Папа сустрэўся з вернікамі ў Кастэль-Гандольфа

Аляксандр Амяльчэня - Vatican News

Вечаровае паветра Кастэль-Гандольфа напоўнілася радаснымі воклічамі і малітоўнымі спевамі, калі Пантыфік пакідаў вілу "Барберыні". Гэтае месца традыцыйна стала для Наступніка Пятра прасторай, дзе спалучаюцца дні спакойнага адпачынку і плённай працы. На выхадзе яго чакаў шчыльны натоўп людзей, якія жадалі хоць на імгненне сустрэцца позіркам з Папам.

Атмасфера была надзвычай цёплай: над плошчай гучалі воклічы "Няхай жыве Папа Леў!", а група вернікаў зацягнула "Benedicat" – вядомы францішканскі спеў, які з’яўляецца заклікам Божага благаслаўлення. Леў XIV ахвотна ішоў на кантакт, паціскаў рукі і вітаў пілігрымаў, сярод якіх было шмат гасцей з Лацінскай Амерыкі, у прыватнасці з Мексікі, Бразіліі, Гватэмалы і Нікарагуа.

Людзі імкнуліся зафіксаваць гэтыя хвіліны на свае тэлефоны, перадавалі лісты, кнігі і нават пачастункі – печыва з перуанскай дыяцэзіі Чыклаё.

Асаблівым і глыбока эмацыйным момантам стала хвіліна, калі Пантыфік спыніўся каля сужэнскай пары. Гэтыя людзі нядаўна перажылі цяжкую страту – смерць свайго 22-гадовага сына. Леў XIV выслухаў іх і ўдзяліў бацькам сваё благаслаўленне, праяўляючы духоўную блізкасць і падтрымку ў іх вялікім горы.