Papa: Shën Gjon Henri Newman, pajtor i Universitetit Papnor Urbaniana
R.SH. / Vatikan
Mban datën 1 nëntor 2025, Solemnitet i të Gjithë Shenjtorëve, Kirografi i Papës Leoni XIV, me të cilin vendosi që Shën Gjon Henri Newman të jetë Shenjt Pajtor Qiellor i Universitetit Papnor Urbaniana, në Romë. Ky vendim vjen ditën kur kardinali anglez Newman u shpall Doktor i Kishës, pas Meshës së kremtuar në Sheshin e Shën Pjetrit, në Vatikan, me rastin e Jubileut të Botës Edukative.
Në Kirografin e Papës lexohet se kërkesa e Kardinalit Luis Antonio Gokim Tagle, Kancelar i Madh i Universitetit Papnor Urbaniana, u pranua me propozimin e Profesor Vincenzo Buonomo, Delegat Papnor i universitetit me autoritetin dhe kompetencat e Rektorit.
Papa dekretoi: "Shën Gjon Henri Newman, Doktor i Kishës, i lindur më 21 shkurt 1801 në Londër, vdekur më 11 gusht 1890 në Edgbaston, i shenjtëruar më 13 tetor 2019 në Sheshin e Shën Pjetrit, të shpallet Pajtor i Universitetit Papnor Urbaniana, në mënyrë që të ndërmjetësojë - pohon Kirografi - për këtë institucion akademik dhe të jetë, për ata që formohen atje në shërbimin misionar të Kishës, modele të ndritshme besimi dhe kërkimi të sinqertë të së vërtetës".
Në homelinë e Meshës së 1 nëntorit, Papa Leoni XIV theksoi "madhështinë imponuese kulturore dhe shpirtërore të Newman", frymëzim për brezat e ardhshëm, zemrat e të cilëve "kanë etje për pafundësinë" e që, përmes "kërkimit dhe dijes", do të jenë në gjendje të përballojnë "atë shtegtim që, siç thoshin të lashtët, na çon per aspera ad astra, domethënë, përmes vështirësive, drejt yjeve".
