Selia e Shenjtë: keqpërdorimi i teknologjive të reja nxit trafikimin e qenieve njerëzore
R.SH. – Vatikani
Rekrutimi, kontrolli dhe abuzimi i viktimave: këto janë aktivitetet që nxisin plagën e trafikimit të qenieve njerëzore, një fenomen i përkeqësuar nga përdorimi gjithnjë e më i shpeshtë dhe i shtrembëruar i teknologjive të reja. Për ta luftuar atë, nevojiten politika që i vendosin këto mjete në shërbim të së mirës së përbashkët. Kështu ka deklaruar Selia e Shenjtë përmes kryeipeshkvit Imzot Marco Formica, Këshilltar në Misionin e Përhershëm të Vatikanit në Kombet e Bashkuara, i cili foli dje, më 26 nëntor, në Takimin e Katërt të Nivelit të Lartë mbi Vlerësimin e Planit Global të Veprimit të OKB-së kundër Trafikimit të Qenieve Njerëzore, në selinë e Nju Jorkut.
Të miturit ndër më të prekurit nga trafikimi
Imzot Formica shprehu vlerësimin e të gjithë delegacionit të Vatikanit për punën e Planit Global të Veprimit, pesëmbëdhjetë vjet pas miratimit të tij. Ai vuri në dukje, megjithatë, se numri i viktimave të trafikimit të qenieve njerëzore vazhdon të rritet në mbarë botën, me një përfshirje gjithnjë e më të rëndësishme të të miturve të pashoqëruar ose të ndarë nga familja. Midis tyre, vajzat shpesh trafikohen "për qëllime shfrytëzimi seksual", ndërsa djemtë i nënshtrohen punës së detyruar, aktivitetit kriminal ose lypjes. "Të dyja format e shfrytëzimit", deklaroi Monsinjor Formica, "minojnë dinjitetin e dhënë nga Zoti viktimave".
Teknologjitë lehtësojnë rekrutim, kontroll dhe shfrytëzim
Duke ripohuar shqetësimin e Selisë së Shenjtë për këtë situatë "dramatike", Kryeipeshkvi imzot Formica theksoi se, pavarësisht progresit të bërë, rrjetet e trafikimit vazhdojnë të shfrytëzojnë dobësitë e krijuara nga varfëria, moszhvillimi dhe emergjencat humanitare. "Abuzimi në rritje i teknologjive që evoluojnë me shpejtësi", shtoi ai, "lehtëson rekrutimin, kontrollin dhe shfrytëzimin e viktimave". Prandaj, ky trend duhet të përmbyset, duke siguruar që mjetet e reja, përfshirë inteligjencën artificiale, të përdoren "në shërbim të dinjitetit njerëzor, drejtësisë dhe të mirës së përbashkët".
Drejtësia dhe ribashkimi i familjes
Nga perspektiva e Selisë së Shenjtë, Deklarata e re Politike mbi Zbatimin e Planit Global thekson nevojën për të forcuar bashkëpunimin ndërkombëtar dhe rajonal për të parandaluar të gjitha format e trafikimit, për t'iu përgjigjur nevojave specifike të viktimave të trafikimit të qenieve njerëzore - "përfshirë ribashkimin në kohë të familjeve" - dhe për të promovuar përgjigje efektive përmes drejtësisë penale.
