Hebdomada Papae, o noticiário em latim da Rádio Vaticano

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die décimo quarto mensis Februárii anno bismillésimo vicésimo sexto

TÍTULI

Ex Angélica Salutatióne Generalíque Audiéntia hortátur Leo quartus décimus ad novam Európae unitátem ac totíus terrárum orbis fraternitátem, armis demptis.

Finis est imponéndus mercátui venalício feminárum ac minórum: quod per núntium ásserit Póntifex, cum mundiális precatiónis cogitationísque Dies hac de re celebrátur.

Olýmpicas indútias postulávit Póntifex, qui athléticam exercitatiónem magni exístimat ad humáni géneris utilitátem.

Salútem ómnibus vobis audiéntibus núntios Latínos libénter dicit Alexánder De Carolis.

NOTÍTIA 1

Praetéritis diébus, cum die Mercúrii Audiéntiae Generális témpore, tum ante Angélicam Salutatiónem, die domínica recitándam, íterum iterúmque Natiónum communitátem adhortátus est Leo quartus décimus, quae daret óperam ut pax conciliarétur, ac potíssimum ut Európa unitátem, praeter contentiónes, adipiscerétur. Refert Eugénius Murrali.

“Nova únitas Europǽi continéntis obtinénda, ad contentiónes, discídia et religiónis reíque políticae simultátes depellénda”. Adhortatiónem aeque ac precatiónem et spem Leo quartus décimus patefécit, in Generáli Audiéntia adstántes cum salutáret, die undécimo mensis Februárii praetériti, festum mémorans propriórum Európae apostolórum, vidélicet sanctórum Cyrílli et Methódii, die quarto décimo mensis Februárii celebrándum. Ex occasióne Diem mundiálem aegrórum memorávit Póntifex, quo ipsíus missus extraordinárius, scílicet cardinális Czerny, Missae praesédit apud Sanctuárium Dóminae Nostrae Pacipolitánae Chiclái Perúviae. Antehác, cum Angélica Salutátio die octávo mensis Februárii dicerétur, rursus quaesíverat ut pro pace orarétur, qui ínsuper autumávit: “Rátio visque oeconómica ac militáris – ut história docet – nihil futúri géneri humáno fert. Futúrum obtinétur, cum observántia et inter gentes fratérnitas servantur.

NOTÍTIA 2

Citra arma pax eáque arma repéllens per humánam quoque dignitátem servátam effícitur. Quod per Núntium praecípue ásserit Leo quartus décimus, cum mundiális Dies recensétur precatiónis cogitationísque contra hóminum mercátum, die praetérito octávo mensis Februárii celebrátus. Lóquitur Artúrus López Ramírez.

 “Grave crimen”, “flagéllum”, “nefárius mercátus”, quae fiunt “cum dominátus et humánae vitae contémptus admittúntur”, quaeque hanc belli violentiǽque aetátem desígnant. Hoc firme severéque hóminum mercátum antíqui hodierníque témporis árguit Leo quartus décimus ipséque ad eum omnímodis arcéndum hortátur. Per huius Diéi núntium Póntifex ásserit hac aetáte, “augescénti violéntia signáta”, complúres “ad pacem requiréndam” indúci ex oppressióne, hóminum amissióne, quod plerúmque “secundárium damnum” iudicátur. “Haec est humánae vitae dominátus contemptúsque rátio”, quae osténdit, “alit venalícii mercátus vulnus”. Exóptat Leo quartus décimus ut una simul iter suscipiátur quod ducit ad “mundum in quo pax non modo bello cáreat, sed sine armis ipsa sit eáque arma repéllit, plena observántia nisa ómnium dignitátis”.

NOTÍTIAE BREVÍSSIMAE

In epístula quadam de Olýmpicis paralympicísque Ludis hiemálibus, Medioláni Cortínae, die sexto mensis Februárii praetériti incohátis, hortátus est Póntifex ut olýmpicae indútiae servaréntur, quemádmodum quondam moris fuit, quod est “spei instruméntum”. Leo quartus décimus mónuit ut a nímio contentiónis stúdio caverétur, quae ad insána medicaménta suménda indúcere potest, et ne instruménta política ars athlética haberétur. Cum convénitur et recípitur, ibi repéritur bonum, addit Póntifex, “simplicióra altioráque reconciliátae humanitátis indícia”.

Satis est dictum, eventúra proínde narrábimus próxima hebdómada. Valéte!