Venezuelë, një prift nga Karakas: “pavarësisht dhimbjes, Kisha vazhdon të ndihmojë”
Vatican News
Në Venezuelë lëkundjet pas tërmetit vazhdojnë pa ndërprerje, ndërsa paniku mes popullsisë rritet. Bilanci i tërmetit të dhunshëm të dyfishtë që goditi vendin më 24 qershorin e kaluar flet për 1.943 të vdekur dhe 10.571 të plagosur në Venezuelë. Bilanci u komunikua nga presidenti i Asamblesë Kombëtare të Venezuelës, Jorge Rodríguez. Po shtohet edhe shqetësimi për numrin gjithnjë e më të madh të të zhvendosurve. Atë Luis Antonio García Thomas, famullitar i Kishës Shën Jozefi Ñaraulí në Karakas, thotë: “Jemi një Kishë që takon njerëzit. Vazhdojmë të mbështesim njëri-tjetrin dhe të jemi pranë atyre që vuajnë.”
Kisha e dëmtuar nga tërmeti
Meshtari tregon se çatia e navatës kryesore të Kishës është shembur plotësisht, ndërsa një pjesë e navatës anësore ka pësuar gjithashtu dëme të rënda. Njëra nga kullat me kambanën ndodhet në gjendje shumë të pasigurt dhe mund të shembet në çdo moment.
Ndërkohë, lëkundjet e reja, me magnitudë deri në 4.5, vazhdojnë të godasin zonën mes Karakasit dhe La Guaira, epiqendra e tërmetit të 24 qershorit. Në qytet, sipas Atë García Thomas, shkatërrimet janë të mëdha: shumë persona kanë humbur jetën dhe dhjetëra shtëpi janë dëmtuar.
Kisha pranë njerëzve
Megjithëse situata është dramatike, Kisha në Venezuelë është mobilizuar menjëherë për të ndihmuar të prekurit nga tërmeti. Prifti thekson se komunitetet kishtare vazhdojnë të jenë të pranishme, duke ofruar ndihmë materiale, mbështetje shpirtërore dhe solidaritet për familjet e goditura.
Megjithatë, operacionet e kërkim-shpëtimit janë bërë shumë të vështira, pasi çdo lëkundje e re detyron ekipet e shpëtimit të ndërpresin punën nga frika e shembjeve të tjera.
Shpresa mes rrënojave
Pavarësisht vështirësive, nuk mungojnë historitë e shpresës. Në lagjen Macuto të La Guaira u nxor i gjallë nga rrënojat një djalë 12-vjeçar, i cili kishte qëndruar i bllokuar për pesë ditë.
Sipas të dhënave më të fundit zyrtare, 1.719 persona kanë humbur jetën, ndërsa rreth 50.000 të tjerë rezultojnë ende të zhdukur.
Kisha organizon ndihmën
Konferenca Ipeshkvore e Kishës katolike në Venezuelë ka krijuar një grup koordinues për organizimin e ndihmës materiale dhe shpirtërore. Kryetari i saj, imzot Jesús González de Zárate Salas, ka bërë të ditur se dioqezat dhe famullitë kishtare në mbarë vendin janë shndërruar në qendra grumbullimi ndihmash, vende lutjeje dhe mbështetjeje për popullsinë.
Ai ka shprehur gjithashtu edhe shqetësim për priftërinjtë e dioqezës së La Guaira, shumë prej të cilëve kanë humbur shtëpitë, bashkëpunëtorët dhe anëtarë të komuniteteve të tyre. Prioriteti, sipas tij, është t'i ndihmojnë ata të kapërcejnë këtë tragjedi, në mënyrë që të vazhdojnë misionin e tyre pranë besimtarëve.
Rritet numri i të zhvendosurve
Në 24 orët e fundit numri i personave të zhvendosur është rritur me 12.700, të cilët po strehohen përkohësisht në kampe me tenda, shkolla dhe palestra.
Agjencia e OKB-së për Refugjatët (UNHCR) ka nisur shpërndarjen e pakove të mbijetesës, dyshekëve dhe batanijeve, por ka paralajmëruar se fondet janë të pamjaftueshme. Pa mbështetje të re ndërkombëtare, do të jetë e vështirë të sigurohen strehim emergjent, mbrojtje dhe ndihmë për familjet e prekura.
Sistemi shëndetësor në krizë
Edhe sistemi shëndetësor është në gjendje të rëndë. Të paktën tre spitale të mëdha janë dëmtuar nga tërmeti dhe funksionojnë vetëm pjesërisht, ndërsa urgjencat janë të mbingarkuara. Në zonën e epiqendrës mungojnë mjekët dhe infermierët.
Për më tepër, dëmtimi i rrjetit të ujësjellësit ka shkaktuar mungesë të ujit të pijshëm, duke rritur rrezikun e gastroenteritit, dehidratimit – veçanërisht te fëmijët dhe të moshuarit – si dhe përhapjen e sëmundjeve të zorrëve në kampet e të zhvendosurve.
