Katolikët e Evropës BE-së: "Ndaloni kolapsin klimatik dhe lëndët djegëse fosile"

R.SH. / Vatikan

Një koalicion prej 100 organizatash katolike nga 19 vende evropiane e më shumë se 600,000 rregulltarë e rregulltare, lëvizje dhe komunitete katolike nga e gjithë Evropa kanë bashkuar zërin në një thirrje të vetme dhe të fuqishme, të cilën ia kanë dorëzuar zyrtarisht institucioneve të Brukselit.

Të shqetësuar nga hapat pas që BE-ja po bën në legjislacionin mjedisor, organizatat katolike evropiane shprehin solidaritet me viktimat e krizës klimatike dhe kërkojnë që Evropa të rifitojë rolin e saj si udhëheqëse globale në mbrojtjen e të drejtave të njeriut dhe paqes.

Nën moton "Evropë, ji besnike ndaj shtëpisë sonë të përbashkët", ky koalicion i madh fetar po i kërkon Bashkimit Evropian të mos dorëzohet përpara interesave ekonomike të kompanive të mëdha ndotëse, por të udhëheqë botën drejt një të ardhmeje pa lëndë djegëse fosile.

Për herë të parë, organizata të rëndësishme si Caritas Europa dhe Lëvizja Laudato Si’ janë ulur në të njëjtën tryezë për të kujtuar se kujdesi për planetin nuk është një opsion dytësor, por një detyrë e rëndësishme morale. Ata shprehin një shqetësim të thellë: ndërsa kriza energjetike dhe luftërat po gjunjëzojnë kontinentin e vjetër, BE-ja po tregon shenja lëkundjeje dhe po i kthen shpinën ligjeve të saj për mbrojtjen e mjedisit.

Historia që këto komunitete duan të shkruajnë është ajo e një Evrope që mbron qytetarët e saj më të pambrojtur — nga të moshuarit që vuajnë vapën ekstreme, te fermerët që humbin të mbjellat nga përmbytjet e deri te familjet që nuk paguajnë dot faturat e energjisë. Për ta bërë këtë realitet, ata po kërkojnë hapa konkretë dhe të guximshëm: të ndalohet nxjerrja e qymyrit, naftës dhe gazit brenda dy dekadave të ardhshme, të hiqen ndihmat financiare për industritë ndotëse dhe të vendoset një taksë e përhershme mbi fitimet e tyre të mëdha, duke i riinvestuar ato para në energji të pastër e të renovueshme. Në fund të fundit, ky apel është një thirrje për t'i qëndruar besnik vlerave mbi të cilat u themelua vetë Evropa: mbrojtjes së dinjitetit njerëzor, paqes dhe drejtësisë për brezat që do të vijnë.