Patriarku Minassian: shpresë, unitet, paqe dhe drejtësi. Kjo është trashëgimia e udhëtimit të Papës
R.SH. - Vatikan
"Ka katër fjalë që unë personalisht do t'i çmoj nga kjo vizitë janë: shpresë, unitet, paqe dhe drejtësi." Këto janë, sipas Raphaël Bédros XXI Minassian, Patriarkut të Kilikisë së Katolikëve Armenë, farat që Papa Leoni XIV mbolli në tokën libaneze. Në një intervistë me mediat e Vatikanit, Patriarku komentoi udhëtimin e parë apostolik të Papës, një ditë pas përfundimit të tij.
Një popull i gjallë dhe besnik
Patriarku Minassian tregon se Papa u mahnit nga vitaliteti dhe feja e komuniteteve lokale: "Këtu, në këtë cep të globit, ka një popull që beson, një popull që vuan në heshtje, por që ka një rezistencë të fortë". Patriarku thekson se si Leoni XIV i perceptoi konkretisht këto vlera në takimet e tij me të rinjtë dhe në kremtimin e mbylljes në Bregun e Bejrutit.
Të përthithurit dhe transformimi i të keqes
Më pas Patriarku Minassian kujton me emocion bisedën personale me Papën: "Kur ia paraqita situatën në të cilën ndodhemi, mund të shihje nga sytë e tij se si ai po merrte gjithçka mbi vete. Si dikush që përthit të keqen nga zemra jote, e mbart atë në të vetën dhe e transformon në një imazh pozitiv, në një shpresë të thellë dhe të fortë".
Konteksti i Lindjes së Mesme
Duke shikuar sfidat e Lindjes së Mesme, Patriarku Minassian vëren se paqja nuk mund të ndërtohet pa një kërkim të sinqertë të barazisë shoqërore: "Ekziston një thirrje, një britmë për të vendosur paqen", e cila lind si nga drejtësia sociale ashtu edhe nga ajo personale.
Ftesa për në Jerusalem
Nga ky udhëtim apostolik kemi edhe ftesën e Papës drejtuar të gjitha Kishave të Krishtera për Jubileun e Shëlbimit në vitin 2033 në Jerusalem. Mbi këtë, Patriarku Minassian komenton: "Mendoj se është një fillim; uniteti është arritur tashmë midis popullit të Zotit". Patriarku ia beson të gjithë udhëtimin e bashkësisë kishtare lutjes dhe ripohon: "Lutja është një armë e pamposhtur."
"Nuk jemi kurrë vetëm"
Së fundmi, Patriarku Minassian kujton turmën e madhe të mbledhur në lutje gjatë vizitës së Papës: "U preka thellësisht kur pashë më shumë se njëqind mijë njerëz duke u lutur" e përfundon: "Kjo është arsyeja pse nuk jemi kurrë vetëm. Dhe është mbi këtë bazë që duhet të vazhdojmë të ecim së bashku".
