B. Maria Mama wa Kanisa: Waraka wa Magnifica humanitas: Utu wa Kupendeza!
Na Padre Richard A. Mjigwa, C.PP.S. – Vatican.
Hayati Baba Mtakatifu Francisko anawaalika waamini na watu wote wenye mapenzi mema kukimbilia ulinzi na tunza ya Bikira Maria, Mama wa Kanisa. Awe ni faraja na matumaini kwa wagonjwa, maskini na wale wote wanaosukumizwa pembezoni mwa jamii. Waamini wanahimizwa kufanya hija ya maisha ya kiroho pamoja na Bikira Maria, aliyethubutu kumfuasa Kristo Yesu katika Njia ya Msalaba, ili kuambata na kukumbatia huruma na upendo wake usiokuwa na kifani. Maria ni Bikira na Mama kwa sababu yeye ni ishara na utimilifu kamili wa Kanisa. Kanisa kwa kupokea Neno la Mungu kiaminifu linakuwa pia ni Mama, kwani kwa mahubiri na ubatizo linazaa watoto waliotungwa na Roho Mtakatifu na kuzaliwa na Mungu kwa uzima mpya usiokufa. Bikira Maria Mama wa Yesu ni wito ulio hai wa Roho Mtakatifu kwani Yeye ni Mama wa Kanisa. Ndiyo maana Baba Mtakatifu Francisko anapenda kumkabidhi kwake, Jumuiya ambazo kwa wakati huu zinahitaji zaidi nguvu ya Roho Mtakatifu: Mtetezi na Mfariji; Roho wa kweli, uhuru na amani. Bikira Maria aliendelea kuandamana na Kanisa katika sala wakati Mitume wakisubiria ujio wa Roho Mtakatifu. Kwa nyakati mbalimbali, waamini wamekuwa wakimheshimu na kumfanyia Ibada Bikira Maria kama: Mama wa Mitume, Mama wa waamini wa wale wote wanaozaliwa upya katika Kristo Yesu na Mama wa Kanisa kama wanavyofundisha Papa Benedikto XV pamoja na Papa Leo wa XIII.
Mtakatifu Paulo VI kunako tarehe 21 Novemba 1964, Wakati Mababa wa Mtaguso Mkuu wa Pili wa Vatican walipokuwa wanahitimisha Kikao cha tatu cha Mtaguso huo, alitamka kwamba, Bikira Maria ni Mama wa Kanisa; yaani: ni Mama wa Wakristo wote na wachungaji wanaomkimbilia kama Mama. Kumbe, Bikira Maria, Mama wa Kanisa anapaswa kuheshimiwa na Wakristo wote. Katika maadhimisho ya Mwaka wa Upatanisho1975, kuliadhimishwa Ibada ya Misa Takatifu kwa ajili ya Bikira Maria, Mama wa Kanisa. Litania ya Bikira Maria wa Loreto ikaongeza heshima hii katika Litania. Majimbo mbalimbali wakaona kwamba, inafaa na kuomba Kiti Kitakatifu kuruhusu maadhimisho haya yaingizwe katika kalenda ya majimbo yao! Kutokana na kukua na hatimaye, kukomaa kwa Ibada ya Bikira Maria, Mama wa Kanisa, Baba Mtakatifu Francisko akaridhia tamko lililotolewa na Baraza la Kipapa la Ibada na Nidhamu ya Sakramenti za Kanisa kwamba, kuanzia sasa Sikukuu ya Bikira Maria Mama wa Kanisa itakuwa inaadhimishwa Jumatatu baada ya Sherehe ya Pentekoste ya kila mwaka!
Kumbukumbu ya Bikira Maria Mama wa Kanisa, ambayo inaadhimishwa, Jumatatu baada ya Sherehe ya Pentekoste na kwa mwaka huu ni tarehe 25 Mei 2026 inabeba uzito wa pekee kwani Waraka wa kwanza wa Kitume wa Baba Mtakatifu Leo XIV: “Magnifica humanitas” yaani: “Utu wa kupendeza" Juu ya Hifadhi ya Mwanadamu Katika Enzi ya Teknolojia ya Akili Unde” kwa kifupi “MH” umezinduliwa rasmi tarehe 25 Mei 2026, Kumbukumbu ya Bikira Maria Mama wa Kanisa. Katika Waraka huu wa Kitume, Baba Mtakatifu Leo XIV anazungumzia kuhusu: Mtazamo thabiti wa uaminifu kwa Injili; misingi na kanuni za Mafundisho Jamii ya Kanisa; Teknolojia na utawala. Ukuu wa ubinadamu katika nuru ya ahadi za teknolojia ya akili unde; Kulinda utu wa binadamu wakati wa mabadiliko: na hatimaye ni kuhusu: Ukweli, kazi, uhuru; utamaduni wa nguvu na ustaarabu wa upendo. Mwishoni mwa Waraka wake wa Kitume, Baba Mtakatifu Leo XIV anapendekeza programu ya maisha ya Kikristo inayosimikwa katika kiasi, lakini inayohitaji nguvu ya kuweza kukabili mabadiliko ya teknolojia wakati wowote kwa mwanga wa Injili. Njia hii inawezekana kwa waamini kutafakari mpango wa Mungu katika maisha yao, kwa kujenga na kudumisha umoja na ushirika wa Kikanisa kwa ushiriki mkamilifu katika Maadhimisho ya Fumbo la Ekaristi Takatifu sanjari na kujikita katika ujenzi wa Ulimwengu unaozingatia wema wa wote na kuendelea kusali katika umoja na Bikira Maria Mama wa Kanisa.
Baba Mtakatifu Leo XIV anasema, Mapinduzi makubwa ya Viwandani yalikuwa ni kipindi kutoka karne ya 18 hadi karne ya 19 ambapo yalitokea mabadiliko makubwa katika sekta ya kilimo, utengenezaji wa bidhaa, uchimbaji wa madini na uchukuzi yakiwa na matokeo makubwa kwa hali ya kiuchumi, ya kijamii na ya kitamaduni. Papa Leo XIII katika Waraka wake wa Kitume: Rerum Novarum” yaani “Mambo Mapya” miaka 135 iliyopita akayaangalia Mapinduzi haya kwa mwanga wa Injili: Matatizo na changamoto za wafanyakazi viwandani, familia za wafanyakazi hawa; utu, heshima na haki msingi za binadamu na kuyapembua kwa mwanga wa tunu msingi za Kiinjili. Leo hii, maendeleo makubwa na matumizi ya teknolojia ya akili unde, yanagusa medani mbalimbali za maisha ya binadamu, yanaendelea kuunda maisha ya binadamu pamoja na vita inayoendelea kurindima sehemu mbalimbali za dunia. Ni katika mwanga wa imani, kwa ufahamu wa busara, kwa ukweli na uwazi, na vilio vya maskini na dunia vinavyovuma moyoni mwake, ni kati ya mambo ambayo yamemfanya Baba Mtakatifu Leo XIV kuandika Waraka huu wa Kitume, kwa kusikiliza kwa dhati mawazo ya wanasayansi, wahandisi, viongozi wa kisiasa na umma wanaoendelea kutafuta kanuni za haki; kwa wazazi na walimu ambao wanajali sana mustakabali wa vijana wao katika ulimwengu mamboleo.
Kuna mifumo ya silaha, ukosefu wa huduma msingi za afya, ajira na uhakika wa usalama; mambo yanayoonesha ukosefu wa haki msingi za binadamu na kwamba, amesikiliza ukimya wa watu wasiokuwa na sauti wakati maamuzi kuhusu hatima ya maisha yao yanafanywa na hivyo kuwepo na uwezekano wa kuzalisha aina mpya ya mateso pamoja na kutengwa. Maendeleo makubwa ya sayansi na teknolojia yawe ni kwa ajili ya kukuza na kudumisha misingi ya haki, amani, ustawi, utu na heshima ya familia ya binadamu; kwa kuwa makini, na hivyo kuwarejeshea watu imani na matumaini, mambo yanayohitaji ushirikishwaji wa wengi. Kanisa linataka kujikita katika majadiliano na matumizi ya teknolojia ya akili unde, kwa kumwilisha hekima ya binadamu, dhamiri nyofu, huduma makini sanjari na utunzaji bora wa mazingira nyumba ya wote. Hiki ni kipindi cha kujenga na kudumisha utamaduni wa kusikilizana, kukabiliana kwa pamoja na changamoto zilizoko mbele ya binadamu na hivyo kushirikiana katika ujenzi wa jamii inayosimikwa katika utu na udugu wa ubinadamu na kwamba, Waraka wa wa Kitume wa “Magnifica humanitas” yaani: “Utu wa kupendeza" Juu ya Hifadhi ya Mwanadamu Katika Enzi ya Teknolojia ya Akili Unde” kwa kifupi “MH” uwaamshe, watu wote ili wawe ni wajenzi na vyombo vya matumaini, tayari kumwimbia Mwenyezi Mungu utenzi wa sifa na shukrani kama alivyofanya Bikira Maria kwa utenzi wake wa “Magnificat.”
Itakumbukwa kwamba, Jubilei ya Mwaka 2025 ya Ukristo ilinogeshwa na kauli mbiu “Peregrinantes in spem” yaani: “Mahujaji wa Matumaini.” Baba Mtakatifu Leo XIV katika mahubiri yake alikazia kuhusu: Furaha ya kuadhimisha kumbukumbu ya Bikira Maria Mama wa Kanisa, chemchemi ya mwanga wa Roho Mtakatifu uliowashukia waamini wakati wa Maadhimisho ya Sherehe ya Pentekoste, kielelezo cha Fumbo la Kanisa linalo shuhudiwa na Mitume wa Yesu waliokuwa wakidumu kwa moyo mmoja katika kusali, pamoja nao, wanawake, na Mariamu Mama yake Yesu, na ndugu zake. Rej. Mdo 1:12,14. Na kama Mwinjili Yohane anavyosimulia, jinsi ambavyo Bikira Maria alivyokuwa amesimama chini ya Msalaba, Kristo Yesu akamkabidhi Mama yake kwa mwanafunzi wake aliyempenda, yaani Yohane, kisha akainama kichwa, akaisalimu roho yake. Rej. Yn 19-25-34. Baba Mtakatifu Leo XIV anasema, Mtakatifu Yohane ndiye peke yake kati ya Mitume kumi na wawili, aliyethubutu kusimama pale Mlimani Kalvari, akashuhudia Kristo Yesu akimkabidhi Mama yake, ambaye sasa ni Eva mpya na huo ndio mwendelezo wa Umama wa Bikira Maria kwa njia ya Roho Mtakatifu, mwaliko na changamoto ya wafuasi wa Kristo Yesu, kumwilisha upendo huu katika uhalisia wa maisha yao. Umama wa Kanisa unategemea kwa kiasi kikubwa Msalaba wa Kristo Yesu, ambao unafananishwa na mbegu ndogo ya haradali unaweza kukua na kuwa mti mkubwa. Katika maadhimisho ya Kumbukumbu ya Bikira Maria Mama wa Kanisa, kuna uwiano na uhusiano mkubwa kati ya Uzao wa Bikira Maria na ule wa Kanisa unaofumbatwa katika utakatifu wa maisha unaosimikwa katika Kiti Kitakatifu na kama alivyo Mama Kanisa. Kiti kitakatifu kinahifadhi na kutunza utakatifu unaomwilishwa katika maisha ya wafanyakazi wake.
Baba Mtakatifu Leo XIV anasema, Mwinjili Luka katika Kitabu chake cha Matendo ya Mitume, anawaonesha Mitume wa Yesu wakiwa na Bikira Maria pamoja na ndugu zake, chumba cha juu, huko walikuwa wakidumu kwa moyo mmoja katika kusali. Sehemu hii ya Maandiko Matakatifu inaonesha Umama wa Bikira Maria katika Kanisa la mwanzo, lililokuwa linazaliwa, hali ambayo imebaki katika nyakati na mahali na kwamba, haya ni matunda ya Fumbo la Pasaka, zawadi makini kutoka kwa Kristo Yesu, aliyeteswa, akafa na kufufuka kwa wafu. Roho Mtakatifu aliyewashukia Mitume kwa nguvu siku ile ya Pentekoste ya kwanza, ni Roho Mtakatifu yule yule ambaye Kristo Yesu aliwapatia Mitume wake, pale alipoinama kichwa, akasalimu roho yake. Rej. Yn 19:30. Kumbe, Umama wa Kanisa daima unaunganishwa na Neema inayobubujika kutoka katika Moyo Mtakatifu wa Yesu, uliotobolewa kwa mkuki, na humo ikatoka Damu na Maji, alama za Sakramenti za Kanisa.
Baba Mtakatifu Leo XIV anasema, Bikira Maria kwa neema na utume aliokabidhiwa chini ya Msalaba na huduma kwa Kanisa la Mwanzo, ni kumbukumbu hai ya Kristo Yesu anayewavuta waja wake kushiriki kikamilifu katika mchakato wa ujenzi wa amani na utulivu katika tofauti zao msingi na kwamba, wanaunganika kwa pamoja katika sala. Bikira Maria aliendelea kumuenzi Mtakatifu Petro katika maisha na utume wake na hivi ndivyo Mama Kanisa anavyoendelea kuwaenzi Makhalifa wa Mtakatifu Petro katika maisha na utume wao na kwamba, Kiti kitakatifu kinashikiliwa na hizi nguzo mbili yaani nguzo ya Bikira Maria pamoja na nguzo ya Mtakatifu Petro. Nguzo ya Bikira Maria inahakikisha uzao na utakatifu wa maisha na nguzo ya Mtakatifu Petro katika uzao wake inawahakikishia zawadi ya Kristo Yesu na ya Roho Mtakatifu. Baba Mtakatifu Leo XIV anawaalika watu wa Mungu kumsifu na kumtukuza Mwenyezi Mungu kwa Neno lake, ambalo ni taa inayoongoza mapito yao, maisha na huduma yao kwa Kiti kitakatifu na alihitimisha mahubiri yake kwa sala ifuatayo: “Ee Baba wa milele upende kulijalia Kanisa lako, likiungwa mkono na upendo wa Kristo Yesu, liweze kuzaa matunda zaidi katika Roho, lifurahie utakatifu wa watoto wake na kukusanya familia nzima ya binadamu kifuani mwake.”
