மரியாவின் தாய்மை, நாம் கடவுளின் குழந்தைகள் என்பதைக் கற்பிக்கிறது!

செல்வராஜ் சூசைமாணிக்கம் - வத்திக்கான்

“அன்னை மரியாவின் மகிழ்ச்சி என்பது கடந்த காலத்துடன் கட்டுப்படுத்தப்படவில்லை; அது அவருடைய வாழ்நாள் முழுவதும் தொடர்கிறது” என்றும், “குவாதலூப்பில், நாம் கடவுளால் அன்புகூரப்படுகிறோம் என்பதை அறிந்து கொள்ளும் மகிழ்ச்சியை அன்னை எழுப்புகிறார்” என்றும் தெரிவித்தார் திருத்தந்தை பதினான்காம் லியோ.

டிசம்பர் 12, வெள்ளியன்று, மாலை 04.00 மணிக்கு வத்திக்கானின் புனித பேதுரு பெருங்கோவிலில் சிறப்பிக்கப்பட்ட குவாதலூப் அன்னை மரியாவின் விழாத் திருப்பலியில் வழங்கிய மறையுரையில் இவ்வாறு கூறினார் திருத்தந்தை.

உச்சத்தை எட்டும் மரியாவின் பாடல்

“சீராக்கின் நூலிலிருந்து எடுக்கப்பட்ட இன்றைய முதல் வாசகத்தில் வரும் கவிதை விளக்கம், கடவுளின் ஞானம் கிறிஸ்துவில் அதன் முழு அடையாளத்தைக் காண்கிறது” என்றும், “கிறிஸ்தவப் பாரம்பரியம் இந்தப் பகுதியை மரியாவின் கண்ணோட்டத்துடன் விளக்கியுள்ளது, கிறிஸ்துவைப் பெறத் தயாராக இருக்கும் பெண்ணாக அவரைக் காண்கிறது” என்றும் எடுத்துரைத்தார்.

“நற்செய்தியில், மரியா கடவுளுடைய வார்த்தை தன்னை எவ்வாறு மாற்ற அனுமதிக்கிறார் என்பதைக் கேட்கிறோம்” என்றும், “மகிழ்ச்சியுடன், அவர் எலிசபெத்தைப் பார்க்க விரைகிறாள், அங்கு அவருடைய வாழ்த்து செய்தியால் எலிசபெத்தின் வயிற்றில் உள்ள குழந்தை துள்ளிக் குதிக்கிறது” என்றும் கூறிய திருத்தந்தை, “தனது இந்த மகிழ்ச்சி, கடவுளிடமிருந்து வருகிறது என்பதை மரியா ஒப்புக்கொள்ளும் விதத்தில் அவர் கடவுளை நோக்கிப் பாடும் பாடல் உச்சத்தை அடைகிறது” என்றும் விளக்கினார்.

நாம் கடவுளால் அன்புகூரப்படுகிறோம்

“அன்னை மரியாவின் மகிழ்ச்சி என்பது கடந்த காலத்துடன் கட்டுப்படுத்தப்படவில்லை; அது அவருடைய வாழ்நாள் முழுவதும் தொடர்கிறது” என்றும், “குவாதலூப்பில், நாம் கடவுளால் அன்புகூரப்படுகிறோம் என்பதை அறிந்து கொள்ளும் மகிழ்ச்சியை அன்னை எழுப்புகிறார்” என்றும் தெரிவித்தார் திருத்தந்தை,

மேலும் “துன்பம் மற்றும் அநீதிக்கு மத்தியில், தியோகுவிடம் மரியா கேட்கிறார், "நான் இங்கே இல்லையா, நான் தான் உன் தாய்?" இந்தக் குரல் நம் வாழ்வில் கடவுளின் உண்மைத்தன்மையையும் அவரது உடனிருப்பையும் எடுத்துக்காட்டுகிறது” என்றும் குறிப்பிட்டார் திருத்தந்தை.

“மரியாவின் தாய்மை, நாம் கடவுளின் குழந்தைகள் என்பதைக் கற்பிக்கிறது” என்றும், “வாழ்க்கையின் சவால்களை எதிர்கொள்ளும்போது, ​​நாம் அவரிடம் திரும்பி, "அம்மா, நாங்கள் எப்படி உங்கள் இதயம் விரும்பும் குழந்தைகளாக இருக்க முடியும்?" என்று கேட்கும்போது, அவர்  அன்பாக, அவர் உங்களுக்குச் சொல்வதைச் செய்யுங்கள் என்று பதிலளிக்கிறார்” என்றும் உரைத்தார்.

அனைவரின் ஒன்றிப்புக்காக மன்றாடுவோம்

“நம்மை வழிநடத்தவும், நாடுகள் பிரிவினையையும் வெறுப்பையும் வெல்ல உதவவும், இளைஞர்கள் கிறிஸ்துவுக்கு உண்மையாக இருக்க ஊக்குவிக்கவும் மரியாவிடம் வேண்டுவோம்” என்று கூறிய திருத்தந்தை, “திருஅவையிலிருந்து விலகிச் சென்றவர்களை அவர் மீண்டும் அழைத்து குடும்பங்களை வலுப்படுத்தட்டும் என்றும், இதனால் இல்லங்கள் விசுவாசத்தின் பள்ளிகளாக மாறக்கூடும்” என்றும் மொழிந்தார்.

“நற்செய்தியைத் தன் இதயத்தில் வைத்திருந்த மரியாவும், அதையே செய்ய நமக்கு உதவுவாராக” என்றும், “நற்செய்தி எங்குச் சென்றடைகிறதோ, அங்கு அனைத்தும் புதுப்பிக்கப்பட்டு நலமடைகின்றன என்ற நம்பிக்கையுடன் வாழ்வோம்” என்றும் கூறினார் திருத்தந்தை.

“நம்மைப் பாதுகாக்கவும், கிறிஸ்துவில் நாம் ஒன்றித்திருக்கவும் அவருடைய பரிந்துரையைக் கேட்போம்” என்றும், “கிறிஸ்து நமக்காகத் தயாரித்த நிலைவாழ்வை நோக்கி புனித பேதுருவின் துணையில் நம் அனைவரையும் அவர் வழிநடத்துவாராக என்றும் கூறி தனது மறையுரையை நிறைவு செய்தார் திருத்தந்தை.

திருத்தந்தையின் ஆயர் திருநிலைப்பாட்டு நாள்

திருஅவை குவாதலூப் அன்னை மரியாவின்  திருவிழாவைக் கொண்டாடும் இந்நாளில், திருத்தந்தை பதினான்காம் லியோ அவர்கள் தனது ஆயர் திருநிலைப்பாட்டு நாளையும் சிறப்பிக்கின்றார் என்பது மிகவும் குறிப்பிடத்தக்கது. கடந்த 2014-ஆன் ஆண்டு டிசம்பர் 12-ஆம் நாளன்று, திருத்தந்தை லியோ அவர்கள் ஆயராகத் திருநிலைப்படுத்தப்பட்டார்.