Presidentja Osmani nderon Dom Klemend Spaqin, me medaljen “Shën Tereza”

R.SH. / Vatikan

Presidentja e Republikës së Kosovës Sh. S. Vjosa Osmani - Sadriu i ndau Medaljen Presidenciale “Shën Tereza”, post mortem, “Dom Kelmend Spaqi, për kontributin e tij të jashtëzakonshëm në fushën e humanizmit, veprimtarisë kombëtare dhe solidaritetit ndërfetar gjatë luftës në Kosovë”.

Në këtë ditë të shënuar kujtese dhe nderimi, përkulemi me respekt të thellë përpara jetës dhe veprës së paharruar të Dom Kelmend Spaqit. Me përkushtimin e tij të rrallë ndaj besimit, njerëzimit dhe atdheut, ai u bë dritë shprese në kohë të errëta dhe një shembull i gjallë i dashurisë dhe sakrificës për tjetrin.

Ky nderim i lartë është vetëm një shenjë mirënjohjeje përballë madhështisë së veprës së tij – një jetë e jetuar me dinjitet, në shërbim të njerëzve, në forcimin e unitetit dhe në përhapjen e vlerave të paqes e mirëkuptimit. Në veprat e tij jeton humanizmi, në fjalët e tij frymon paqja, ndërsa në kujtesën tonë ai mbetet përherë i gjallë.

Trashëgimia e tij do të vazhdojë të ndriçojë rrugën e brezave, duke na kujtuar se dashuria, sakrifica dhe solidariteti janë themeli i një shoqërie më të drejtë dhe më njerëzore.

I përjetshëm qoftë kujtimi dhe vepra e DomKelmend Spaqit.

Pushoftë në paqe

nga Albert Bisaku