ር.ሊ.ጳ ሊዮ "እግዚአብሔር ተስፋችን መሆኑን መስክሩ" ማለታቸው ተገለጸ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

ርዕሰ ሊቃነ ጳጳሳት ሊዮ አሥራ አራተኛ ለ'ላ ቺቪልታ ካቶሊካ' ጸሐፊዎች እና ተባባሪዎች “የክርስቶስን እይታ በዓለም ላይ እንዲያዩት፣ እንዲያዳብሩት፣ እንዲያስተላልፉት እና እንዲመሰክሩት" በተጨማሪም "እግዚአብሔር ተስፋችን መሆኑን እየመሰከሩ" ተልእኳቸውን እንቀጥሉ ጋብዘዋል።

ርዕሰ ሊቃነ ጳጳሳት ሊዮ አሥራ አራተኛ የታሪካዊው ኢየሱሳዊ ማሕበር  'ላ ቺቪልታ ካቶሊካ' መጽሔት 175ኛ ዓመት የምስረታ በዓሉን ምክንያት በማድረግ ለተዘጋጀው ስብሰባ ተሳታፊ አባላት ባስተላለፉት መልእክት ተሳታፊዎች በጌታችን በኩል ተስፋ እንዲያደርጉ አሳስበዋል።

'ላ ቺቪልታ ካቶሊካ' እ.ኤ.አ. ሚያዝያ 6 ቀን 1850 በብፅዕ ርዕሰ ሊቃነ ጳጳሳት ፒዩስ ዘጠነኛ ትእዛዝ የተመሰረተ እስካሁን ካሉት ጥንታዊ መጽሔቶች አንዱ ነው። ከዚያን ጊዜ ጀምሮ ከሊቃነ ጳጳሳት እና ከቅድስት መንበር አቋሞች ጋር በመተባበር ታሪክን፣ ፖለቲካን፣ ባህልን፣ ሳይንስንና ጥበብን ከክርስትና እምነት አንፃር የማንበብ እና የመተርጎሚያ መሣሪያ ሆኖ እያገለገለ ቆይቷል።

ጳጳሱ ተስፋችንን የሚፈታተኑትን ወቅታዊ ሁኔታዎችን ሲዘግቡ ክርስቲያኖች እምነት እንዲኖራቸው ለምዕመናን ማስተላለፍ እንዳለባቸው አሳስቧቸዋል።

በዚህ ዐውደ-ጽሑፍ፣ ርዕሰ ሊቃነ ጳጳሳት ሊዮ ከእርሳቸው በፊት የነበሩትን ርዕሰ ሊቃነ ጳጳሳት ቤኔዲክት 16ኛን ጠቅሰው እ.ኤ.አ. 2007 ዓ.ም በላቲን ቋንቋ "Spe salvi" (የመዳን ተስፋ) በተሰኘው ጳጳሳዊ መልእክታቸው "ህይወቴ እና የአለም ታሪክ በአጋጣሚ የፈጠሩ አይደሉም። የእግዚአብሔር ፀጋ መፍሰስ አያቆምም። እኔ በዚህ ረገድ እርግጠኛነት ይሰማኛል፣ ከሁሉም ውድቀቶች ባሻገር፣ ህይወቴ በእግዚአብሄር ፍቅር ኃይል የጸና እንደሆነ አውቃለሁ። እናም ተስፋ በተሰበረ መርከብ ውስጥ እንኳን ይኖራል" ብለው መጻፋቸውን ቅዱስነታቸው አስታውሰዋል።

ምስጋና ለ 'ላ ቺቪልታ ካቶሊካ'

ቅዱስ አባታችን የመጽሔቱ የምስረታ በዓል አስፈላጊነት ተገንዝበው ለቤተ ክርስቲያኒቱ ያለውን ዘለቄታዊ አስተዋፅኦ ጠቅሰው በማመስገን ቅድስት መንበር ለዘመናት ላበረከቱት ታማኝና ለጋስ አገልግሎት እንደምታመሰግናቸው ገልጸዋል።

“ሥራችሁ ከጳጳሱ አስተምህሮ እና ከቅድስት መንበር መመሪያ ጋር በሚስማማ መልኩ በባህል ዓለም እንድትገኝ የበኩሉን አስተዋጽኦ አበርክቷል፣ እናም አስተዋጾ እያደረገም ነው” ብሏል።

ርዕሰ ሊቃነ ጳጳሳቱ መጽሔቱን “የዓለም መስኮት” በማለት የገለጹት ሲሆን “ከልዩ ባህሪያቱ አንዱ” ማለትም “ተግዳሮቶቻቸውን እና ተቃርኖቻቸውን ለመጋፈጥ ሳይፈሩ ከወቅታዊ ክንውኖች ጋር የመሳተፍ ችሎታቸውን” አድንቀዋል።

የተሻለ ማህበረሰብ እና አለምን የማስተማር ኃላፊነት

ርዕሰ ሊቃነ ጳጳሳት ሊዮ በንግግራቸው ሶስት ቁልፍ የማህበረሰቡ የማሰላሰያ አቅጣጫዎችን አቅርበዋል፡ ሰዎች በአለም ላይ አስተዋይ እና ንቁ ተሳትፎ እንዲያደርጉ ማስተማር፣ ለአቅመ ደካሞች እና ለተገለሉት ድምጽ መሆን እና የተስፋ አብሳሪዎች መሆን" እንደ ሆነ ገልጸዋል።

ርዕሰ ሊቃነ ጳጳሳት ሊዮ በመጀመሪያ የማስተማር ነጥብ ላይ አጽንኦት ሰጥተው ነበር፣ “የምትጽፉት ነገር አንባቢዎቻችሁ ጠንካራና ደካማ ጎኖቻቸውን በመገምገም የምንኖርበትን ውስብስብ ማህበረሰብ በተሻለ ሁኔታ እንዲረዱት ያስችላል" ሲሉ ገልጸዋል።

ይህንንም በማድረግ ግምገማው አንባቢዎቹ በማህበራዊ ፍትህ፣ በቤተሰብ፣ በትምህርት፣ በቴክኖሎጂ ለውጥ እና በሰላማዊ ጉዳዮች ላይ በፖለቲካው ዘርፍ ጭምር ለህብረተሰቡ ጠቃሚ አስተዋፅኦ እንዲያበረክቱ ያስችላቸዋል ብለዋል።

የእያንዳንዱ ክርስቲያን የሕይወት እና ተልዕኮ መሠረታዊ ገጽታ

ርዕሰ ሊቃነ ጳጳሳቱ ከዚያ በኋላ ድምጽ ለሌላቸው ድምጽ እና "ለድሆች እና ለተገለሉ ሰዎች ድምጽ ወደመሆን" ወደ ሁለተኛው ነጥብ ሐሳባቸውን አዙረዋል።

ይህንን ተግባር “የእያንዳንዱ ክርስቲያን ሕይወትና ተልዕኮ መሠረታዊ ገጽታ” በማለት ገልጸው፣ ርዕሰ ሊቃነ ጳጳሳት ፍራንችስኮስን በመጥቀስ ኅብረተሰቡ ብዙ ጊዜ የተገለሉትን እና ችላ የተባሉትን እንዲያስታውስ ጠይቀዋል።

ይህንን ተልእኮ በእውነተኛነት ለመኖር፣ ርዕሰ ሊቃነ ጳጳሳት ሊዮ አሥራ አራተኛ እንደ ተናገሩት ከሆነ፣ በትህትና ማዳመጥ እና የሚሰቃዩ ሰዎችን መቅረብን ይጠይቃል ብለዋል።

“በዚህ መንገድ ብቻ፣ የተቸገሩትን ሰዎች ድምፅ ታማኝ እና ትንቢታዊ ድምጽ አስተጋቢ መሆን የሚቻለው እያንዳንዱን የብቸኝነት፣ የመገለል እና የመስማት ችግሮችን በመስበር ነው” ሲሉ ጠቁሟል።

በክርስቶስ ያለን የመጨረሻ ተስፋ

በመጨረሻም፣ ርዕሰ ሊቃነ ጳጳሳት ሊዮ 'ላ ቺቪልታ ካቶሊካ' መጽሔት አዘጋጆች የተስፋ አብሳሪዎች እንዲሆኑ ጋብዘዋቸዋል።

“ይህ ማለት ለሌሎች ግድየለሽ ሆነው የሚቀሩ ሰዎችን ግድየለሽነት እና ለወደፊት ህጋዊ ፍላጎታቸው መቆም ማለት ነው” እናም “ከእንግዲህ አዳዲስ መንገዶችን የመከተል እድል እንዳላቸው የማያምኑትን ተስፋ መቁረጥን ማሸነፍ ማለት ነው” ሲሉ በድጋሚ አረጋግጧል።

ለእኛ “የመጨረሻው ተስፋ ክርስቶስ መንገዳችን ነው፤ እኔ መንገድና እውነት ሕይወትም ነኝ” (ዮሐ 14፡6) በማለት ከዩሐንስ ወንጌል የጠቀሱት ቅዱስነታቸው “በእሱ እና በእርሱ ዘንድ በጉዟችን ከአሁን በኋላ የሞቱ ፍጻሜዎች የሉም፣ ወይም ምንም ያህል አስቸጋሪም ሆነ ውስብስብ ቢሆን—እግዚአብሔርን እና ወንድሞቻችንን እና እህቶቻችንን በመተማመን እንድንወድ የሚያግደን ወይም የሚከለክሉን እውነታዎች የሉም" ሲሉ በአጽኖት ገልጸዋል።

የክርስቶስ እይታ በአለም ላይ

ርዕሰ ሊቃነ ጳጳሳት ሊዮ በመቀጠል የቀድሞ ርዕሰ ሊቃነ ጳጳሳት ፍራንችስኮስ ለ'ላ ቺቪልታ ካቶሊካ' ያቀረቡትን ሁለት የማይረሱ ነጸብራቆች አስታውሰዋል።

ርዕሰ ሊቃነ ጳጳሳት ሊዮ 14ኛ የቀድሞ ርዕሰ ሊቃነ ጳጳሳት ፍራንችስኮስን በማስታወስ ማህበረሰቡ “በአሁኑ ጊዜ ከወንጌል ሌላ ታማኝነት በሌለው የጋዜጠኝነት ሙያ ውስጥ መልካም ጋዜጠኝነትን በማስተዋወቅ” ስራቸውን በደስታ እንዲቀጥሉ ማሳሰባቸውን እና “መጽሔቱ በእውነት የ‘ካቶሊክ’ ነው ሊባል የሚችለው የክርስቶስን እይታ በዓለም ላይ ካደረገ እና ያንን እይታ የሚያስተላልፍ እና የሚመሰክር ከሆነ ብቻ ነው” ብለዋል ።

በዚህ ስሜት፣ ርዕሰ ሊቃነ ጳጳሳት ሊዮ፣ “እነዚህ ቃላት ተልእኮዎቻችሁን ጠቅለል አድርገው ያሳያሉ፡- የክርስቶስን እይታ በአለም ላይ ለማየት፣ እሱን ለማዳበር፣ እሱን ለማሳወቅ እና ስለ እሱ ለመመስከር ይረዳችኋል" ካሉ በኋላ ቅዱስነታቸው መልእክታቸውን አጠናቀዋል።