Hija ya 4 ya Kitume ya Papa Leo XIV,Hispania:Kutoka taasisi hadi pembezoni

Na Salvatore Cernuzio - Vatican.

Ziara ya Kitume ya Papa Leo XIV kwenda Hispania, kuanzia  Juni 6–12, ni muhimu kwa kila njia. Vivyo hivyo matarajio yanayozunguka Ziara hii ya IV ya kimataifa, ambayo itamwona Papa Leo XIV akisafiri kilomita 2,500, akisimama Madrid, Barcelona ​​na Visiwa Vikubwa vya Kanari(Gran Canaria) na Tenerife. Hotuba nyingi, mikutano mingi, ziara nyingi kupitia viwanja vya michezo, watu wengi waamini wanaokadiriwa kuwa nusu milioni wanatarajiwa kuhudhuria matukio mbalimbali na mada nyingi, kuanzia upokonyaji silaha hadi amani, jukumu la Kanisa hadi changamoto zinazokabili Hispania na Ulaya na ulinzi wa maisha hadi uhamiaji.

"Bila shaka, matarajio ni makubwa," alianza Matteo Bruni, Msemaji Mkuu wa Vyombo vya habari vya Vatican  alipokuwa akiwasilisha programu na maelezo ya Ziara ya Papa katika "nchi yenye tamaduni ya  kale ya Kikristo." "Nchi," msemaji wa Vatican alisema, "ambayo ilitumika kama maabara ya mazungumzo kati ya walimwengu tofauti katikati ya Enzi za Kati. Nchi ya wanafikra wakubwa na utamaduni wa Kikristo, Shule ya Salamanca, ambapo katika karne ya kumi na sita taalimungu ya kitaaluma na sheria za kimataifa zilikutana, na kusaidia kuunda tafakari juu ya haki na utu wa kila mwanadamu." Pia ni nchi ya "watakatifu wakubwa" kama vile Mtakatifu Yohane wa Msalaba na Mtakatifu Teresa wa Ávila, ambao mawazo yao yanahusiana kinabii na changamoto za wakati wetu.

Mada za ziara

Huko Hispania, Papa atakutana na urithi tajiri wa kihistoria na kiutamaduni huku akikutana na wawakilishi wa Kanisa na taasisi za umma, pamoja na maelfu ya vijana, familia, na watu mashuhuri kutoka ulimwengu wa michezo, utamaduni, na burudani baadhi yao watashiriki katika matukio ya umma. Mazungumzo kati ya Kanisa, siasa, na utamaduni kama zana za kushinda mgawanyiko, pamoja na kutafakari maendeleo ya kiteknolojia na kibinadamu pia kwa kuzingatia Waraka wa Magnifica Humanitas, yatakuwa miongoni mwa mada kuu za hotuba, salamu, na hotuba ya 23 ya Papa.

Kwa hiyo, amani pia itakuwa lengo kuu katika enzi iliyojaa vita. Jambo linalohusiana sana ni mada ya upokonyaji silaha, "wakati ambapo matumizi ya silaha yanazidi kuhalalishwa," Bruni alibainisha. Kwa maana hiyo aliongeza, "mtu anaweza pia kutafakari jukumu la Kanisa nchini Hispania, na kwa upana zaidi barani Ulaya, kwa kuzingatia historia yake ya historia  yote kama hazina ya thamani katika nyakati za ukuu na pia katika nyakati za shida."

Sauti ya Kanisa

Ziara ya Papa Leo XIV imekusudiwa kama ishara na kitia moyo kwa Kanisa ambalo "bado lina mengi ya kusema katika ngazi nyingi, nchini Hispania na Ulaya, ambapo linaweza kuchangia kikamilifu kama mshiriki mwenye kujenga katika mjadala wa umma," Dk. Bruni alisema. Pia alizungumzia suala la "ulinzi wa maisha", kila maisha, hasa yaliyo hatarini zaidi. Wasiwasi huu unaenea hadi kwenye mada ya uhamiaji, ambayo itaangaziwa sana wakati wa ziara ya Papa kwenye bandari za Visiwa vya Canary, mazingira ambayo katika miaka ya hivi karibuni yameshuhudia misiba mingi ya kibinadamu na familia inayohusishwa na kuwasili katika njia mbaya ya uhamiaji ya Atlantiki. Katika maeneo haya, Papa atasikia historia za wahamiaji, atashuhudia juhudi za kuwakaribisha, na kukutana na "nchi ya watakatifu wa kimisionari walioondoka hapa ili kuleta Injili ulimwenguni."

Kukutana na watu na imani yao

Hata hivyo, kabla ya hapo kuna vituo huko Madrid na Barcelona, miji yenye mila zao za uwazi na ukarimu. Miongoni mwa mambo muhimu yatakuwa Basilika ya Familia Takatifu ( Sagrada Família,) yenye ishara yake ya kina ya imani, wakati wa mwaka wa mia moja wa kifo cha mbunifu wake Antoni Gaudí, unaoadhimishwa yarehe 10 Juni 2026 Papa Leo XIV, Dk. Bruni alielezea, "atahutubia watu wanaoishi katika jamii isiyo na dini nyingi, lakini ambayo mizizi ya Kikristo inabaki imejikita sana katika marejeo ya kitamaduni na zaidi." Kwa hivyo ziara hii ni "mkutano na imani ya watu" ambao bado wameunganishwa na mila maarufu za kidini kama vile maandamano. Papa mwenyewe atashiriki katika maandamano ya Corpus Christi yaani Mwili na Damu ya Yesu, Dominika tarehe 7  Juni. Ni imani ambayo "haibaki ndani ya kuta za kanisa bali hutembea mitaani."

Akiakisi usemi unaojulikana wa Papa Francisko, Dk Bruni hakuielezea kama "imani ya makumbusho" bali kama "imani inayozaa matunda kwa ajili ya siku zijazo." Vijana kutoka Hispania na kwingineko watakuwa lengo lingine maalum la ziara ya Papa. Kulingana na Dk Bruni, Papa anakusudia kuwapa "ujumbe uliojaa vitu muhimu, wenye uwezo wa kufikiria wakati ujao pamoja nao, na wa kuhamasisha Kanisa, katika enzi ya wanaume wenye nguvu, kuwainua wanaume na wanawake watakatifu."

Alama za mshikamano na alama za mpaka wa Atlantiki

Zaidi ya maneno, itakuwa ziara ya picha zenye nguvu, Baba Mtakatifu katika Jumba la Kifalme na Bunge la Manaibu, katika Uwanja wa Movistar wa Madrid na Uwanja wa Mpira wa  Santiago Bernabéu; katika Abasia ya Montserrat na Sagrada Família, ambapo atazindua Mnara wa Yesu Kristo, kipengele cha juu cha kazi bora ya Gaudí, kwa baraka kwa watu ikifuatiwa na mwanga na maonyesho ya fataki. Kituo kingine cha mfano kitakuwa bandari ya Arguineguín huko kisiwa kikubwa cha Canaria, ambacho kwa muda mrefu kinajulikana kama "gati la aibu" kwa sababu ya hali iliyojaa na hatari inayowakabili maelfu ya wahamiaji, hasa kutoka Afrika Magharibi. Kwa hivyo, ratiba ya Papa inaunganisha vituo vya kisiasa na kitaasisi, maeneo ya kiroho na ya hisani, na maeneo ya nembo kando ya mpaka wa Atlantiki wa Ulaya, ikionyesha mwingiliano wa mara kwa mara kati ya vipimo vya kikanisa na vya umma vya utume yake.

Wakati muhimu sana utakuja mara tu baada ya hotuba yake ya kwanza kwa wawakilishi wa taasisi, asasi za kiraia, na wanadiplomasia, wakati Papa Leo XIV anapotembelea mradi wa kijamii "Cedia 24 Horas", kituo katika wilaya ya Lucero huko Madrid kilichojitolea kuwakaribisha na kuwasindikiza watu walio katika mazingira magumu na wasio na makazi. Kama Kardinali José Cobo Cano, Askofu Mkuu wa Madrid, alivyosema, Papa ataingia nchini kupitia ulimwengu wa udhaifu na pembezoni mwa binadamu.

Msafara wa Papa

Wanaoambatana na Baba Mtakatifu ni Kardinali Ángel Fernández Artime, Mwenyekiti wa Baraza la  Kipapa la mashirika ya Kitawa na Vyma vya Kitume; Askofu Mkuu Filippo Iannone, Mwenyekiti wa Baraza la Kipapa la Maaskofu, na Askofu Mkuu Luis Marín de San Martín, Mwenyekiti wa Baraza la Kipapa la Huduma ya Upendo.

Hotuba zote za Papa zitakuwa kwa Kihispania, isipokuwa hotuba moja kwa Kifaransa katika kituo cha mapokezi cha Las Raíces, ambacho kinawahifadhi wahamiaji kutoka nchi za Afrika zinazozungumza Kifaransa. Dk. Bruni pia alionesha kwamba Papa anaweza kusema maneno machache kwa Kikatalani, akijibu maswali kutoka kwa waandishi wa habari kuhusu suala ambalo limezua mjadala mkubwa katika vyombo vya habari vya Kihispania. Mada nyingine ambayo imevutia umakini ni suala la unyanyasaji. Kanisa limehusika katika mipango mbalimbali inayolenga kuzuia na haki ya kurekebisha, ikiwa ni pamoja na itifaki iliyokubaliwa Machi iliyopita na Baraza la Maaskofu, Baraza La Kipapa kwa ajili ya Mashirika ya Kitawa, Ofisi ya Mchunguzi wa Mashtaka wa Hispania, na Wizara ya Urais ili kushughulikia ukweli huu wenye uchungu kwa ukweli na haki.

Imesasishwa tarehe 6 Juni 2026 saa 6.15 mchana na Angella Rwezaula

Asante kwa kusoma makala yetu. Unaweza kuendelea kupata habari mpya kwa kujisajili kwa jarida letu la kila siku: Just click here.