Papa: i trishtuar nga përleshjet në Madagaskar, të shmanget dhuna

R.SH. – Vatikan

Papa Leoni XIV shprehu trishtimin e tij për lajmet nga Madagaskari, vendi i Afrikës Lindore i tronditur këto ditë nga dhuna, pas demonstratave të rinisë, për shkak të ndërprerjeve të ujit dhe të energjisë elektrike. Në thirrjen e tij, në fund të audiencës së përgjithshme në Sheshin e Shën Pjetrit, Papa foli për "përleshje të dhunshme" ndërmjet forcave të rendit dhe protestuesve, të cilat kanë sjellë vdekje e plagosje. Sipas shifrave të fundit të publikuara nga OKB-ja, 22 vetë kanë humbur jetën dhe më se njëqind janë plagosur.

“T'i lutemi Zotit që të shmanget gjithmonë çdo formë dhune dhe të favorizohet kërkimi i vazhdueshëm i harmonisë shoqërore, përmes promovimit të drejtësisë dhe të mirës së përbashkët”.

Demonstratat

Të frymëzuara nga protestat e "Gjeneratës Z" në Kenia dhe Nepal, demonstratat në Madagaskar - më të mëdhatë që vendi ka parë ndonjëherë - lindën nga acarimi i miliona njerëzve, për shkak të keqësimit të kushteve ekonomike dhe shoqërore. Shërbimet që mungojnë, infrastruktura e pamjaftueshme, ndërprerjet e vazhdueshme të energjisë elektrike dhe korrupsioni në qeveri janë në rrënjë të kësaj pakënaqësie. Grupet rinore, duke përdorur mediat sociale, nisën një mobilizim, që kulmoi me protestat, të cilat e bënë presidentin Andry Rajoelina - i cili erdhi në pushtet për herë të parë përmes një grushti shteti në vitin 2009 - të shpërndante qeverinë e tij më 29 shtator. Sipas OKB-së, forcat e rendit kanë shkaktuar viktima edhe ndër kalimtarët e njerëz të tjerë janë vrarë nga banda kriminale. Manifestuesit kanë bërë thirrje për protesta të mëtejshme, të cilat janë shtrirë edhe në qytete të tjera të ishullit.