Ujumbe wa Papa wa WYD:Urafiki wetu na Yesu ni zawadi ili kuwa wajenzi wa amani katika jamii

Na Angella Rwezaula - Vatican.

Katika Ujumbe wa Baba Mtakatifu wa Siku ya XL ya Vijana Ulimwenguni, uliochapishwa tarehe 7 Oktoba  2025 katika kumbu kumbu ya Bikira Maria wa Rozari Takatifu wenye kauli mbiu: “Ninyi pia ni mashahidi wangu, kwa sababu mmekuwa pamoja nami”(Yh 15:27) kuna mambo muhimu ambayo Papa anawandikia vijana akisisitiza wao wawe mashuhuda kwa sababu wako pamoja na Bwana. Wawe na shauku za kweli, uzuri, furaha, na amani na upendo. Ufuatao ni ujumbe kamili wa Baba Mtakatifu.

Asanteni kufika Roma kwa Jubilei

Vijana wapendwa, ninapoanza ujumbe wangu wa kwanza kwenu, ningependa kusema asante! Asante kwa furaha mliyoleta mlipokuja Roma kwa ajili Jubilei yenu, na asante kwa vijana wote ambao walikuwa wameungana nasi kupitia maombi yao kutoka kila sehemu ya dunia.  Ilikuwa ni wakati wa thamani kwa ajili ya kupyaisha shauku yetu kwa ajili ya imani na kushiriki tumaini linalowaka mioyoni mwetu! Badala ya kuwa tukio la kipekee, ninatumaini alama za Jubilei ya kukutana kwa kila mmoja wenu zitawafanya kupiga hatua katika maisha ya Kikristo na kutiwa moyo sana kuvumilia katika kushuhudia imani yenu.

Nguvu hiyo hiyo ndiyo kiini cha Siku ya Vijana Ulimwenguni ijayo, ambayo tutaadhimisha tarehe 23 Novemba 2025, katika , Sherehe ya Kristo Mfalme, yenye mada: “Ninyi pia ni mashahidi wangu, kwa kuwa mmekuwa pamoja nami” (Yh 15:27).  Kama mahujaji wa matumaini, kwa uwezo wa Roho Mtakatifu, tunajitayarisha kuwa mashuhuda jasiri wa Kristo. Basi tuanze safari ambayo itatupeleka kwenye Siku ya Kimataifa ya Vijana Ulimwenguni huko Seoul mnamo 2027.  Kwa kuzingatia hilo, ningependa kuzingatia vipengele viwili vya ushuhuda: urafiki wetu na Yesu, ambao tunapokea kutoka kwa Mungu kama zawadi, na ahadi yetu ya kuwa wajenzi wa amani katika jamii.

Marafiki kwa hiyo  mashuhuda

Ushuhuda wa Kikristo unatokana na urafiki na Bwana, ambaye alisulubiwa na kufufuka kwa ajili ya wokovu wa wote. Ushuhuda huu haupaswi kuchanganya na propaganda za kiitikadi, kwa kuwa ni kanuni halisi ya mabadiliko ya mambo ya ndani na ufahamu wa kijamii. Yesu aliamua kuwaita wanafunzi wake “marafiki.” Aliwajulisha Ufalme wa Mungu, akawaomba wakae naye, wawe jumuiya yake, na kuwatuma kutangaza Injili (rej. Yh 15:15, 27).  Kwa hiyo, Yesu anapotuambia, “Muwe mashahidi,” anatuhakikishia kwamba anatuona kuwa marafiki zake. Yeye pekee ndiye ajuaye kikamilifu sisi ni nani na kwa nini tuko hapa; vijana, anaujua moyo wenu, hasira zenu mbele ya ubaguzi na ukosefu wa haki, hamu yenu ya ukweli na uzuri, furaha na amani.

Urafiki utupatia ushirika na Mungu na wengine

Kupitia urafiki wake, anawasikiliza, anawatia moyo, na kuwaongoza, akiita kila mmoja wenu kwenye maisha mapya. Mtazamo wa Yesu, ambaye siku zote hataki chochote ila mema yetu, unatutangulia (rej. Mk 10:21). Hataki tuwe watumishi, wala “wanaharakati” wa chama cha siasa; anatuita tuwe pamoja naye kama marafiki, ili maisha yetu yafanywe upya.  Na shuhuda hutokea kwa hiari kutokana na upya wa furaha wa urafiki huu. Ni urafiki wa kipekee ambao hutupatia ushirika na Mungu, urafiki mwaminifu ambao hutusaidia kugundua hadhi yetu na ya wengine, urafiki wa milele ambao hata kifo hakiwezi kuuharibu, kwa sababu Bwana aliyefufuka na kusulubiwa ndiye chanzo chake. Hebu tufikirie ujumbe ambao Mtume Yohane anatupatia mwishoni mwa Injili ya nne: “Huyu ndiye mwanafunzi ayashuhudiaye hayo, na kuyaandika haya, nasi twajua ya kuwa ushuhuda wake ni kweli”(Yh 21:24).

Ushuhuda wa Kristo ni tunda la uhusiano wa imani

Simulizi lote lililotangulia limefupishwa kuwa “ushuhuda,” uliojaa shukrani na mshangao, kutoka kwa mfuasi ambaye hakuwahi kufichua jina lake, bali anajiita “mwanafunzi ambaye Yesu alimpenda.”Kichwa hiki kinaonesha uhusiano: sio jina la mtu binafsi, lakini ushuhuda wa dhamana ya kibinafsi na Kristo. Hilo ndilo jambo la maana sana kwa Yohane: kuwa mfuasi wa Bwana na kuhisi kupendwa naye. Tunaelewa, basi, kwamba ushuhuda wa Kikristo ni tunda la uhusiano wa imani na upendo na Yesu, ambaye ndani yake tunapata wokovu wa maisha yetu. Anachoandika Mtume Yohane pia kinawahusu ninyi wapendwa vijana. Mnaalikwa na Kristo kumfuata na kuketi karibu naye, kusikiliza moyo wake na kushiriki kwa karibu katika maisha yake! Kila mmoja wenu ni “mwanafunzi mpendwa” kwake, na kutokana na upendo huu huja furaha ya ushuhuda.

Mashuhuda wa kweli wakoje?

Shuhuda mwingine wa ujasiri wa Injili ni Mtangulizi wa Yesu, Yohane Mbatizaji, ambaye alikuja "kuishuhudia nuru, ili wote wapate kuamini kwa yeye" (Yh 1:7). Ingawa alifurahia umaarufu mkubwa miongoni mwa watu, alijua vyema kwamba alikuwa “sauti”tu inayoelekeza kwa Mwokozi aliposema, “Tazama, Mwana-Kondoo wa Mungu” (Yh 1:36). Mfano wake unatukumbusha kwamba mashuhuda wa kweli hawatafuti kuchukua hatua kuu, wala kuwafunga wafuasi wao kwao wenyewe. Mashuhuda wa kweli ni wanyenyekevu na huru wa ndani, juu ya yote kutoka katika kujifanya kuwa kitovu cha umakini. Kwa hiyo, wako huru kusikiliza, kuelewa, na pia kusema ukweli kwa kila mtu, hata mbele ya wale walio na nguvu.  Kutoka kwa Yohane Mbatizaji, tunajifunza kwamba ushuhuda wa Kikristo si tangazo letu  wenyewe,  wala sherehe ya uwezo wetu wa kiroho, kiakili au kimaadili. Shahuda wa kweli ni kutambua na kuelekeza kwa Yesu anapotokea, kwani ndiye pekee anayetuokoa. Yohane alimtambua kati ya wenye dhambi, akiwa amezama katika ubinadamu wa kawaida.

Tukiridhika na maeneo ya furaja hatuwezi kukutana na Yesu

Kwa ajili hiyo, Papa Francisko alisisitiza mara kwa mara kwamba ikiwa hatuendi zaidi ya nafsi zetu na maeneo yetu ya faraja, ikiwa hatutawaendea maskini na wale wanaohisi kutengwa na Ufalme wa Mungu, hatuwezi kukutana na Kristo na kumshuhudia. Tunapoteza furaha tamu ya kuinjilishwa na kuinjilisha. Marafiki wapendwa, ninawaalika kila mmoja wenu kuendelea kuwashirikisha marafiki na mashuhuda wa Yesu katika Biblia. Mnaposoma Injili, mtagundua kwamba wote waligundua maana halisi ya maisha kupitia uhusiano wao wa kuishi na Kristo.  Hakika, maswali yetu mazito zaidi hayasikilizwi au kujibiwa kwa kutembeza bila kikomo kwenye simu zetu za mikononi, jambo ambalo huvutia umakini wetu,  lakini hutuacha na akili zilizochoka na mioyo mitupu. Utafutaji huu hautatupeleka mbali ikiwa tutaufunga ndani yetu au katika vizuizi finyu. Utimilifu wa matamanio yetu ya kweli daima huja kupita sisi wenyewe.

Mashuhuda, kwa hiyo wamisionari

Kwa njia hii, vijana wapendwa , kwa msaada wa Roho Mtakatifu, mnaweza kuwa wamisionari wa Kristo ulimwenguni. Vijana wenzenu  wengi wamekabiliwa na jeuri, wanalazimika kutumia silaha, kutengwa na wapendwa wao, na kulazimika kuhama au kukimbia.  Wengi hawana elimu na bidhaa nyingine muhimu. Wote wanashiriki nanyi utafutaji wa maana na ukosefu wa usalama unaowasindikiza, usumbufu wa kuongezeka kwa shinikizo la kijamii na kazi, ugumu wa kukabiliana na migogoro ya familia, hisia za uchungu za ukosefu wa fursa, pamoja na majuto kwa makosa ambayo wametendwa. Mnaweza kusimama pamoja na vijana wengine, kutembea nao na kuonesha kwamba Mungu, katika Yesu, amemkaribia kila mtu. Kama Papa Francisko alivyosema mara kwa mara, “Kristo anaonesha kwamba Mungu ni ukaribu, huruma na upendo mwororo” (Waraka wa Dilexit nos, 35).

Ni kweli kwamba si rahisi sikuzote kutoa ushuhuda. Katika Injili, mara nyingi tunapata mvutano kati ya kukubalika na kukataliwa kwa Yesu: "Nuru yang'aa gizani, na giza halikuiweza" (Yh 1: 5).  Vivyo hivyo, shuhuda-mwanafunzi hupata kukataliwa mwenyewe na wakati mwingine hata upinzani mkali. Bwana hafichi ukweli huu wa uchungu: "Ikiwa walinitesa mimi, watawatesa ninyi" (Yh 15:20).  Hata hivyo, inakuwa fursa ya kutekeleza amri kuu zaidi: “Wapendeni adui zenu na waombeeni wale wanaowatesa ninyi” (Mt 5:44). Hivyo ndivyo wafiadini wamefanya tangu mwanzo wa Kanisa.

Wakristo wengi duniani wanateswa

Vijana wapendwa, hii sio historia ya zamani tu. Hadi leo, katika sehemu nyingi ulimwenguni, Wakristo na watu wenye mapenzi mema wanateswa, udanganyifu na jeuri.  Labda uzoefu huu wenye uchungu umewaweka alama pia, na mnaweza kuwa mmejaribiwa kuitikia kisilika kwa kujiweka katika kiwango sawa na wale ambao wamewakataa, kuchukua mitazamo ya fujo. Lakini tukumbuke ushauri wenye hekima wa Mtakatifu Paulo: “Usishindwe na ubaya, bali uushinde ubaya kwa wema” (Rm 12:21). Kwa hivyo usivunjike moyo: kama watakatifu, wewe pia umeitwa kudumu kwa tumaini, haswa katika uso wa shida na vizuizi.

Udugu kama kifungo cha amani

Kutoka katika urafiki na Kristo, ambayo ni zawadi ya Roho Mtakatifu ndani yetu, kunatokea njia ya maisha inayobeba tabia ya udugu. Vijana ambao wamekutana na Kristo huleta “joto” na “ladha” ya udugu popote waendapo, na yeyote anayekutana nao anavutwa katika mwelekeo mpya na wa kina, unaojumuisha ukaribu usio na ubinafsi, huruma ya kweli na upole wa kweli. Roho Mtakatifu hutuwezesha kumwona jirani yetu kwa mtazamo mpya: kwa mtu mwingine kuna kaka, dada! Ushuhuda wa udugu na amani kwamba urafiki na Kristo huamsha ndani yetu kutupilia mbali kutojali na uvivu wa kiroho, na kutusaidia kushinda mawazo yaliyofungwa na mashaka. Pia hujenga uhusiano kati yetu, na kutuhimiza kufanya kazi pamoja, kutoka katika kujitolea hadi "msaada wa kisiasa," ili kujenga hali mpya ya maisha kwa wote.  Msiwafuate wale wanaotumia maneno ya imani kugawanya; badala yake, fanyeni mipango ya kuondoa ukosefu wa usawa na kupatanisha jamii zilizogawanyika na kukandamizwa.

Salini Rozari na kamwe hatuko peke yetu

Kwa ajili hiyo, wapendwa, tusikilize sauti ya Mungu ndani yetu na tushinde ubinafsi wetu, tuwe mafundi hai wa amani.  Amani hiyo, ambayo ni zawadi ya Bwana mfufuka (rej. Yh 20:19), itaonekana katika ulimwengu kupitia ushuhuda wa kawaida wa wale wanaobeba Roho wake mioyoni mwao. Vijana wapendwa, katika uso wa mateso na matumaini ya ulimwengu, tuweke Mtazamo wetu kwa Yesu. Alipokuwa akifa msalabani, alimkabidhi Bikira Maria kwa Yohane kama mama yake, na Yohane kwake kama mwanawe. Karama hiyo kuu ya upendo ni kwa kila mfuasi, kwa kila mmoja wetu. Ninawaalika mkaribishe kifungu hiki kitakatifu pamoja na Maria, Mama aliyejawa na upendo na ufahamu, na kuukuza hasa kwa kusali Rozari.  Kwa njia hiyo, katika kila hali ya maisha yetu, tutapata uzoefu kwamba kamwe hatuko peke yetu, kwa kuwa kama watoto sisi daima tunapendwa, tunasamehewa na kutiwa moyo na Mungu. Shuhudieni hili kwa furaha.

Asante sana kusoma makala hii. Kama unataka kusasishwa zaidi, jiandikishe katika makala za kila siku kwa kubonyeza hapa: Just click here