Сахель: новы подых надзеі ад Льва XIV

Аляксандр Амяльчэня - Vatican News

Святы Айцец прывітаў гасцей старажытным велікодным пажаданнем міру, падкрэсліваючы, што менавіта гэтага прагне сучасны свет. Ён заўважыў, што праца па падрыхтоўцы Фонду да "новага старту" вялася ў сінадальным духу ў шчыльным супрацоўніцтве з рознымі ведамствамі Святога Пасада.

Паводле слоў Пантыфіка, пасля больш чым саракагадовага шляху Фонд апынуўся на пераломе, выкліканым шматмернымі міжнароднымі эканамічнымі крызісамі. Гэта зрабіла неабходным аздараўленне яго місіі ў адпаведнасці з сучаснымі нормамі Святога Пасада. Леў XIV падкрэсліў, што гэтыя змены дазваляюць Касцёлу і далей эфектыўна сведчыць пра сваю любоў да народаў Заходняй Афрыкі, працягваючы справу, распачатую святым Янам Паўлам ІІ у 1980 годзе.

Папа звярнуў увагу на тое, што ў свеце, поўным геапалітычнай напружанасці, войнаў, тэрарызму і кліматычных катастроф, дзейнасць Фонду становіцца больш актуальнай, чым калі-небудзь. "Дапамога ахвярам прыродных катаклізмаў або ўразлівым людзям – гэта пытанне справядлівасці, яшчэ да таго як быць пытаннем міласэрнасці", - адзначыў ён.

Леў XIV ухваліў аднагалоснае рашэнне захаваць статус Фонду як Папскай установы. Ён заклікаў да таго, каб дзейнасць арганізацыі спрыяла прасоўванню неад'емнай чалавечай годнасці насельніцтва Сахеля праз канкрэтныя праекты.