Papa: marrëdhëniet njerëzore në mjekësi janë të pazëvendësueshme

R.SH. / Vatikan

Qëllimi i kujdesit për individët thekson "natyrën e pazëvendësueshme të marrëdhënieve njerëzore" në fushën e mjekësisë. Profesionalizmi mjekësor "kërkon jo vetëm aftësitë e nevojshme specifike, por edhe aftësinë për të komunikuar dhe për të qenë afër të tjerëve. Ai nuk mund të reduktohet kurrë në zgjidhjen e thjeshtë të një problemi". Kështu pohon Papa Leoni XIV në mesazhin drejtuar pjesëmarrësve në Kongresin Ndërkombëtar të Akademisë Papnore për Jetën: "Inteligjenca Artificiale dhe Mjekësia: sfida e dinjitetit njerëzor".

"Në të njëjtën mënyrë, pajisjet teknologjike nuk duhet të zvogëlojnë kurrë marrëdhënien personale midis pacientëve dhe punonjësve të kujdesit shëndetësor", theksoi Papa. Në fakt, "nëse inteligjenca artificiale duhet të jetë në shërbim të dinjitetit njerëzor dhe ofrimit efikas të kujdesit shëndetësor, ne duhet të sigurojmë që ajo të përmirësojë realisht si marrëdhëniet ndërpersonale ashtu edhe kujdesin e ofruar".

Papa Leoni vuri në dukje se si përparimet e reja teknologjike po ndikojnë "thellësisht në mënyrën tonë të të menduarit, duke ndryshuar kuptimin tonë të situatave dhe mënyrën se si e perceptojmë veten dhe të tjerët". Aktualisht, shton Ati i Shenjtë Prevost, "ne ndërveprojmë me makinat sikur të ishin bashkëbisedues, duke u bërë pothuajse një zgjatim i tyre. Në këtë kuptim, jo vetëm që rrezikojmë të humbasim nga sytë fytyrat e njerëzve rreth nesh, por edhe të harrojmë si të njohim dhe të vlerësojmë gjithçka që është vërtet njerëzore".