ር.ሊ.ጳ ሊዮ ሁለተኛው የዓለም የህፃናት ቀን የሚከበርበትን ዕለት ይፋ አደረጉ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

ረቡዕ ዕለት ሕዳር 10/2018 ዓ.ም በተካሄደው የአጠቅላላ የትምህርተ ክርስቶስ አስተምህሮ ማብቂያ ላይ ርዕሰ ሊቃነ ጳጳሳት ሊዮ 14ኛ እ.አ.አ በ2026 ዓ.ም የዓለም የህፃናት ቀን ኦፊሴላዊ አርማ ያለበትን ባንዲራ ባርከው፣ ፊርማቸውን አኑረውበት ይፋ አድርገዋል።

"ሀሳቤ ወደ ልጆች ይሄዳል፣ ለእነርሱ በተሰየመው ቀን እ.አ.አ ከመስከረም 25-27/2026 ዓ.ም በሚካሄደው ቀን የማገኘው ደስታ ይኖረኛል" ሲሉ የጣሊያንኛ ተናጋሪ ምዕመናንን ሲቀበሉ ተናግረዋል።

ከዚያም ከጋዛ የመጣ የ7 ዓመት ልጅ ማጅድ በርናርድ ባንዲራውን ለሊቀ ጳጳሱ አቀረበ፣ የካፑችን ማሕበር አባል እና የሕጻናት ቀን ክብረ በዓል ኮሚቴ፣ የዓለም የህፃናት ቀን (WCD) የጳጳሳዊ ኮሚቴ ፕሬዝዳንት አባ ኢንዞ ፎርቱናቶ በሥፍራው መገኘታቸው ተገልጿል።

ከኮሚቴው በተሰጠው የፕሬስ መግለጫ መሠረት፣ የዓለም የህፃናት ቀን “ከዓለም ዙሪያ የመጡ ልጆችን እና ቤተሰቦቻቸውን የሚያካትት የመገናኘት፣ የጸሎት እና የክብረ በዓል ጊዜ ይሆናል” ሲል መግለጫው አክሎ ገልጿል።

የምዕመናን፣ የቤተሰብ እና የህይወት ጉዳዮችን የሚመለከተው የቅድስት መንበር ዋና ጽ/ቤት ፕሬዘዳንት ካርዲናል ኬቨን ፋሬል ቤተክርስቲያኗ ለልጆች እና ለቤተሰቦች ትኩረት መስጠት እንደምትፈልግ ተናግረዋል።

ልጆች የዓለም የሕጻናት ቀን ባዲራን በቫቲካን በሚገኘው በቅዱስ ጴጥሮስ አደባባይ ስያወለበልቡ   (@Vatican Media)

“ልጆች የሰላምን ውበት ማሳየት አለባቸው - በመጀመሪያ ደረጃ በቤተሰቦቻቸው ውስጥ፣ በሚዘዋወሩባቸው ቦታዎች እና በመላው ዓለም የሚኖር ሰላም” ሲሉ ካርዲናሉ ተናግረዋል። “ልጆች የሰላምን ዋጋ በሚገባ ይረዳሉ እና በዙሪያቸው ውጥረት እና ግጭት ሲሰማቸው፣ ከወላጆቻቸው ወይም ከአካባቢያቸው ጀምሮ ከፍተኛ ሥቃይ ይደርስባቸዋል” ሲሉ ተናግረዋል።

ካርዲናል ፋሬል ሁለተኛው የዓለም የሕጻናት ቀን (WCD) “ቤተክርስቲያኗ ከልጆች እና ከቤተሰቦቻቸው ጋር ያላትን ቅርበት ለማሳየት፣ ተስፋ እና ደስታ እንዲሰጧት የሚያስችል ውብ እድል” እንደሚሰጥ ያላቸውን ተስፋ ገልጸዋል።

ረቡዕ ዕለት ሕዳር 10/2018 ዓ.ም ለርዕሰ ሊቃነ ጳጳሱ የቀረበው ባንዲራ እ.አ.አ የ2026 ዓ.ም ዝግጅት አርማ ሰባት አህጉራትን የሚወክሉ ሰባት የእግር አሻራዎችን ያካትታል።

በጋዜጣዊ መግለጫው መሠረት፣ የእግር አሻራዎቹ “የልጅነት ቀላል እና ትክክለኛ ምልክቶችን፣ የትንንሽ ልጆችን ሁለንተናዊነት እና ንፅህና ምልክት” ያስታውሳሉ ተብሏል። የተለያዩ ቀለሞቹ የባህሎችን ልዩነት የሚወክሉ ሲሆን ልዩነቶችን ለመቀበል እና ዋጋ ለመስጠት የሚፈልግ ስምምነት ይፈጥራሉ።

የቅዱስ ጴጥሮስ ባዚሊካ ጉልላት “ልጆችን ከመላው ዓለም የሚቀበል እና የሚጠብቅ፣ መስቀሉ የክርስቶስን ፍቅር እና ትንሣኤ የሚያስታውስ” ምሳሌያዊ እቅፍ ያቀርባል። እ.አ.አ በ2024 ዓ.ም የተካሄደው የመጀመሪያው የዓለም የህፃናት ቀን፣ ከ101 አገሮች የተውጣጡ ወደ 100,000 የሚጠጉ ሕጻናት የተካፈሉበት እንደ ነበረም ይታወሳል።

እ.አ.አ “በ2026 ዓ.ም ሁለተኛው የዓለም ሕጻናት ቀን” የተመለከተው ጋዜጣዊ መግለጫው “ቤተክርስቲያኗ የትንንሽ ልጆችን፣ ሰላምን፣ እንኳን ደህና መጣችሁ እና የወደፊት ጊዜን የሚናፍቀውን ዓለም ዋና ገፀ-ባህሪያትን ለማዳመጥ እና ለማክበር ያላትን ቁርጠኝነት ታድሳለች” ብሏል።