ഇറാക്കിൽ വീണ്ടും കത്തോലിക്കാദേവാലയങ്ങൾ സജീവമാകുന്നു

ജോസഫ് തുള്ളോക്ക്, ഫാ. ജിനു തെക്കേത്തലക്കൽ, വത്തിക്കാൻ സിറ്റി

മുസ്ലീങ്ങൾ ഭൂരിപക്ഷമുള്ള ഇറാക്ക് എന്ന ഈ  രാജ്യത്ത്, വിശ്വാസത്തിന് സാക്ഷ്യം വഹിക്കുക വെല്ലുവിളികൾ നിറഞ്ഞതാണെങ്കിലും, അത് വലിയ ഒരു ദൗത്യമാണെന്നു, മൊസൂളിലെ ചരിത്രപ്രസിദ്ധമായ അൽ-താഹിറ പള്ളിയുടെ പുനഃപ്രതിഷ്ഠയ്ക്കായുള്ള ദിവ്യബലിക്ക് തൊട്ടുപിന്നാലെ, ഇറാഖിലെ കൽദായ സഭയുടെ തലവനായ പാത്രിയാർക്കീസ് ​​ലൂയിസ് റാഫേൽ  സാക്കോ വത്തിക്കാൻ ന്യൂസിനോട് പ്രതികരിച്ചു.

2014-ൽ ഇസ്ലാമിക് സ്റ്റേറ്റ് ഭീകരർ  നശിപ്പിച്ചതും, തുടർന്ന് മൊസൂളിനെ അവരുടെ പിടിയിൽ നിന്ന് മോചിപ്പിക്കാനുള്ള ഒരു വർഷം നീണ്ടുനിന്ന യുദ്ധത്തിൽ വൻ നാശനഷ്ടങ്ങൾ സംഭവിച്ചതുമായ ദേവാലയം, പുതുക്കിപ്പണിതത്, സാധാരണ ആളുകളുടെ അത്യധ്വാനത്തിന്റെ ഫലമാണെന്നും, അവർ ഇപ്പോൾ ക്ഷീണിതരാണെന്നും  അദ്ദേഹം പങ്കുവച്ചു.  ഏതാനും പതിറ്റാണ്ടുകൾക്ക് മുമ്പ് ദശലക്ഷക്കണക്കിന് ക്രിസ്ത്യാനികൾ ഉണ്ടായിരുന്ന ഒരു സമൂഹത്തിൽ ഇന്ന് അവശേഷിക്കുന്നത് ഇന്ന് വെറും രണ്ടുലക്ഷം വിശ്വാസികൾ മാത്രമെന്നും അദ്ദേഹം പറഞ്ഞു.

എന്നാൽ, ഇറാഖിലെ ക്രിസ്ത്യാനികൾക്ക്  ഒരിക്കലും വിശ്വാസവും പ്രത്യാശയും കൈമോശം വന്നിട്ടില്ലെന്നും, എല്ലാം പ്രത്യാശയിൽ അധിഷ്ഠിതമെന്നും അദ്ദേഹം പങ്കുവച്ചു. പുനഃപ്രതിഷ്ഠയും, വിശുദ്ധ ബലിയും ആത്മാവിന്റെ ഒരു ആരാധനാക്രമമാണെന്നും, ആത്മാവിന്റെ ആഹ്വാനം എല്ലാം നവീകരിക്കുന്നുവെന്നും പാത്രിയർക്കീസ് എടുത്തു പറഞ്ഞു.

കൽദായ ശൈലിയിലുള്ള കുരിശുകളിലേക്ക് വിരൽ ചൂണ്ടി, അവ നഗ്നമാണെന്നും, പാശ്ചാത്യ ശൈലിയിലുള്ള കുരിശുകൾ പോലെ യേശുവിന്റെ ശരീരം അവയിൽ ചിത്രീകരിച്ചിട്ടില്ലെന്നും, ഇത്, യേശു ഉയിർത്തെഴുന്നേറ്റു എന്ന പ്രത്യാശ നമുക്ക് പ്രദാനം ചെയ്യുന്നുവെന്നും അദ്ദേഹം പറഞ്ഞു.

ഐഎസിൽ നിന്ന് മോചിതമായി എട്ട് വർഷങ്ങൾക്ക് ശേഷം, വളരെ കുറച്ച് ക്രിസ്ത്യാനികൾ മാത്രമേ മൊസൂളിൽ ഇപ്പോൾ താമസമുള്ളൂ, അതിനാൽ പുനഃസമർപ്പണ ചടങ്ങിൽ പങ്കെടുത്തവരിൽ ഭൂരിഭാഗവും ചുറ്റുമുള്ള ക്രിസ്ത്യൻ ഗ്രാമങ്ങളിൽ നിന്ന് നഗരത്തിലേക്ക് എത്തിച്ചേർന്നവരായിരുന്നു.

"ഇപ്പോൾ കാര്യങ്ങൾ മുമ്പത്തേക്കാൾ മികച്ചതാണ്, പക്ഷേ രാഷ്ട്രീയ സാഹചര്യം എങ്ങനെ മാറുമെന്ന് ഞങ്ങൾക്ക് ഒരിക്കലും അറിയില്ല. ദൈവം അനുവദിച്ചാൽ ഞങ്ങൾക്ക് അവിടെ തന്നെ തുടരാൻ കഴിയും" പാത്രിയർക്കീസ് കൂട്ടിച്ചേർത്തു.