இயேசு காவியம்

சென்ற உரையில், கலிலேயக் கடலோரத்தில் மீன்பிடித்துக் கொண்டிருந்த எளிய மீனவர்களான புனித  பேதுரு மற்றும் அவரது சகோதரர் அந்திரேயா ஆகியோரை இயேசு கிறிஸ்து தனது நற்செய்திப் பணிக்கு முதன்முதலாக அழைத்த உன்னத விவிலிய நிகழ்வைக் குறித்துச் சிந்தித்தோம். இரவு முழுவதும் உழைத்தும் மீன்கள் ஏதும் அகப்படாத ஏமாற்றத்திலும், "உமது வார்த்தையின்படியே வலையை ஆழத்தில் போடுகிறோம்" என்று கீழ்ப்படிந்து, வலைகள் கிழியுமளவிற்கு அற்புத மீன்பேற்றைப் பெற்று இயேசுவின் சீடர்களாக மாறிய அவர்களின் விசுவாச வாழ்வைச் சிந்தித்து மகிழ்ந்தோம். அதன் தொடர்ச்சியாக, கலிலேயாவின் கானா ஊரில் நடைபெற்ற ஒரு எளிய இல்லத் திருமண விழாவிற்குத் தனது அன்புத் தாயான அன்னை மரியா மற்றும் சீடர்களுடன் இயேசு கிறிஸ்து வருகை தந்து, அங்கு நேர்ந்த திராட்சை மதுத் தட்டுப்பாட்டை நீக்கத் தண்ணீரைத் திராட்சை மதுவாக மாற்றித் தனது முதல் புதுமையை நிகழ்த்திய மாண்புமிகு வரலாற்றுச் சம்பவம் குறித்து இன்று காண்போம்.

• கானாவுர் திருமணம்
• கானாவுர் எனும் இடத்தில்
• கல்யாண நிகழ்ச்சி ஒன்று
• வானக வளரும் இயேசு
• வலிமையை முதலிற் காட்டத்
• தானாக வந்ததே போல்
• சரியாக வந்த தாங்கே
• ஊனவ தாரம ஆன
• உத்தமன் அங்கே வந்தான்!
•  
• அத்தகு நேரம் பார்த்து
• அன்னைமாம் மரியாள் வந்தாள்
• சத்தியம் முன்னே போகும்
• தன்மையைப் பார்ப்பதே போல்
• தத்துவ இயேசு பின்னால்
• தலைதூக்கி நடந்து வந்தார்
• புத்தமு தருந்து வாரிப்
• பொன்மகன் வரவு கண்டார்!
•  
• "இல்லையே திராட்சைச் சாறு"
• என்றொரு குரல்கேட்டாள்
• வல்லிய மகனே என்ற
• மரியம்மை; சமையற் காரர்
• சொல்லிய மொழியைக் கேட்டுத்
• தூயதன் மகனைப் பார்த்து,
• "இல்லையே மதுச்சா றெ”ன்று
• இயம்பினள் தானும் மீண்டும்!
•  
• "இதைப்பற்றி நமக்குள் என்ன
• எனதுநாள் வரவே இல்லை
• எதற்காகக் கவலை தாயே?
• இருப்பது இருக்கும்" என்றார்
• "மதுச்சாறு ஊறும்" என்று
• மரியாளும் மனத்தில் எண்ணி
• அதுமட்டும் இயேசு சொல்லும்
• ஆணையைக் கேட்கச் சொன்னாள்!
•  
• கற்சாடி சிலவற் றைத்தன்
• கண்ணாலே இயேசு கண்டார்
• விற்போன்ற புருவம் தூக்கி
• வியப்புடன் பார்த்தார் பின்பு
• கற்சாடி தன்னில் நீரைக்
• கனம்பெற நிரப்பச் சொன்னார்
• நிற்காத சமையற் காரர்
• நிரப்பினார் மதுவை எண்ணி!
•  
• "இப்பொழுது இந்த நீரை
• எடுத்துநீர் பருக" என்றார்
• அப்பொழுது தேஎல் லோர்க்கும்
• அந்தநீர் வழங்கி  னார்கள்!
• "எப்படி இந்தச் சாற்றை
• இதுவரை மறைத்தீர்? உங்கள்
• சொற்படி வந்த தென்ன?
• சொல்லுக" என்றார் சில்லோர்!
•  
• "தொடக்கத்தில் நல்ல சாறும்
• தொடங்கிய பின்னே வந்த
• மயக்கத்தில் சுவைஇல் லாத
• மதுவையும் வழங்கு வார்கள்
• நடக்கின்ற விருந்தி லோநீர்
• நல்லதைப் பின்னால் தந்தீர்
• அடக்கமா? என்ன இந்த
• அதிசயம்" என்றார் சில்லோர்!
•  
• தேடரும் திறமை தன்னைச்
• சீருடன் இயேசு நாதர்
• மூடியைத் திறந்து வைத்த
• முதல்பெரும் மாட்சி யாகும்
• கூடிய மாந்தர் இந்தக்
• குறையிலாப் புதுமை கண்டார்
• சீடர்கள் மரியாள் பெற்ற
• செல்வனை விசுவ சித்தார்!

கவிவரசர் கண்ணதாசனின் "இயேசுகாவியம்" நூலில் இடம்பெற்றுள்ள பன்னிரண்டாவது பாடல், இயேசு கிறிஸ்து தனது பொதுவாழ்வில் நிகழ்த்திய முதல் அற்புதத்தை (The Miracle at Cana) எளிய நற்றமிழில் விவரிக்கிறது. கலிலேயாவில் உள்ள கானா என்னும் ஊரில் ஒரு எளிய இல்லத்தில் திருமண விழா ஒன்று மிக விமரிசையாக நடந்து கொண்டிருந்தது. விண்ணகத்தின் முழு வளத்தையும் கொண்டு, உலகை மீட்க எளிய மானிட உருவெடுத்து (ஊனவதாரமாய்) வந்த உத்தமராகிய இயேசு கிறிஸ்து, தனது தெய்வீக வல்லமையை முதன்முதலாக உலகிற்கு வெளிப்படுத்துவதற்காக, அந்த விழாவுக்குத் தானாகவே முன்வந்து சரியாக அங்கே வந்து சேர்ந்தார்.

அதே திருமண விழாவிற்கு, இயேசுவின் அன்புத் தாயாகிய அன்னை மரியாளும் வந்திருந்தார். சத்திய வடிவமாகிய அன்னை மரியா முன்னால் செல்ல, உலக தத்துவங்களின் உன்னத வடிவமாகிய இயேசு கிறிஸ்து அவரைப் பின்தொடர்ந்து, தலைதூக்கி கம்பீரமாக நடந்து திருமணப் பந்தலுக்குள் நுழைந்தார். புத்தம் புதிய அமுதம் போன்ற பேரருளை அள்ளித் தரும் அந்தப் பொன்மகனாம் இயேசுவின் வருகையைக் கண்டு அங்கே கூடியிருந்த உறவினர்களும், ஊர் மக்களும் மட்டற்ற மகிழ்ச்சி அடைந்தனர்.

திருமண விருந்து நடைபெற்றுக் கொண்டிருந்த அந்தச் சமயத்தில், அங்கே திடீரென ஒரு பெரும் தட்டுப்பாடு ஏற்பட்டது. வந்திருந்த விருந்தினர்களுக்கு வழங்குவதற்காக வைக்கப்பட்டிருந்த திராட்சை மது தீர்ந்துவிட்டது என்பதைச் சமையற்காரர்கள் பேசிக்கொண்ட அக்குரலை அன்னை மரியா தற்செயலாகக் கேட்க நேரிட்டது. யூதர்களின் பாரம்பரியத் திருமணங்களில் மது தீர்ந்துபோவது அந்த குடும்பத்திற்குப் பெரும் அவமானத்தைத் தரும் என்பதை உணர்ந்த அன்னை, மிகுந்த கனிவோடு தன் வல்லமை மிக்க மகனாம் இயேசுவின் அருகே சென்று, "மகனே, அங்கே திராட்சை மது தீர்ந்துவிட்டது" என்று துயரத்தோடு இயம்பினார்.

தாயின் வார்த்தையைக் கேட்ட இயேசு, "அம்மா, இதைப்பற்றி நமக்குள்ளே என்ன கவலை? எனது அற்புதம் செய்யும் நேரம் இன்னும் வரவில்லையே! நீர் எதற்காக இப்போது கவலைப்படுகிறீர்? இருப்பது இருக்கட்டும்" என்று சற்றே மறுப்பது போல மென்மையாகக் கூறினார். இருப்பினும், தன் மகன் உலகத் துயர் துடைக்கும் கடவுளின் மைந்தன் என்பதில் அன்னை மரியாவுக்கு முழுமையான விசுவாச நம்பிக்கை இருந்தது. எனவே, அவர் சமையற்காரர்களைத் தன் அருகில் அழைத்து, "இதோ நிற்கிறாரே இயேசு, அவர் உங்களுக்கு என்ன கட்டளை இடுகிறாரோ, அதன்படி நீங்கள் செய்யுங்கள்" என்று உறுதியோடு ஆணையிட்டார்.

அன்னை மரியாவின் விசுவாசத்தைக் கண்ட இயேசு, அங்கே வைக்கப்பட்டிருந்த பெரிய யூத முறைமைகளுக்கான கற்சாடிகள் சிலவற்றைக் கண்டார். தனது விற்கண்ணான புருவங்களை உயர்த்தி, அந்தச் சாடிகளை வியப்புடன் நோக்கிய அவர், "இந்தக் கற்சாடிகள் அனைத்தையும் விளிம்பு வரை தண்ணீராலே நிரப்புங்கள்" என்று சமையற்காரர்களுக்குக் கட்டளையிட்டார். இயேசுவின் அதிகாரமிக்க வார்த்தைக்குக் கீழ்ப்படிந்து, அங்கிருந்த ஊழியர்கள் சற்றும் தாமதிக்காமல், கிணற்றிலிருந்து தண்ணீரை இறைத்துக் கொண்டு வந்து அந்தக் கற்சாடிகளை விளிம்பு முட்ட முழுமையாக நிரப்பினர்.

அதன் பின்பு இயேசு சமையற்காரர்களை நோக்கி, "இப்போது இந்தச் சாடிகளிலிருந்து சற்றே மொண்டு, பந்திப் பொறுப்பாளரிடம் கொண்டு போய் வழங்குங்கள்; அவர்கள் பருகிப் பார்க்கட்டும்" என்றார். இயேசுவின் சொல்லுக்கு இணங்கி ஊழியர்கள் அந்த நீரை எடுத்துச் சென்றனர். என்னே ஆச்சரியம்! சாடிகளில் நிரப்பப்பட்ட சாதாரணத் தண்ணீர், உலகிலேயே மிகச் சுவையான, உயர்தரமான திராட்சை மதுவாக மாறியிருந்தது. தேடலில் இருந்த மனித குலத்திற்கு இறைவனின் அருட்கொடை எத்தகையது என்பதை உணர்த்தும் நல்வழியாக இந்த அற்புதம் அமைந்தது.

அந்தத் திராட்சை மதுவைப் பருகிப் பார்த்த சில்லோர் மற்றும் பந்தி மேற்பார்வையாளர் மிகுந்த வியப்படைந்து, மணமகனை அழைத்து, "பொதுவாக எந்தவொரு திருமண விருந்திலும், தொடக்கத்தில் நல்ல சுவையுள்ள மதுவையே வழங்குவார்கள்; வந்திருக்கும் விருந்தினர்கள் குடித்துச் சற்றே மயக்கமடைந்த பின் சுவையில்லாத சாதாரண மதுவைக் கொடுப்பார்கள். ஆனால், நீங்களோ இதுவரை இல்லாத அளவுக்கு மிகச் சிறந்த திராட்சை மதுவை விருந்தின் இறுதி வரை மறைத்து வைத்து, இப்போது பின்னால் தந்திருக்கிறீர்களே! என்னே உங்கள் அடக்கமான பண்பு! இது எத்தகைய ஆச்சரியம்!" என்று மனமாரப் பாராட்டினர்.

கானா ஊர் திருமணத்தில் நடந்த இந்த உன்னத நிகழ்வு, சாதாரண மனிதர்களால் தேடற்கரிய தெய்வீகத் திறமையைக் கொண்ட இயேசு நாதர், உலகிற்குத் தனது மகிமையின் மூடியைத் திறந்து காட்டிய முதல் பெரும் அற்புதமும் மாட்சியும் ஆகும். அங்கே கூடியிருந்த திரளான மாந்தர்கள் அனைவரும் அந்தக் குறையே இல்லாத, நிறைவான புதுமையைக் கண்கூடாகக் கண்டு வியந்தனர். இந்த முதல் அற்புதம், இயேசுவின் தெய்வீகத் தன்மையை உலகிற்குப் பறைசாற்றியதுடன், அவரோடு இருந்த சீடர்கள் அனைவரும் அன்னை மரியாளின் திருக்குமாரனாகிய இயேசுவை மெசியாவாக முழுமையாக விசுவசித்து, அவர் பின்னே செல்ல உறுதியான விசுவாசத் அடித்தளமாய் அமைந்தது.