Nikaragua, dënohen 11 pastorë ungjillorë

R. SH. - Vatikan

Osservatore Romano

Njëmbëdhjetë pastorë ungjillorë të lidhur me organizatën amerikane Mountain Gateway, u dënuan nga drejtësia e Nikaraguas me akuza për pastrim parash. Për anëtarët e organizatës, me seli në Teksas - arrestuar dy muaj më parë dhe mbajtur në izolim pa kontakt me avokatët ose anëtarët e familjes - gjykatësit dhanë dënime prej 12 dhe 15 vjetësh burgim, si dhe gjobë prej 80 milionë dollarësh për secilin. Gjyqi u zhvillua me dyer të mbyllura.

Lajmin e bëri të ditur organizata Aleanca për Mbrojtjen e Lirisë, Adf Internacional, e cila e quajti këtë dënim “të parregullt”, si rezultat i një procedimi gjatë të cilit “autoritetet nuk qenë në gjendje të paraqisnin asnjë provë”.

Organizata për mbrojtjen e lirisë kërkoi që Komisioni Ndër-Amerikan për të Drejtat e Njeriut të ndërhyjë e t’i nxisë autoritetet e Managuas për garantimin e respektimit të të burgosurve gjatë qëndrimit të tyre në burg.

Javë e Madhe pa atmosferë festive

Ndërkohë, për të dytin vit radhazi, Java e Madhe në Nikaragua u kremtua pa procesione në rrugët e qyteteve dhe pa Udhën e Kryqit, pasi ishin të ndaluara nga autoritetet. Kremtimet e vetme të autorizuara, u kryen brenda objekteve të kultit ose në oborret e tyre. Katër mijë policë rrethuan kishat e vendit, për të kontrolluar respektimin e ndalimeve.