Papa XIV Leo: Qardaşlıq olmadan həyatda qala bilməyəcəyik
ÜMUMİ AUDİENSİYA
Müqəddəs Peter Meydanı
Çərşənbə, 12 noyabr 2025
Yubiley 2025 – Katexizis silsiləsi. İsa Məsih bizim Ümidimizdir. IV. Məsihin Dirilməsi və Müasir Dünyanın Çağırışları 4. Pasxa ruhu qardaşlığı təşviq edir. “Mən sizi sevdiyim kimi siz də bir-birinizi sevin” (Yəhya 15, 12).
Əziz bacılar və qardaşlar, sabahınız xeyir!
Məsihin ölümünə və dirilməsinə iman və Pasxanın ruhunda yaşamaq həyata ümid gətirir və bizi yaxşılıq etməyə ruhlandırır. Xüsusilə, bu, bizə qardaşlığı sevməyə və inkişaf etdirməyə kömək edir ki, bu da şübhəsiz ki, Papa Fransiskin aydın gördüyü kimi, müasir bəşəriyyət üçün ən böyük çağırışlardan biridir.
Qardaşlıq insan təbiətinin dərinliklərindən qaynaqlanır. Bizim münasibətlər qurmaq qabiliyyətimiz var və, istəsək, bir-birimizlə həqiqi əlaqələr qura bilirik. Həyatımızın lap əvvəlindən bizi dəstəkləyən və zənginləşdirən münasibətlər olmadan həyatda qala, inkişaf edə və öyrənə bilməzdik. Onlar çoxşaxəlidir, forma və dərinlik baxımından müxtəlifdir. Lakin şübhəsiz ki, insanlığımız ən yaxşı şəkildə, birlikdə mövcud olduğumuz və yaşadığımız zaman, başqaları ilə rəsmi deyil, həqiqi əlaqələr qurmağı bacardığımız zaman özünü göstərir. Əgər biz özümüzə qapanırıqsa, o zaman tənhalığa və hətta başqaları ilə yalnız öz mənafeyi naminə maraqlanan bir narsisizmə tutulmaq riskini daşıyırıq. Belə halda başqa insan yalnız bir şey ala biləcəyimiz birinə çevrilir, özümüz isə heç vaxt həqiqətən bölüşməyə hazır olan, özünü fəda edən biri ola bilməyəcəyik.
Biz çox yaxşı başa düşürük ki, hətta bu gün belə qardaşlıq dəyərsiz bir şey kimi qəbul edilə bilməz; o, bir anda əldə edilmir. Dünyadakı çoxsaylı münaqişələr, müharibələr, sosial gərginlik və nifrət hissləri bunun əksini sübut edəcək kimi görünür. Lakin qardaşlıq gözəl, gerçəkləşməyən bir xəyal deyil; bu, aldanmış bir azlığın arzusu deyil. Lakin onu təhdid edən kölgələri dəf etmək üçün onun mənşəyinə qayıtmalı və hər şeydən əvvəl bizi nifrət zəhərindən azad edən tək Kəsdən işıq və güc almalıyıq.
"Qardaşlıq" sözü çox qədim kökdən gəlir və "qayğı göstərmək", "ürəkdə saxlamaq", "dəstəkləmək", "isinişdirmək" mənasını verir. Hər bir insana tətbiq edildikdə, bu, bir çağırışa, dəvətə çevrilir. Biz tez-tez qardaş və ya bacı rolunun qohumluq, eyni ailəyə mənsubluq demək olduğunu düşünürük. Əslində, fikir ayrılıqlarının, nifaqların və bəzən hətta nifrətin yalnız yad insanlar arasında deyil, hətta qohumlar arasında da münasibətləri necə məhv etdiyini yaxşı bilirik.
Bu, Assizili Müqəddəs Fransiskin coğrafi, mədəni, dini və ya doktrinal mənşəyindən asılı olmayaraq hər kəsə ünvanladığı salamlama haqqında düşünmək ehtiyacını bu gün həmişəkindən daha aktual olduğunu nümayiş etdirir: omnes fratres (hamımız qardaşıq) — bu, müq. Fransiskin bütün insanları eyni səviyyəyə qoyduğu inklüziv yanaşması idi. Çünki onıların ortaq taleyə sahib olduqlarını qəbul edirdi — ortaq ləyaqət, dialoq, xoş qarşılama və xilas. Papa Fransisk, Assizili Yoxsulun bu yanaşmasını yenidən təklif etdi və onun aktuallığını səkkiz yüz il sonra özünün "Fratelli tutti" (“Hamımız qardaşıq”) ensiklikasında vurğuladı.
Müqəddəs Fransisk üçün universal qardaşlığın xoş qarşılama əlaməti olan bu "tutti" sözü (“hər kəs”), əzəldən hamının xilası üçün nəzərdə tutulmuş Xoş Xəbərin elan edilməsi olan və heç vaxt eksklüziv və ya qapalı bir formaya malik olmayan xristianlığın ən vacib xüsusiyyətini ifadə edir. Bu qardaşlıq İsanın əmrinə əsaslanır və bu əmr yenidir, çünki O, Özü bu əmri, yəni Atanın iradəsini, bolca yerinə yetirdi. Bizi sevən və Özünü bizim üçün fəda edən İsaya görə, biz də bir Atanın övladları və İsa Məsihdə əsl qardaş və bacılar olaraq bir-birimizi sevə və başqaları üçün canımızı fəda edə bilərik.
Yəhyanın Müjdəsində deyilir ki, İsa bizi sona qədər sevdi (Yəhya 13,1). Əzabları yaxınlaşdıqca Müəllim tarixi dövrünün sona çatdığını dərk edir. O, baş verəcəklərdən qorxur; O, ən dəhşətli əzabı və tənhalığı yaşayır. Onun üçüncü gün dirilməsi yeni bir tarixin başlanğıcıdır. Şagirdlər illər ərzində birlikdə yaşadıqdan sonra, təkcə İsanın ölümünün ağrısını yaşadıqda deyil, həm də hər şeydən əvvəl Onu Dirilmiş Olan kimi tanıdıqda, Ruhun bəxşişini qəbul etdikdə və Onun şahidləri olduqda tam mənada qardaş və bacı olurlar.
Qardaşlar və bacılar çətin anlarda bir-birlərini dəstəkləyir, ehtiyacı olanlardan üz döndərmir, birlikdə ağlayır və sevinir, birlik, etibar və qarşılıqlı yardım naminə fəal şəkildə səy göstərirlər. Bu dinamika İsanın Özünün bizə verdiyi dinamika ilə eynidir: " Mən sizi sevdiyim kimi siz də bir-birinizi sevin” (Yəhya 15, 12). Ölən və yenidən dirilən Məsihin bəxş etdiyi qardaşlıq bizi eqoizmin, bölünmənin və təkəbbürün mənfi məntiqindən azad edir və hər gün yenilənən sevgi və ümid adına ilkin çağırışımıza qaytarır. Dirilmiş Olan bizə Onunla birlikdə gedə biləcəyimiz, özümüzü "qardaş və bacı" hiss edə biləcəyimiz və həqiqətən qardaş və bacı ola biləcəyimiz yolu göstərdi.
