്താൽ നിത്യജീവിതം നേടാനുള്ള ഒരു ആഗ്രഹമാണ്." എല്ലാ പ്രതിസന്ധികളെയും അതിജീവിച്ച്, ഉയിർത്തെഴുന്നേറ്റ യേശു, നമുക്ക് അനന്തമായ പ്രത്യാശയും പുതിയ ജീവിതവും വാഗ്ദാനം നൽകുന്നു.

ആന്തരിക സമാധാനത്തിന്റെ പാഠം യേശുവിന്റെ തിരുഹൃദയത്തിൽ നിന്ന് ഒഴുകി വരുന്ന ഒന്നാണ്. "എന്റെ സമാധാനം ഞാൻ നിങ്ങൾക്ക് നൽകുന്നു; ലോകം നൽകുന്നതുപോലെയല്ല ഞാൻ നിങ്ങൾക്ക് നൽകുന്നത്" (യോഹന്നാൻ 14:27) എന്ന് യേശു പഠിപ്പിച്ചു. ബാഹ്യ സാഹചര്യങ്ങൾ എന്തുതന്നെയായാലും, യേശുവിലുള്ള വിശ്വാസത്തിലൂടെ നമുക്ക് ആന്തരിക സമാധാനം കണ്ടെത്താൻ കഴിയും. വിശുദ്ധ ഫ്രാൻസിസ് ഡി സാലസ് പറഞ്ഞതുപോലെ, "ഹൃദയത്തിൽ സമാധാനമില്ലാത്ത ഒരു ആത്മാവിന് ഒരിക്കലും ദൈവത്തിൽ യഥാർത്ഥ സന്തോഷം കണ്ടെത്താൻ കഴിയില്ല." ദൈവത്തിലുള്ള അചഞ്ചലമായ വിശ്വാസത്തിലൂടെയും പ്രാർത്ഥനയിലൂടെയും നമുക്ക് ഈ സമാധാനം അനുഭവിക്കാൻ സാധിക്കും.

കഴിഞ്ഞ ലക്കത്തിൽ നാം കണ്ട, വിശുദ്ധ കൊച്ചുത്രേസ്യയുടെ യേശുവിന്റെ തിരുഹൃദയ അനുഭവത്തെ പറ്റി ഫ്രാൻസിസ് പാപ്പാ വിവരിക്കുന്ന ഭാഗങ്ങളുടെ തുടർച്ചയാണ് നാം വായിക്കുവാൻ പോകുന്നത്. യേശുവിന്റെ തിരുഹൃദയത്തെ പറ്റി വിശുദ്ധ കൊച്ചുത്രേസ്യ നൽകിയ അനുഭവങ്ങളുടെ വാക്കുകൾ, ചിലപ്പോൾ അവജ്ഞയോടെ നോക്കിക്കാണുന്ന ഒരു സമൂഹത്തെ ഫ്രാൻസിസ് പാപ്പാ ചൂണ്ടികാണിക്കുന്നു. ഇന്നും, ജീവിതത്തിൽ ആത്മീയതയുടെ അനുഭവങ്ങൾ പങ്കുവയ്ക്കുമ്പോൾ അവയെ പുച്ഛിക്കുന്ന ആളുകളെ ഇത് ഓർമ്മപ്പെടുത്തുന്നു. ആത്മീയതയുടെ  മനോഹാരിതയെ കാണാൻ താത്പര്യം പ്രകടിപ്പിക്കാത്ത ഒരു തലമുറ ഇന്നത്തെ നേർക്കാഴ്ചയാണ്. ദൈവത്തെ തങ്ങളുടെ ചട്ടക്കൂടുകളിലേക്ക് ഒതുക്കുവാൻ പരിശ്രമിക്കുന്ന ജനതയ്ക്ക്,അത് തെറ്റാണെന്നു പറഞ്ഞുകൊടുക്കുവാൻ വിശുദ്ധ കൊച്ചുത്രേസ്യ പരിശ്രമിച്ചിട്ടുണ്ട്.

കർത്താവിന്റെ സ്നേഹത്തിനായി തന്റെ ജീവൻ പോലും നൽകുവാൻ തയ്യാറായ വിശുദ്ധ കൊച്ചുത്രേസ്യ, യേശുവിന്റെ സ്നേഹത്തിനു പാത്രീഭൂതരാകാൻ, അവൻ നമ്മെ ക്ഷണിക്കുന്നത്, വിശ്വാസത്തിലേക്കും, അവൻ എല്ലാം നന്മയ്ക്കായി പരിണമിപ്പിക്കും എന്ന പ്രത്യാശയിലേക്കുമാണെന്നു നമ്മെ പഠിപ്പിക്കുന്നു. വിശുദ്ധ കൊച്ചുത്രേസ്യ സ്വർഗം സ്വന്തമാക്കുന്നതിനെപ്പറ്റി പറയുന്നത് ഇപ്രകാരമാണ്: "സ്വർഗ്ഗം നേടുന്നതിനായി, നമ്മുടെ യോഗ്യത എന്നത്, ധാരാളം കാര്യങ്ങൾ ചെയ്തുകൂട്ടുന്നതിലോ,  നൽകുന്നതിലോ അല്ല, മറിച്ച് സ്വീകരിക്കുന്നതിലാണ്." നമ്മുടെ ഒരു നോട്ടത്തിലും ഒരു സ്നേഹനിശ്വാസത്തിലും അവൻ സംതൃപ്തനാണ്. നാം എത്രയധികം പാപങ്ങൾ ചെയ്തു എന്നാകിലും, നാം ക്ഷമ ചോദിക്കുമ്പോൾ മാതൃവാത്സല്യത്തോടെയും, ആർദ്രതയോടെയും കർത്താവ് നമ്മെ തന്റെ മാറോട് ചേർക്കുന്നു. ഈ ഹൃദയമാണ് വിശ്വാസത്തിന്റെയും സ്നേഹത്തിന്റെയും വഴി.

ആത്മീയതയുടെ  ഉന്നതിയിൽ അല്ല , മറിച്ച് ഒരു കൊച്ചുകുട്ടിയെപ്പോലെ, നമ്മുടെ ഇല്ലായ്മകളെക്കുറിച്ചുള്ള ബോധ്യത്തിൽ, ദൈവത്തിന്റെ കരങ്ങളിൽ നമ്മെ സമർപ്പിക്കുന്നതിലൂടെയാണ് അവന്റെ ഹൃദയത്തിന്റെ ഭാഗമായി തീരുവാൻ നമുക്ക് സാധിക്കുന്നതെന്നും വിശുദ്ധ കൊച്ചുത്രേസ്യയുടെ വാക്കുകളിൽ നമ്മെ പരിശുദ്ധ പിതാവ് ഓർമ്മിപ്പിക്കുന്നു. ഇവിടെ കൊച്ചുത്രേസ്യയുടെ ഒരു ചില വാക്കുകൾ നമ്മുടെ ഹൃദയത്തെ ഏറെ സ്പർശിക്കും: തന്റെ മകൻ പലതവണ അതേ തെറ്റുകൾ ആവർത്തിക്കുമെന്ന് ഒരു പിതാവിന്  അറിയാം, പക്ഷേ തന്റെ മകൻ എപ്പോഴും തന്റെ ഹൃദയം കീഴടക്കുകയാണെങ്കിൽ അവനോട് എല്ലായ്പ്പോഴും ക്ഷമിക്കാൻ അയാൾ തയ്യാറാണ്." ദൈവവുമായുള്ള നമ്മുടെ ബന്ധവും ഇതേപോലെയാണ്.