Որոնել

Vatican News
 Հայ Կաթողիկէ Եպիսկոպոսները Հռոմի մէջ Հայ Կաթողիկէ Եպիսկոպոսները Հռոմի մէջ 

Հայ Կաթողիկէ Եպիսկոպոսները Հռոմի մէջ կ՛ընտրեն Տանն Կիլիկիոյ Կաթողիկէ Հայոց 21 րդ Պատրիարքը։

Նշենք թէ անցեալ 22 յունիսին Լիբանանի Զմմառու մայրավանքին մէջ կայացած սիւնհոդոսը չէր կարողացած ընտրել Պատրիարքը, տրուած ըլլալով որ թեկնածուներէն ոչ մէկը հաւաքեց քուէներու երկու երրորդը, ինչպէս նախատեսուած է Արեւելեան Եկեղեցիներու եկեղեցական կանոնագրութեան մէջ։

Ռոպէր Աթթարեան - Վատիկան

Երկուշաբթի 20 սեպտեմբերի երեկոյեան 6ին Հռոմի Լեւոնեան Քահանայապետական Վարժարանէն ներս մատուցուած հանդիսաւոր Սուրբ Պատարագով սկիզբ կ՛առնէ Տանն Կիլիկիոյ հայ Կաթողիկէ Եկեղեցւոյ եպիսկոպոսներուն ընտրական սիւնհոդոսը, նախագահութեամբ Վսեմաշուք Կարդինալ Լէոնարտօ Սանտրիին` Արեւելեան Եկեղեցիներու Ժողովի կառավարիչը։

Բացումը սուրբ պատարագով

Աշխարհի տարբեր վայրերէն Հռոմ ժամանած եպիսկոպոսները գլխաւորութեամբ Հալէպի Հայ Կաթողիկէներու առաջնորդ եւ Տանն Կիլիկիոյ Կաթողիկէ Հայոց Պատրիարքութեան թափուր աթոռի կառավարիչ՝ Արհիապատիւ Պետրոս Արքեպիսկոպոս Միրիաթեանի պիտի ընտրեն անցեալ Մայիս 25ին իր մահկանացուն կնքած երջանկայիշատակ Գրիգոր Պետրոսի Ի կաթողիկոս Պատրիարքին յաջորդը։

Ժողովին մասնակցող եպիսկոպոսները

Ժողովին կը մասնակցին, բացի Արհ Պետրոս Արք Միրեաթեանէն, Թուրքիոյ Հայ Կաթողիկէ Եկեղեցւոյ առաջնորդ` գերապայծառ Լեւոն Արք. Զէքիյեան, Հայաստանի, Վրաստանի Ռուսիոյ ու Արեւելեան Եւրոպայի հայ կաթողիկէներու առաջնորդ Արհ Ռաֆայէլ Արքեպիսկոպոս Մինասեան, Պէյրութի Պատրիարքական Թեմի օգնական եպիսկոպոս` գերապայծառ Գէորգ Ասատուրեան, Դամասկոսի Հայ Կաթողիկէներու Պատրիարքական Էքզարքութեան առաջնորդը` գերապայծառ Յովսէփ Եպիսկոպոս Առնաութեան, Եգիպտոսի Հայ Կաթողիկէ թեմին առաջնորդ` գերապայծառ Գրիգոր Օգոստինոս Գուսան, Արժանթինի Պուէնըս Այրէսի Սուրբ Գրիգոր Նարեկացի Կաթողիկէ թեմին առաջնորդ` Արհ. Պօղոս Եպիսկոպոս Հաքիմեան, Միացեալ Նահանգներու եւ Քանատայի Տիրամայր Նարեկի թեմին առաջնորդ Արհ. Միքայէլ Եպիսկոպոս Մուրատեան, Ֆրանսայի Փարիզի Սուրբ Խաչ թեմին առաջնորդ Արհ. Եղիա Եպիսկոպոս Եղիայեան, Իրանի Հայ Կաթողիկէ եկեղեցւոյ առաջնորդ` Սարգիս Եպիսկոպոս Դաւիթեան, Փարիզի հայ կաթողիկէ թեմի երբեմնի առաջնորդ Արհ. Յովհաննէս Եպիսկոպոս Թէյրուզեան եւ Պոլսոյ Հայ Կաթողիկէներու երբեմնի առաջնորդ` Արհ. Գէորգ Արք. Խազումեան։

Բացակայ եպիսկոպոսներ

Բացակայ են Լիբանանէն ծանր հիւանդութեան պատճառաւ` Արհ. Մանուել Եպիսկոպոս Պաթաքեան եւ  Պրազիլէն Վարդան Եպիսկոպոս Պօղոսեան` Քովիտ19 համաճարակին որոշ սահմանափակումներու բերումով։

Նշենք թէ անցեալ 22 յունիսին Լիբանանի Զմմառու մայրավանքին մէջ կայացած սիւնհոդոսը չէր կարողացած ընտրել Պատրիարքը, տրուած ըլլալով որ թեկնածուներէն ոչ մէկը հաւաքեց քուէներու երկու երրորդը, ինչպէս նախատեսուած է Արեւելեան Եկեղեցիներու եկեղեցական կանոնագրութեան մէջ։

Ընտրական նիստերը 22 սեպտեմբերին

Յայտնենք թէ Սուրբ Պատարագէն ետք Սիւնհոդոսական հայրերը պիտի ամփոփուին երկօրեայ հոգեւոր կրթութեան մէջ ապա չորեքշաբթի 22 սեպտեմբերին պիտի սկսին ընտրութեան նիստերը, նախագահութեամբ միշտ Արեւելեան Եկեղեցիներու Ժողովի Կառավարիչ Կարդինալ Լէոնարտօ Սանտրիին։

Աղօթքի խնդրանք

Կիրակի օր` 19 սեպտեմբերին Լեւոնեան Ք. Վարժարանէն ներս մատուցած կիրակնօրեայ Սուրբ Պատարագի ընթացքին, Արհ. Միքայէլ Եպիսկոպոս Մուրատեան հաւատացեալներէն խնդրեց, որ աղօթքով ընկերանան սիւնհոդոսական նիստերուն, որպէսզի ըսաւ Ան «Սուրբ Հոգւոյն ներշնչումով ժողովական հայրերը կարողանան ընտրել իրենց միջեւ յարմարագոյնը` որպէսզի ան դառնայ «Գլուխ եւ Հայր» Տանն Կիլիկիոյ Կաթողիկէ Հայոց Պատրիարքութեան։

20/09/2021, 14:44