Ukrainë, kard. Parolin: fyerje ndaj Zotit t’i lësh civilët në terr e në të ftohtë

R.SH. / Vatikan

Në Ukrainë "nuk ka asnjë justifikim për detyrimin e mijëra civilëve që jetojnë në errësirë ​​dhe të ftohtë. Jemi thellësisht të tronditur nga lajmet për sulmet kundër sistemeve elektrike dhe objekteve civile, të cilat e kanë bërë edhe më të vështirë jetën e një mori njerëzve". Këtë theksoi Kardinali Pietro Parolin, Sekretar i Shtetit të Vatikanit, gjatë predikimit në Meshën për paqtimin e shpirtrave të viktimave të Holodomorit, meshë tragjike e urisë shkaktuar nga regjimi sovjetik ndërmjet viteve 1932 dhe 1933, kremtuar pasdite, më 20 nëntor, në Kishën e Sant'Andrea della Valle, në Romë. Të pranishëm mbi 50 ambasadorë nga 80 misione me bazë në Romë. Duke kujtuar rishtas konfliktin e vazhdueshëm me Rusinë, kardinali Parolin theksoi se "Çdo akt që privon popullsinë civile nga mundësia për të jetuar me dinjitet, është fyerje kundër njerëzimit e zemërim kundër Zotit".

Kardinali Parolin kujtoi, më pas, edhe fjalët e Papës Leo drejtuar gazetarëve të martën në mbrëmje:

"Për fat të keq, çdo ditë, po vdesin njerëz. Ndaj duhet të këmbëngulim për paqe, duke nisur me këtë armëpushim, për të vijuar pastaj me dialogun".

Plani i Paqes

Edhe jashtë Kishës, duke iu përgjigjur pyetjeve të gazetarëve, Kardinali Parolin u rikthye në situatën aktuale të luftës, duke komentuar planin e paqes me 28 pika, të propozuar nga Presidenti i SHBA-së Donald Trump. Sekretari i Shtetit të Vatikanit shpreson "të hapen shtigje dialogu, që do të lejojnë përfundimin e kësaj tragjedie. "Do të jetë shumë e vështirë të gjendet kompromisi ndërmjet nevojave të njërës palë dhe kërkesave të të dyja palëve. Kështu që unë imagjinoj se rruga e negociatave do të jetë një betejë e vështirë", komentoi Sekretari i Shtetit.

Negociata dhe kompromise

Për të, "Evropa duhet të marrë pjesë dhe ta bëjë zërin e saj të dëgjohet, jo të lihet jashtë", veçanërisht sepse "deri tani është angazhuar në mënyrë aktive" në emër të Ukrainës. Lidhur me çështjen e transferimit të territoreve, "është e parakohshme" ta diskutojmë atë, "gjithashtu sepse në fund të fundit do të jetë rezultat i negociatave. Paqja - vijoi kard. Parolin - do të arrihet vetëm nëse të dyja palët janë disi të kënaqura me kompromisin, sepse në fund të fundit do të duhet të bëhet një kompromis".

Holodomori: tmerr i lindur nga urrejtja e shpërdorimi i pushtetit

Në homelinë e tij, Kardinali Parolin kujtoi edhe tragjedinë e Holodomorit, e cila kushtoi jetën e miliona burrave, grave dhe fëmijëve. "Nuk ishte natyra, që e krijoi këtë tmerr, por urrejtja, padrejtësia, indiferenca dhe abuzimi i pushtetit", tha ai. Megjithatë, në Vitin Jubilar të Shpresës, shtoi kardinalin Parolin, ne duam ta ripërtërijmë shpresën "për viktimat e djeshme, për ata që vuajnë sot, për një popull që dëshiron paqe, liri dhe ardhmëri të qetë". Për këtë arsye, sot, "së bashku me popullin ukrainas, të ngarkuar nga plagët historike dhe nga tragjedia e luftës së vazhdueshme, jemi të thirrur të këmbëngulim në lutje dhe të dëshmojmë një besim që e zgjat, e shpreson, e pret në heshtje, por me forcë, shpëtimin e Zotit".

Sekretari i Shtetit të Vatikanit e përfundoi homelinë e tij duke ia besuar mëshirës së amshuar të Zotit të jetës "të gjitha viktimat e urisë, të urrejtjes dhe të dhunës", duke u lutur "me përvujtëri e besim që agimi i paqes, një paqeje të drejtë dhe të qëndrueshme, të agojë së shpejti për Ukrainën".