Më 17 gusht kalendari kujton Shën Euzebin, Papë

Vatican News

Të dhënat për Shën Euzebin, Papë, janë të pakta. Shën Euzebi ishte me origjinë greke dhe ishte Papë për një periudhë shumë të shkurtër nga 18 prill deri më 17 gusht të vitit 309. Gjatë papnisë të tij u përball me problemin e “lapsëve” (lapsi), domethënë të krishterëve që, gjatë përndjekjeve, kishin mohuar fenë e tyre për të shpëtuar jetën. Euzebi kërkonte që ata të pendoheshin dhe të riktheheshin në bashkësinë e krishterë.

Për shkak të përçarjeve dhe konflikteve që lindën rreth kësaj çështjeje, perandori Maksenci e dëboi Euzebin në Siçili. Atje ai vdiq në mërgim, duke u konsideruar dëshmitar dhe martir i Krishtit.

Më vonë trupi i tij u soll në Romë dhe u varros në Varrezat e Shën Kalistit, pranë varrit të Papës Kaj. Papa Shën Damasi I i kushtoi një himn lavdërimi, ku përmendet qëndrueshmëria e Euzebit në mbrojtjen e paqes dhe të pendimit të “lapsëve”.