Даследаванне: Біблія не губляе папулярнасці сярод моладзі
Аляксандр Амяльчэня - Vatican News
Сучасная моладзь, нягледзячы на тэндэнцыю дыстанцыявання ад традыцыйных структур, праяўляе глыбокую духоўную цікавасць, якая часта набывае новыя формы.
Згодна з данымі справаздачы "Patmos Youth Report", якія цытуе агенцтва "Zenit", палова маладых хрысціян у свеце звяртаецца да Святога Пісання як мінімум раз на тыдзень. Гэта пакаленне не толькі чытае тэксты, але і імкнецца інтэграваць біблейскія гісторыі ў сваё штодзённае жыццё, адчуваючы вялікую свабоду ў абмеркаванні пытанняў веры з навакольнымі.
Асабліва высокі ўзровень цікавасці назіраецца ў краінах Афрыкі на поўдзень ад Сахары і ў Лацінскай Амерыцы. У Афрыцы каля 93 працэнтаў апытаных хрысціян выказалі жаданне паглыбіць свае веды аб Бібліі. У глабальным маштабе 81 працэнт маладых людзей прызнаюць рэлігію важным элементам свайго паўсядзённага існавання.
Даследаванне, якое ахапіла 91 тысячу чалавек у 85 краінах, выявіла інтрыгуючы факт: цікавасць да Святога Пісання выходзіць далёка за межы хрысціянскіх супольнасцей. Паводле ацэнак даследчыкаў, каля 240 мільёнаў чалавек, якія не ідэнтыфікуюць сябе з хрысціянствам, хацелі б больш даведацца пра змест Бібліі.
Нават сярод нерэлігійных рэспандэнтаў кожны пяты праяўляе цікавасць да гэтай Кнігі, а 70 працэнтаў апытаных лічаць біблейскія сюжэты каштоўнымі для маральнага выхавання дзяцей.
Сённяшняя моладзь усё часцей адкрывае для сябе хрысціянскія каштоўнасці праз падкасты, відэаролікі, мабільныя дадаткі і сацыяльныя сеткі. Гэты "лічбавы шлях" суіснуе з традыцыйнымі формамі, але прапануе больш гнуткія спосабы знаёмства з верай.
Грунтоўнае вывучэнне Святога Пісання напрамую ўплывае на сацыяльную грамадскую маладых людзей. Тыя, хто рэгулярна чытае Біблію, часцей займаюцца валанцёрствам і падтрымліваюць дабрачынныя праекты.
Для большасці ўдзельнікаў апытання Кніга кніг асацыюецца з трыма ключавымі паняццямі: праўда, мудрасць і суцяшэнне.
Хоць аўтары справаздачы не спяшаюцца казаць пра рэзкае рэлігійнае адраджэнне, яны падкрэсліваюць, што тэзісы аб страце актуальнасці Бібліі аказаліся заўчаснымі.
