2026.02.20 Kumbukizi ya Mlipuko wa mwaka 1944: Borgo Laudato Si'

Vatican

Borgo Laudato Si' awakumbuka waathiriwa wa bomu la Chuo cha Propaganda Fide

Kwa maandamano ya Amani katika Bustani za Castel Gandolfo,wageni vijana wa Kituo cha Elimu ya Juu,raia na mamlaka mahalia walikumbuka bomu la ndege za Washirika mnamo tarehe 10 Februari 1944, ambalo liliua zaidi ya watu 500 waliokuwa wamejificha ndani ya Majumba ya Kipapa. Padre Dorantes:Vita sio suluhisho kamwe;kujenga amani huanza mijini.

Vatican News

Mkasa wa 1944 unatukumbusha "kinachotokea chuki inapotawala," na leo hii, kukumbuka "kunamaanisha kusema waziwazi kwamba vita si suluhisho kamwe." Na Mtakatifu Francis, miaka 800 baada ya kifo chake, "anatukumbusha kwamba kijana anaweza kubadilisha njia yake na kubadilisha ulimwengu. Ni juu yetu kuamua ni historia gani ya kuendelea." Kwa maneno haya, Padre Manuel Dorantes, Mkurugenzi wa utawala na usimamizi wa Kituo cha Mafunzo ya Juu cha Laudato Si', alihitimisha Maandamano ya Amani katika Borgo Laudato Si', yaliyoandaliwa ndani ya Bustani za Vila ya Kipapa ya Castel Gandolfo, kukumbuka mabomu ya Washirika ya mnamo 10 Februari 1944, ambayo yalisababisha vifo vya kati ya watu 500 na 700 miongoni mwa wale waliokuwa wamekimbilia Chuo cha Propaganda Fide na Villa Barberini.

Pio XII na Milango iliyofunguliwa kwa Wale Wanaotafuta Makazi ya Kimbilio kutokana na Vita

Mbele ya wageni kadhaa vijana wa Kituo cha Mafunzo ya Juu, raia, na mamlaka za kiraia na kidini za Castel Gandolfo na Castelli Romani, Padre Dorantes alikumbuka mkasa wa miaka 82 iliyopita, wakati wa Vita vya Pili vya Dunia, makazi ya maelfu ya raia waliokimbia makazi yao katika maeneo ya nje ya nchi yalipigwa. Watu ambao "walikuwa wakitafuta mahali salama tu. Walikuwa wakitafuta ulinzi" na ambao walikaribishwa na Papa Pio XII, lakini wengi "walipata kifo." Mkurugenzi wa Kituo hicho alisisitiza thamani ya ishara halisi ya Papa Pacelli, ambaye katikati ya vita alifungua milango ya Jumba la Kitume, Majumba ya kifahari, na Bustani. "Hakutoa hotuba. Alifungua milango. Alitoa nafasi zinazopatikana. Aliokoa maisha. Hili ndilo linaloleta tofauti: kubadilisha maadili kuwa ishara halisi," alisisitiza Padre huyo.

Kumbukizi ya mambomu ya mwaka 1944

Borgo Laudato Si' na Chaguo la Mtakatifu Francis

Leo hii, katika sehemu zile zile, Borgo Laudato Si' inazaliwa na kukua, aliendelea Padre huyo kutoka Jimbo la Chicago kwamba: "Ambapo jana tulitoa hifadhi, leo hii tunajenga mustakabali: imani, elimu, uendelevu, ujumuishaji wa kijamii. Sio mwendelezo wa mahali tu, ni mwendelezo wa maana. Jana, maisha yalilindwa kutokana na mabomu. Leo hii maisha yanalindwa kutokana na kutojali, dhuluma, na unyonyaji wa ardhi na watu." Padre Dorantes alikumbuka kwamba mwaka 2026 ulitangazwa na Papa Leo XIV kama Mwaka wa Jubilei kwa ajili ya kumbukumbu ya miaka 800 ya kifo cha Mtakatifu Francis wa Assisi. "Mtakatifu Francis alikuwa kijana kama wengi wenu: alikuwa na ndoto, matamanio, na alitaka kujitokeza," alisisitiza. "Alienda vitani. Aliona vurugu. Na alielewa jambo la msingi: Vurugu haijengi mustakabali, inauharibu." Hii ndiyo sababu alichagua "kuishi kwa urahisi, bila silaha, akimheshimu kila mtu na kila kiumbe. Wakati wa migogoro, alichagua amani. Wakati wa chuki, alichagua mazungumzo."

Kumbukizi yashambulizi la Mabomu ya 1944

Papa Leo XIV na amani "isiyo na silaha na ya kupokonya silaha"

Kisha mkurugenzi wa Kituo cha Mafunzo ya Juu alikumbuka maneno ya Papa Leo XIV akipendelea amani "isiyo na silaha na ya kupokonya silaha". Amani isiyo na silaha: yaani, huru kutoka katika mantiki ya silaha, ya nguvu, ya yeyote aliye na nguvu zaidi anashinda.'" Lakini pia kupokonya silaha: "yaani, inayoweza kushangaza. Ya kujibu chuki si kwa chuki zaidi, bali kwa upendo, haki, ukweli, na mazungumzo." Na alikumbuka kwamba vita huanza "tunapoacha kumwona mwingine kama kaka au dada" na wanakuwa "adui," "mtu wa kuondolewa," "mtu wa kudhalilishwa."

Chaguo halisi za vijana za kujenga amani

Baba Dorantes aliweka orodha ya chaguzi halisi za kujenga amani "katika shule zenu, katika familia zenu, katika jiji letu." "Unapojadiliana unachagua kutomwaibisha mwingine, hata kama unaweza. Unapotumia mitandao ya kijamii hushiriki maudhui yanayochochea chuki au habari za uongo. Unapomtetea mwanafunzi mwenzako anayedhihakiwa badala ya kukaa kimya. Unapojifunza kuwasikiliza wale wanaofikiri tofauti na wewe. Unapotunza mazingira: upotevu mdogo, umakini zaidi, heshima zaidi. Unapokuwa katika siku zijazo za kitaaluma unajiuliza sio tu 'nitapata kiasi gani?' lakini pia 'nitakuwa na athari gani kwa wengine?'" Chaguzi za ujasiri, kwa sababu: "Ni rahisi zaidi kuguswa na hasira. Ni vigumu zaidi kusimamisha, kupumua, na kuchagua mazungumzo."

Kumbukizi ya mashambulizi ya mabomu ya mwaka 1944 huko Borgo Laudato si

Kubadilisha maeneo yaliyojeruhiwa na vita kuwa maeneo ya amani

Hapa, katika Borgo Laudato si', "tunataka kujifunza hili kwa usahihi: kubadilisha maeneo yaliyojeruhiwa na vita kuwa maeneo ya amani, tofauti kuwa utajiri, migogoro kuwa fursa za ukuaji. Amani huanza hapa. Inaanza na kila mmoja wetu," Mkurugenzi alihitimisha.

BORGO LAUDATO SI