പരമ്പരായുധങ്ങളുടെ വ്യാപനം സമാധാനസ്ഥാപനത്തിന് വിഘാതം, ആർച്ചുബിഷപ്

ജോയി കരിവേലി, വത്തിക്കാൻ സിറ്റി

പരമ്പരാഗത ആയുധങ്ങളുടെ അവിരാമ വ്യാപനവും ദുരുപയോഗവും അന്താരാഷ്ട്ര ബന്ധങ്ങളിൽ സമാധാനവും വിശ്വാസവും കൈവരിക്കുന്നതിന് മുഖ്യ പ്രതിബന്ധം ആണെന്ന് വത്തിക്കാൻ പ്രതിനിധി ആർച്ചുബിഷപ്പ് ഗബ്രിയേലെ കാച്ച.

ഐക്യരാഷ്ട്രസഭയിൽ പരിശുദ്ധസിംഹാസനത്തിൻെറെ സ്ഥിരം നിരീക്ഷകനായ അദ്ദേഹം ഐക്യരാഷ്ട്രസംഘടനയുടെ പൊതുസഭയുടെ എൺപതാമത് യോഗം പരമ്പരാഗത ആയുധങ്ങളെ അധികരിച്ചു നടത്തിയ ചർച്ചയിൽ, ഒക്ടോബർ 24-ന് വെള്ളിയാഴ്ച, ന്യുയോർക്കിൽ സംസാരിക്കുകയായിരുന്നു.

സ്ഥിരത വളർത്തുന്നതിനുപകരം, അവയുടെ അനിയന്ത്രിതമായ വ്യാപനം അവിശ്വാസം വളർത്തുകയും അക്രമത്തെ പോഷിപ്പിക്കുകയും രാഷ്ട്രങ്ങൾ  തമ്മിലുള്ള സംഭാഷണത്തെ ദുർബ്ബലപ്പെടുത്തുകയും ചെയ്യുന്നുവെന്ന് ആർച്ചുബിഷപ്പ് കാച്ച പറഞ്ഞു.

സൈനികച്ചിലവ് ക്രമാതീതമായി വർദ്ധിച്ചുവരുന്ന ഖേദകരമായ അവസ്ഥ ചൂണ്ടിക്കാട്ടിയ അദ്ദേഹം ഈ തുക അവശ്യ മാനവിക ആവശ്യങ്ങൾക്കും സമഗ്രമ മാനവ വികസനത്തിനും വിനിയോഗിക്കുന്നതിനു പകരം, ഈ വിഭവങ്ങൾ സമാധാനം പിന്തുടരുന്നതിനെ ദുർബലപ്പെടുത്തുന്ന ഭയത്തിൻറെയും വിഭജനത്തിൻറെയും മാതൃകകളെ അരക്കിട്ടുറപ്പിക്കുന്നുവെന്നു കുറ്റപ്പെടുത്തി.

കുലബോംബുകൾ ഉൾപ്പടെയുള്ള സ്ഫോടനായുധങ്ങളുടെ നിരോധനത്തിൻറെ അടിയന്തിരാവശ്യകതയുടെ ആർച്ചുബിഷപ്പ് കാച്ച ചൂണ്ടിക്കാട്ടി. ചെറു ആയുധളുടെയും ലഘുവായുധങ്ങളുടെയും നിയമവിരുദ്ധ കടത്തും തടയേണ്ടതിൻറെ പ്രാധാന്യവും അദ്ദേഹം ഊന്നിപ്പറഞ്ഞു.

ആയുധബലത്തിലൂടെ സുരക്ഷ സാധ്യമാണെന്ന മിഥ്യാധാരണ വെടിഞ്ഞ് സംഭാഷണം, നീതി, മനുഷ്യജീവൻറെ അന്തസ്സ് എന്നിവയിൽ അധിഷ്ഠിതമായ ഒരു സമാധാനം കെട്ടിപ്പടുക്കാൻ നിരന്തരം പരിശ്രമിക്കാൻ അന്താരാഷ്ട്ര സമൂഹത്തോടുള്ള പരിശുദ്ധ സിംഹാസനത്തിൻറെ അഭ്യർത്ഥന ആർച്ചുബിഷപ്പ് കാച്ച നവികരിച്ചു.