എബോള ബാധിതർക്കുവേണ്ടി പരിശുദ്ധ പിതാവ് സഹായങ്ങൾ അഭ്യർത്ഥിച്ചു

ഫാ. ജിനു തെക്കേത്തലക്കൽ, വത്തിക്കാൻ സിറ്റി

ഓഗസ്റ്റ് മാസം ഇരുപത്തിമൂന്നാം തീയതി, വത്തിക്കാൻ ചത്വരത്തിൽ വിശ്വാസികൾക്കൊപ്പം നടത്തിയ മധ്യാഹ്ന പ്രാർത്ഥനയ്ക്കു ശേഷം, പരിശുദ്ധ പിതാവ് ലിയോ പതിനാലാമൻ പാപ്പാ, ഡെമോക്രാറ്റിക് റിപ്പബ്ലിക് ഓഫ് കോംഗോയിൽ പടർന്നുപിടിക്കുന്ന എബോള വൈറസിനെതിരെ പോരാടുവാൻ അന്താരാഷ്ട്ര സമൂഹത്തെ ആഹ്വാനം ചെയ്യുകയും, രോഗബാധിതർക്കുവേണ്ടി പ്രാർത്ഥിക്കുകയും ചെയ്തു. കോംഗോയിൽ ഇതുവരെ രണ്ടായിരത്തഞ്ഞൂറിലധികം പേർ ഈ മാരകരോഗം ബാധിച്ച് മരിച്ച സാഹചര്യത്തിൽ, പാപ്പായുടെ ഈ അഭ്യർത്ഥന ഏറെ പ്രാധാന്യമർഹിക്കുന്നു.

പാപ്പായുടെ വാക്കുകൾ ഇപ്രകാരമായിരുന്നു: "എബോള വ്യാപനം തടയാനും അനേകം ജീവനുകൾ രക്ഷിക്കാനും അന്താരാഷ്ട്ര സമൂഹം മുന്നോട്ടുവരണമെന്ന് ഞാൻ അഭ്യർത്ഥിക്കുന്നു. പ്രാദേശിക സമൂഹങ്ങളെ കൂടി ഉൾപ്പെടുത്തിക്കൊണ്ടുള്ള പ്രതിരോധ പ്രവർത്തനങ്ങളാണ് ഇപ്പോൾ ആവശ്യം,"

നിലവിൽ കോംഗോയിൽ 5,300-ലധികം പേർക്ക് രോഗം ബാധിക്കുകയും 2,500-ൽ അധികം പേർ മരിക്കുകയും ചെയ്തിട്ടുണ്ട്. 47.6 ശതമാനമാണ് നിലവിലെ മരണനിരക്ക്. 2014-2016 കാലഘട്ടത്തിൽ പശ്ചിമാഫ്രിക്കയിലുണ്ടായ എബോള വ്യാപനത്തിന് ശേഷം രാജ്യം നേരിടുന്ന ഏറ്റവും വലിയ ആരോഗ്യ പ്രതിസന്ധിയാണിത്.

തുടർന്ന്, മധ്യ ആഫ്രിക്കൻ റിപ്പബ്ലിക്കിലെ സാംബോയിയിലുണ്ടായ സ്വർണ്ണഖനി തകർച്ചയിൽ നൂറിലധികം പേർ മരിച്ച സംഭവത്തിലും പരിശുദ്ധ പിതാവ് അഗാധ ദുഃഖം രേഖപ്പെടുത്തി. ഖനന മേഖലയിൽ സുരക്ഷയും നിയമവാഴ്ചയും ഉറപ്പാക്കേണ്ടതിന്റെ ആവശ്യകതയും പാപ്പാ ചൂണ്ടിക്കാണിച്ചു.

2016 ഓഗസ്റ്റ് 24-ന് മധ്യ ഇറ്റലിയിലുണ്ടായ ശക്തമായ ഭൂകമ്പത്തിന്റെ പത്താം വാർഷികവും പാപ്പാ അനുസ്മരിച്ചു.