ር.ሊ.ጳ ሊዮ ኒውማን፣ የቤተክርስቲያን ሌዕቅ - ለአዲሱ ትውልድ ብርሃን የሚፈነጥቁ ናቸው አሉ!

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

ርዕሰ ሊቃነ ጳጳሳት ሊዮ 14ኛ ቅዱስ ጆን ሄንሪ ኒውማንን “የትምህርት ንድፈ ሐሳብ እና የተግባር መምህር” አድርገው አቅርበዋል፤ እሱም በታዋቂው መዝሙራቸው ላይ እንደተገለጸው በመለኮታዊ ፀጋ ውስጥ የእምነትን ‘ደግ ብርሃን’ እንድናቀርብ ይጋብዙናል፤ “የሥራ መልቀቂያ እና የስልጣን ማጣት የተሳሳቱ ምክንያቶችን አስወግደን” በዚህ “በብዙ ኢፍትሃዊነት እና እርግጠኛ አለመሆን” በጨለመው በአሁኑ ጊዜ “ብርሃን እና መመሪያ” እንድናስተላልፍ ይጋብዘናል ብለዋል። ርዕሰ ሊቃነ ጳጳሳቱ በቅዱስ ጴጥሮስ አደባባይ ለቅዳሴ ተሰብስበው ለነበሩት በሺዎች ለሚቆጠሩ ምዕመናን- በተለይም ተማሪዎች እና አስተማሪዎች - ንግግር ሲያደርጉ፣ ርዕሰ ሊቃነ ጳጳሳቱ አስተማሪዎችን እና ተማሪዎችን "ትምህርት ቤቶች፣ ዩኒቨርሲቲዎች እና እያንዳንዱ የትምህርት አውድ፣ መደበኛ ያልሆኑ ወይም በመንገድ ላይ የተመሰረቱት እንኳን፣ ሁልጊዜ ወደ ውይይት እና የሰላም ሥልጣኔ መግቢያ በር እንዲሆኑ ለማረጋገጥ" እንዲሰሩ ጋብዘዋል። በትምህርት ማዕከል፣ እውነተኛ ሰዎች እንዲፈጠሩ ተግተን መሥራት ይኖርብናል ብለዋል።

በትምህርት ማዕከል፣ እውነተኛ ሰዎች

በለስላሳ የፀሐይ ብርሃን በሚሞቅ አደባባይ እና በዮርክ ሊቀ ጳጳስ እስጢፋኖስ ኮትሬል የሚመራው የእንግሊዝ ቤተክርስቲያን ኦፊሴላዊ ልዑክ ፊት፣ ርዕሰ ሊቃነ ጳጳሳቱ በስብከታቸው 38ኛው አዲሱ የቤተክርስቲያን ዶክተር በተለይም በአስተንትኗቸው እና በአምልኮዎቻቸው ውስጥ፣ "የእያንዳንዱን የሰው ልጅ ክብር ምስጢር እና በእግዚአብሔር የሚከፋፈሉ የተለያዩ ስጦታዎችን" በተመለከተ አስደናቂ ነጸብራቆችን እንዳስቀመጡልን አስታውሰዋል። ሕይወት፣ እንደ ካርዲናል ኒውማን ሁሉ፣ አንድ ሰው የሙያ - ተልዕኮ - እንዳለው እና "ሕይወታችን ከእኛ የሚበልጥ ነገርን እንደሚያገለግል" ሲያውቅ ብሩህ ይሆናል በማለት ደጋግመው ይናገሩ እንደ ነበረ የገለጹ ሲሆን አክለውም “እያንዳንዱ ሰው ሊያበረክተው የሚገባው አስተዋጽኦ እጅግ በጣም ጠቃሚ ነው፣ የትምህርት ማህበረሰቦችም ተግባር ያንን አስተዋጽኦ ማበረታታት እና ማድነቅ ነው” ሲሉ ቅዱስነታቸው ተናግረዋል። ይህንን በተመለከተ ቅዱስነታቸው የሚከተለውን ተናግረዋል.....

"በትምህርት ጉዞው ዋና ክፍል ውስጥ የምናገኘው ረቂቅ ግለሰቦችን ሳይሆን እውነተኛ ሰዎችን መሆኑን አንዘንጋ፣ በተለይም እነሱን የሚያገልሉ ወይም የሚገድሏቸውን የኢኮኖሚ መለኪያዎች መሠረት ዝቅተኛ አፈፃፀም የሚያሳዩ የሚመስሉን በፍጹም መዘንጋት የለብንም። ስለዚህም ሙሉ ክብራቸውን እንደ ከዋክብት እንዲያበሩ ሰዎችን ለመመስረት ተጠርተናል”

ካርዲናል ኒውማን አዳዲስ ትውልዶችን ያነሳሳሉ

በካቶሊክ ቤተክርስቲያም ምዕመናን ዘንድ ባለፈው ቅዳሜ ጥቅምት 21/2018 ዓ.ም የሁሉም ቅዱሳን አመታዊ በዓል በተከበረበት ወቅት በቫቲካን በሚገኘው በቅዱስ ጴጥሮስ አደባባይ ለተሰበሰቡ በሺዎች ለሚቆጠሩ ካህናት እና ምዕመናን መስዋዕተ ቅዳሴ ስያሳርጉ በስብከታቸው መጀመሪያ ላይ ርዕሰ ሊቃነ ጳጳሳት ሊዮ 14ኛ ቅዱስ ጆን ሄንሪ ኒውማን ከቅዱስ ቶማስ አኩዊናስ ጋር በመሆን የቤተክርስቲያኒቱን የትምህርት ተልዕኮ ተባባሪ ደጋፊ ተብሎ መሾሙን አስታውቀዋል።

የካርዲናል ኒውማን አስደናቂ መንፈሳዊ እና ባህላዊ ቁመና፣ ርዕሰ ሊቃነ ጳጳሳቱ እንደ ተናገሩት ከሆነ፣ “ልባቸው ወሰን ለሌለው ለሚጠሙ እና በምርምር እና በእውቀት፣ ጥንታዊዎቹ እንደተናገሩት፣ በከዋክብት ላይ ባሉ ችግሮች ውስጥ የሚወስደንን ጉዞ ለመፈፀም ፈቃደኛ ለሆኑ አዳዲስ ትውልዶች መነሳሻ ሆኖ ያገለግላል” ሲሉ ተናግረዋል።

ትምህርት እንደ እውነትና አገልግሎት ፍለጋ

ቅዱስነታቸው በስብከታቸው አክለው እንደገለጹት ከሆነ ቅዱስ ጳውሎስ ለፊልጵስዩስ ሰዎች በጻፈው መልእክት እና “በዓለም ላይ እንደ ከዋክብት እንዲያበሩ” በሰጠው ሐዋርያዊ ትእዛዝ ላይ በማሰላሰል፣ የሐዋርያዊ ምክረ ሐሳባቸውን በላቲን ቋንቋ በ'ዲሌክሲ ቴ' (ወደድኳችሁ) የተሰኘውን የመጀመርያ ሐዋርያዊ መልእክት  ጭብጥ ለአስተማሪዎች ደግመው ገልጸዋል። ይህንን በተመለከተ ቅዱስነታቸው የሚከተለውን ተናግረዋል ...

እውነትን በጋራ ለመፈለግ እና በልግስና እና በታማኝነት ለማካፈል ባሳዩት እውነተኛ ቁርጠኝነት ዛሬ በዓለም ላይ እንደ ከዋክብት ታበራላችሁ፣ በእርግጥም ለወጣቶች፣ በተለይም ለድሆች፣ እና “ክርስቲያናዊ ፍቅር ትንቢታዊ ነው፡ ተአምራትን ያደርጋል” የሚለውን እውነታ በየቀኑ በሚመሰክሩበት ምስክርነት ይህንን ታደርጋላችሁ"።

ዩኒቨርሲቲዎች እንደ ትንቢት ላብራቶሪዎች

ርዕሰ ሊቃነ ጳጳሳት ሊዮ እንደ የተስፋ ጉዞ በሚታወቀው ኢዮቤልዩ ውስጥ ትምህርት “አስፈላጊ የሆነ የተስፋ ዘር” እንደሚወክል አረጋግጠዋል፣ “ትምህርት ቤቶችንና ዩኒቨርሲቲዎችን ሳስብ፣ ተስፋ የሚኖርባቸው፣ ዘወትር የሚወያዩባቸውና የሚበረታቱባቸው የትንቢት ላቦራቶሪዎች እንደሆኑ አስባለሁ” ሲሉ ተናግረዋል።

ትምህርት ቤቶች ወንጌልን የማዳመጥና የመኖር ቦታዎች ናቸው

ርዕሰ ሊቀ ጳጳሳቱ በማቴዎስ ወንጌል ላይ ከተሰበኩት አንቀጸ ብፁዓን (ማቴዎስ 5፡1-12) ብፁዕናን ከምያጎናጽፉ ትምህርቶች ጋር ሲተያይ፣ “የመምህሩ የኢየሱስ መንገድና መልእክት” ሲሉ የጠሩዋቸውን እነሱም - ከዓለም አመክንዮ በተቃራኒ - ድሆችን፣ ፍትህን የሚራቡና የሚጠሙ፣ የሚሰደዱትንና ሰላም ፈጣሪዎችን ይባርካቸዋል" ሲሉ ቅዱስነታቸው የተናገሩ ሲሆን እነዚህ፣ ቅዱሳን በመካከላችን የሚያቀርቡት የእግዚአብሔር መንግሥት ምልክቶች ናቸው ብለዋል። ቅዱስነታቸው ሐሳባቸውን ስያጠናክሩ የሚከተለውን ብለዋል ...

"እኛ ደቀ መዛሙርቱ ነን እና በ"ትምህርት ቤቱ" ውስጥ ነን። በሕይወቱ፣ ማለትም በተጓዘበት መንገድ፣ በሁሉም የእውቀት ዓይነቶች ላይ ብርሃን የማብራት ችሎታ ያለው የትርጉም አድማስ እንዴት ማግኘት እንደምንችል እንማራለን። ትምህርት ቤቶቻችንና ዩኒቨርሲቲዎቻችን ወንጌልን የማዳመጥና በተግባር ላይ የማዋያ ቦታዎች ይሁኑ!”።

የሰው ልጅን ከኒሂሊዝም ጨለማ ነፃ ማውጣት

ርዕሰ ሊቃነ ጳጳሳት ሊዮ 14ኛ እንዲህ ያሉ ተግዳሮቶች ከጥንካሬያችን በላይ ሊመስሉ እንደሚችሉ አምነዋል፣ ነገር ግን ባለፉት ዓመት የቀድሞ ርዕሰ ሊቃነ ጳጳሳት ፍራንችስኮስን በመጥቀስ በጽናት መዋጋት አስፈላጊ መሆኑን አሳስበዋል፥ እንዲህም ብለዋል . . . "ተስፋን ለመሰረዝ ስለሚያስፈራራው፣ ምናልባትም የዘመናዊ ባህል በጣም አደገኛ በሽታ የሆነውን ከኒሂሊዝም ጨለማ የሰው ልጅን ነፃ ለማውጣት አብረን መስራት አለብን” ሲሉ ተናግረዋል። ኒሂሊዝም ከላቲን ኒሂል ("ምንም፣ አንዳችም፣ የለም") ከሚለው ቃል የተገኘ የፍልስፍና ትምህርት ሲሆን ይህም በህይወት ውስጥ ተጨባጭ ትርጉም፣ እሴቶች እና ዓላማ መኖሩን የሚክድ ነው። በአለም አቀፍ እውነቶች ወይም በሥነ ምግባራዊ እሴት ስርዓቶች ለማመን ፈቃደኛ ባለመሆን ላይ የተመሰረተ ሲሆን ብዙውን ጊዜ ህልውና ውስጣዊ ትርጉም የሌለ ውበትን አመለካከት ይመራል፣ ይህም ግለሰቡ የራሱን ዓላማ የመፍጠር ኃላፊነት እንዲወስድ ያደርገዋል፣ እነዚህን እና እነዚህን የመሳሰሉ አመላከቶችን የምያጸባርቅ የፍልስፍና አስተምህሮ ነው።

በ"በመልካም ብርሃን" የሚመራ

ይህ ጨለማ፣ ርዕሰ ሊቃነ ጳጳሳቱ እንዳሉት ከሆነ፣ የካርዲናል ኒውማንን፣ መልካም ብርሃን የተሰኘውን መዝሙር ያስታውሰናል፣ እሱም የአንግሊካን ፓስተር በነበረበት ጊዜ የተቀናበረው እና በመባ መስጫ ስነ-ሥርዓት ወቅት የተዘመረ ነው። እግሮቻችን ያልተረጋጉ መሆናቸውን ስንገነዘብ፣ አድማሱን ማስተዋል የማይችሉ መሆናቸውን ስንገነዘብ የሚመራን ብርሃን ነው። ርዕሰ ሊቃነ ጳጳሳቱ እንዳብራሩት የትምህርት ተግባር ይህንን ደግ እና መልካም ብርሃን “በአፍራሽ አመለካከት እና በፍርሃት ጥላ” ለታሰሩት ሰዎች በትክክል ማቅረብ ነው ሲሉ ተናግረዋል። ቅዱስነታቸው ይህንን ሐሳባቸውን ለማጽናት በማሰብ የሚከተለውን ተናግረዋል ...

“በዚያ ውብ ጸሎት፣ ከቤት ርቀን ​​እንደምንገኝ፣ እግሮቻችን እንደተረጋጉ፣ ወደፊት ያለውን መንገድ በግልጽ መተርጎም እንደማንችል እንገነዘባለን። ሆኖም ግን፣ ይህ ሁሉ አያደናቅፈንም፣ ምክንያቱም መሪያችንን ስላገኘን፡- “መራኝ፣ ደግ ብርሃን፣ በዙሪያው ባለው ጨለማ መካከል፣ ምራኝ፤” “መራኝ፣ ደግ ብርሃን፣ ሌሊቱ ጨለማ ነው፣ እኔም ከቤት ርቄ እገኛለሁ፣ ምራኝ”።

የካቶሊክ ትምህርት እና የቅድስና ግኝት

ርዕሰ ሊቃነ ጳጳሳቱ ስብከታቸውን የደመደሙት “ከክርስቲያን እይታ ትምህርት ሁሉም ሰው ቅዱሳን እንዲሆን ይረዳል። ከዚህ ያነሰ ምንም አያደርግም” በማለት የተናገሩ ሲሆን እ.አ.አ በ2010 ዓ.ም በካርዲናል ኒውማን በታላቋ ብሪታንያ በተካሄደው የምስጋና በዓል ወቅት ርዕሰ ሊቃነ ጳጳሳት ቤኔዲክት 16ኛ ለወጣቶች የተናገሩትን አስታውሰዋል፡- “እግዚአብሔር ለእያንዳንዳችሁ ከሁሉም በላይ የሚፈልገው ቅዱስ እንድትሆኑ ነው። ከምታስቡት በላይ በጣም ይወዳችኋል” ብለው እንደ ነበረ ያስታወሱት ቅዱስነታቸው፣ ይህ አሉ ርዕሰ ሊቃነ ጳጳሳት ሊዮ 14ኛ ሐሳባቸው ለማጠናከር በማሰብ እንደ ተናገሩት "የቅድስና ዓለም አቀፋዊ ጥሪ ነው - የሁለተኛው የቫቲካን ጉባኤ አስፈላጊ መልእክት - “በብፁዓን ክርስቲያኖች የተወከለ የግል እና የጋራ ጉዞ” እንደ ሆነ አረጋግጠዋል። ይህንን በተመለከተ ቅዱስነታቸው የሚከተለውን ተናግረዋል ...

“የካቶሊክ ትምህርት እያንዳንዱ ሰው የራሱን የቅድስና ጥሪ እንዲያገኝ እንዲረዳው እጸልያለሁ። ቅዱስ ጆን ሄንሪ ኒውማን በጣም ያደንቋቸው የነበሩት ቅዱስ አውጉስጢኖስ በአንድ ወቅት አንድ መምህር ያለን ተማሪዎች ነን፣ ትምህርት ቤቱ በምድር ላይ የሚገኝ እና ወንበሩ በሰማይ የሆነ ነው”።