Kard.Parolin:Vatican imejaa matumaini ya mafanikio ya Mpango wa Gaza
Vatican News
Kardinali Pietro Parolin, Katibu Mkuu wa Vatican akijibu maswali, kuhusu hali ilivyo katika Nchi Takatifu kando ya uwasilishaji rasmi wa toleo jipya la Ripoti ya Uhuru wa Kidini Duniani (RFR), iliyotolewa na Mfuko wa Kipapa wa Shirika la Misaada ya Kanisa Hitaji, tarehe 21 Oktoba 2025 ambapo Ripoti - alisema Kardinali "inayotoa uchambuzi wa kina wa mienendo ya kimataifa na kufichua picha inayotia wasiwasi: uhuru wa kidini umepunguzwa sana katika nchi 62 kati ya 196, na kuathiri takriban watu bilioni 5.4. Na kwa njia hiyo kuhusiana na suala hilo alisema kuwa, “Vatican ina wasiwasi kuhusu usitishaji vita huko Gaza, ambao unaonekana kuwa tayari umemalizika kwa ghasia za siku za hivi karibuni, lakini imejaa matumaini kwamba Mpango wa Amani unaweza kufanya kazi.”
Kardinali alijibu maswali hayo ya waandishi wa habari akiwa nje ya Taasisi ya Kipapa ya Agostino; ambapo miongoni mwa hayo kulikuwa na ombi la maoni juu ya unyanyasaji unaowakabili walowezi wa Israel katika Ukingo wa Magharibi, hasa katika kijiji cha Taybeh. "Tatizo hapo kwa hakika ni tata sana, lakini hatuwezi kuelewa ni kwa nini Wakristo hawa, wanaoishi maisha yao ya kawaida, wanaweza kuwa shabaha ya mashambulizi hayo yasiyokoma," Kardinali Parolin alisema. "Kuzungumza juu ya mateso ni shida kidogo, lakini hizi ni hali ambazo hatuwezi kukubali."
Heshima kwa Kila Mtu na Jamii
Kama Vatican, Kardinali aliongeza, “tunaingilia kati kimsingi kwa njia za kidiplomasia: "Katika mashirika ya kimataifa na katika uhusiano wa nchi mbili na serikali, tunazungumza juu ya suala hili, hali hizi za shida na shida. Hizi ndizo njia zetu za kuingilia kati: kukumbusha kanuni hizi na kuomba zitumike katika maisha ya kila siku." "Ibara ya 18 ya Azimio la Kimataifa la Haki za Kibinadamu," Kardinali Parolin aliendelea, "labda ni moja ya makala ambayo hayazingatiwi sana na haitekelezwi sana. Hata hivyo tunaamini kwamba huu ndio msingi hasa wa kuheshimu haki za binadamu kwa sababu inagusa dhamiri ya kila mtu. Na kwa hivyo, tuna wasiwasi mkubwa kwa sababu haki hii ya kila mtu na kila jumuiya haitekelezwi."
Vurugu dhidi ya Wakristo nchini Nigeria
Akielekeza mtazamo wake kwa Afrika na wimbi kubwa la chuki na vurugu zinazowaathiri Wakristo katika sehemu fulani za Nigeria, Kardinali Parolin, akiwanukuu wasemaji wa ndani, alifafanua kwamba mzozo wa Nigeria “sio mzozo wa kidini, bali ni mzozo wa kijamii, kwa mfano kati ya wafugaji na wakulima. Tukumbuke kwamba nchini Nigeria pia, Waislamu wengi ni wahanga wa hali hii ya kutovumilia," Kardinali alisisitiza. "Haya ni makundi yenye itikadi kali ambayo hayaleti tofauti katika kutekeleza malengo yao, mafanikio yao. Wanatumia vurugu dhidi ya mtu yeyote wanayemwona kuwa mpinzani."
Vitisho kwa Vyombo huru vya Habari
Hatimaye, akitafakari juu ya dhana ya uhuru wa kidini, lakini pia juu ya uhuru kwa ujumla, Kardinali Parolin alisema kwamba "ni chanzo cha wasiwasi mkubwa kwamba vitendo hivi vya vitisho dhidi ya vyombo huru vya habari vinaweza kutokea." Alirejea shambulio la Alhamisi Oktoba 16 iliyopita dhidi ya mwanahabari Sigfrido Ranucci, mtangazaji wa kipindi cha Ripoti ya Kiitaliano, kwa bomu lililolipuliwa mbele ya nyumba yake. Katibu wa Vatican, alielezea kwanza kabisa "mshikamano na wale waliotishwa na vitisho hivyo,” na kuongeza: "Tuna hatari ya kuishi zaidi katika hali ya kutovumiliana, ambapo uhuru wa kujieleza haukubaliwi tena. Kardinali Parolin alisisitiza tena kuwa “Sisi,tunataka kila mtu aweze kutoa maoni yake kwa heshima na usawa, lakini pia kuwa na uwezo wa kujieleza bila kukabiliwa na aina hii ya tishio."
