Republika e Afrikës Qendrore, vritet meshtari Crépin Martial Monga, zë i paqes dhe pajtimit

Vatican News

Meshtari katolik atë Crépin Martial Monga, vikar i famullisë së Shën Gjon Pagëzuesit në Zémio, në dioqezën e Bangassou, u vra me armë zjarri më 29 qershor pranë shtëpisë famullitare. Varrimi i tij u kremtua më 1 korrik në Katedralen e Bangassou.

I njohur për angazhimin e tij në favor të paqes, dialogut dhe pajtimit, Aë Monga drejtonte Komitetin Lokal për Paqe dhe Pajtim, i cili ndërmjetësonte mes komuniteteve, autoriteteve dhe grupeve të ndryshme në një nga zonat më të trazuara të Republikës së Afrikës Qendrore.

Rajoni Haut-Mbomou, në juglindje të vendit, prej vitesh përballet me dhunë të vazhdueshme për shkak të pranisë së grupeve të armatosura, tensioneve etnike dhe rivalitetit për kontrollin e territorit dhe burimeve natyrore, ndërsa kriza humanitare dhe zhvendosja e popullsisë vazhdojnë të përkeqësohen.

Dioqeza e Bangassou dhe Simpoziumi i Konferencave Ipeshkvnore të Afrikës dhe Madagaskarit (SECAM) e cilësuan vrasjen e meshtarit një humbje të madhe për Kishën dhe për komunitetin lokal, duke vlerësuar dëshminë e tij të palodhur në shërbim të paqes, dialogut dhe bashkëjetesës.