ஒரு டாலரில் தொடங்கி, இந்தோனேசியாவில் 219 கோவில்களைக் கட்டிய நம்பிக்கைப் பயணம்!

அபிசேக் ராஜா அலங்காரம் - வத்திக்கான்

ஒரு அமெரிக்க டாலரும், ஊக்கமளிக்கும் ஒரு சிறிய செய்திக் குறிப்பும் ஒரு மனிதனின் வாழ்க்கையையும், அதன் வழியாக ஒரு நாட்டின் தொலைதூரக் கிராமங்களின் ஆன்மீகப் பயணத்தையும் எப்படி மாற்ற முடியும் என்பதற்கு இந்தோனேசியாவில் நடந்த ஒரு நெகிழ்ச்சியான நிகழ்வு ஒரு சிறந்த சான்றாக விளங்குகிறது.

இந்தோனேசியாவில் செயல்பட்டு வரும் 'கடவுளின் திராட்சைத் தோட்டம்' எனப் பொருள்படும் 'வினியா டேய்' (Vinea Dei) என்ற கத்தோலிக்க இறைமக்கள் அமைப்பின் நிறுவனரான ஆல்பர்டஸ் கிரிகோரி டான் அவர்கள், தனது இறைப்பணியை முற்றிலும் கைவிடத் தயாராக இருந்த ஒரு நெருக்கடியான காலகட்டத்தில், எதிர்பாராத விதமாக அவருக்கு அந்த ஒரு டாலர் பரிசாகக் கிடைத்தது. கடவுளின் மீது ஆழமான நம்பிக்கை வைப்பதற்கும், திருஅவைக்குத் தொடர்ந்து சோர்வின்றி சேவை செய்வதற்கும் அந்தச் சிறு பரிசு அவருக்கு ஒரு மிகப்பெரிய உந்துசக்தியாக அமைந்தது.

அந்த நிகழ்வு நடந்து தற்போது பத்தாண்டுகள் கடந்துவிட்ட நிலையில், இன்று வினியா டேய் அமைப்பு தனது 'ஜலா காசி' (Jala Kasih) என்ற பொதுமக்களிடம் நிதி திரட்டும் தளத்தின் (Crowdfunding platform) மூலமாக, இந்தோனேசியா முழுவதும் உள்ள பல்வேறு தொலைதூர கத்தோலிக்க சமூகங்களில் 219 கோவில்கள் மற்றும் சிற்றாலயங்களைக் கட்டி ஒரு மாபெரும் சாதனையைப் படைத்துள்ளது. உண்மையான மறைத்தூதுப் பணி என்பது வெறுமனே கட்டிடங்களை உருவாக்குவது மட்டுமல்ல, மாறாக மக்கள் மத்தியில் நம்பிக்கை, எதிர்பார்ப்பு மற்றும் மிகவும் வலுவான சமூகங்களை உருவாக்குவதுதான் என்று ஆல்பர்டஸ் கிரிகோரி அவர்கள் உறுதியாக நம்புகிறார்.

இந்த அமைப்பின் ஒவ்வொரு கட்டுமானத் திட்டத்திற்கும் உள்ளூர் மக்கள் தங்களின் உழைப்பு, தேவையான பொருட்கள் மற்றும் முழுமையான ஆதரவை மனமுவந்து வழங்குகிறார்கள். இதன் மூலம் அந்த மக்களிடையே ஆழமான ஒற்றுமையையும், புதியதொரு உறவு என்ற உணர்வையும் இந்தத் திட்டம் வளர்க்கிறது. ஏழ்மையான நிலையில் இருந்தாலும், மிகுந்த மகிழ்ச்சியோடு வாழும் கத்தோலிக்க சமூகங்களிடையே கிரிகோரி அவர்கள் பெற்ற அனுபவங்கள் அவருக்கு ஒரு முக்கிய பாடத்தைக் கற்றுக்கொடுத்துள்ளன. நற்செய்தி அறிவிப்பு என்பது, பிறருடன் உடனிருப்பது, அவர்களிடம் இரக்கம் காட்டுவது மற்றும் அவர்களோடு இணைந்து நடப்பது ஆகியவற்றிலிருந்துதான் தொடங்குகிறது என்பதை அவர் ஆழமாக உணர்ந்துள்ளார்.

கட்டிடக்கலை மற்றும் கலாச்சார ரீதியாகவும் இந்த அமைப்பு தனித்துவமான கவனம் பெறுகிறது. புளோரஸில் உள்ள பறு நியாங் (Mbaru Niang) போன்ற உள்ளூர் கட்டிடக்கலை மரபுகளைப் பிரதிபலிக்கும் வகையில் புதிய கோவில்களை வடிவமைப்பதன் மூலம், பண்பாட்டுமயமாக்கலையும் வினியா டேய் அமைப்பு மிகச் சிறப்பாக ஊக்குவிக்கிறது.

இந்த அறக்கட்டளையின் பணிகள் வெறும் கட்டுமானங்களோடு மட்டும் நின்றுவிடவில்லை. பொருளாதாரத்தில் பின்தங்கிய கத்தோலிக்க குழந்தைகளுக்குத் தேவையான கல்வி உதவித்தொகைகளை வழங்குவதோடு, திருஅவையின் அனைத்துப் பணிகளிலும் பொதுநிலையினர் மிகவும் சுறுசுறுப்பான பங்கு வகிக்க வேண்டும் என்பதையும் இந்த அமைப்பு தொடர்ந்து ஊக்கப்படுத்தி வருகிறது.