Françesku: t'i kërkojmë Marisë ta shoqërojë shtegtimin e Sinodit
R.SH. / Vatikan
Një lutje drejtuar Marisë për të shoqëruar fazën e parë të Asamblesë së Zakonshme të Sinodit të Ipeshkvijve, planifikuar për datat 4 deri në 29 tetor, në Vatikan, me temë "Për një kishë sinodale: bashkimi, pjesëmarrja, misioni". Papa Françesku e kërkoi dje pas kremtimit të Mbretëreshës Qiellore, duke kujtuar se të mërkurën e ardhshme, më 31 maj, në fund të muajit marian, ndër Shenjtëroret kushtuar Nënës së Zotit, në të gjithë botën, "do të ketë çaste lutjeje në mbështetje të përgatitjeve për asamblenë e tetorit” si dhe për fazën e dytë, në vjeshtë 2024.
Nismë e Sekretarisë së Përgjithshme të Sinodit
Sekretaria e Përgjithshme e Sinodit propozoi për të mërkurën, 31 maj, ditë e përkujtimit liturgjik të Vizitës së Virgjërës Mari, kremtimin e një lutjeje mariane në mbarë botën, në përgatitje për dy fazat e Asamblesë së Përgjithshme të Sinodit të ipeshkvijve. Qëllimi - shkruhet në një shënim - është "të ndërgjegjësohet populli i Zotit për rëndësinë e procesit në vazhdim, të nxiten besimtarët që ta shoqërojnë atë me lutje" dhe të vihet "nën mbrojtjen specifike të Zojës i gjithë procesi sinodal në Kisha e, veçanërisht, puna e Asamblesë së Përgjithshme”.
Zgjedhja e shenjtëroreve i përket Konferencave Episkopale
Ftesa kujton "se do të jetë një çast lutjeje, që do të shprehë bukurinë e besimit popullor rreth shenjtëroreve mariane", të cilat do të zgjidhen sipas gjykimit të Konferencave të ndryshme ipeshkvnore të çdo vendi. Lutja duhet të përfshijë pjesëmarrjen e meshtarëve, të besimtarëve e të rregulltarëve. Edhe bashkësitë individuale të famullisë, në marrëveshje me ipeshkvin e tyre dioqezan, ftohen të ndalen e të luten disa çaste për suksesin e Sinodit. Konferencat Ipeshkvnore do ta organizojnë çastin e lutjes sipas dëshirës. Për Italinë, CEI ka përgatitur një broshurë liturgjike, e cila mund të shkarkohet nga faqja e internetit www.chiesacattolica.it.